عدة اللغاز تبغى لها حل

**معلومات** **العضو** · 30-04-2009, 03:45 AM

بدال اللي راح جعل تروح روح من روحه

عندي عدة أللغاز تبغى لها حل=لوسمحتوا يارجال العرف اسمعوها
الاول اللي جالس له على زل=واخته خلافه والمهمه لأخوها
ومهمة الاثنين في خدمة الكل=لو الذكر يحشم وهي ما حشموها
والثاني اللي مع هل المعرفه خل=تصرفاته كل ناس رضوها
يهجر الا عطشة ضواميه واختل=وأن صوب اخته بالسهم قعدوها
والثالث اللي فوقه اخته ولاكل =والعلم عند اخته الا قابلوها
هوصاحب السمعه ويمرض ويعتل=واخته الا زلت عنه عدلوها
والرابع اللي دايم بشمس وبضل=مخارجه عن مداخلها غيبوها
نفعه كثير وهو على طول يحمل=والقاتله زاده عليها ادخلوه

**معلومات** **العضو** · 30-04-2009, 04:02 AM

والله كايده يابو مطر ولا ظنيت فيه احد بيحلها

نشوف الاخوان والاخوات الله يعطيهم العافيه ان عجزو فيها تدخلنا وحليتها كلها

**معلومات** **العضو** · 30-04-2009, 04:08 AM

هههههههههه
والله ابسط منها مافيه
وانت حليت اللغز اللي قبله
هههههههههههه
الله يبيض وجه العرنيه

**معلومات** **العضو** · 30-04-2009, 10:31 PM

نبيك تقرب لنا شوي
الدعوى مهيب سهلة

هي حلولها حول الفرس ؟

**معلومات** **العضو** · 30-04-2009, 10:41 PM

لا مالك لوى

كل لغز وله جهة وليس لها علاقه بالفرس
وكلهن يستخدمهن الانسان وينفعنه

**معلومات** **العضو** · 02-05-2009, 12:50 AM

يا اخوان اللي يدقق في اللغز بيحل اقل شي اثنين من اصل اربعه
واللي يحل ثلاثه الرابع من عندي

وهناك جائزه على اللغز وهي عبارة عن(بطاقة شحن 50))ريال

واللي يرمع ولا يحل ولا واحد يرسل لي بطاقه بعشرة ريال ههههههه

**معلومات** **العضو** · 02-05-2009, 01:23 AM

الدعوى فيه جوائز هههههههههههههههه

شدو حيلكم خلونا نخسر ابو مطر

يالله نقول الاول الفنجال والدله

ربعن تعاونو ما ذلو

خلها تطيح بحسابها

**معلومات** **العضو** · 02-05-2009, 02:05 PM

الله يعطيك العافية يابو مطر

له علاقة بدلة والبيز
والا ادور غيرها

**معلومات** **العضو** · 03-05-2009, 12:23 AM

مالكم لوى

ورمعات طيبه والله لايهينكم

وابوبدر وبيروت الله لايهينكم البطاقات ام عشره ههههههههههه

**معلومات** **العضو** · 03-05-2009, 01:27 AM

الثاني ياطويل العمر المزاز وعلبة العصير يمكن

طبعن الاول عرفته وكان قوي

**معلومات** **العضو** · 03-05-2009, 01:59 AM

يمكن المكينه بأجزائها او الخيمه
وان كان حداهن صحيح ارجع واكمل الحل بالتفصيل

**معلومات** **العضو** · 03-05-2009, 02:07 AM

انا معك بنت العرنيه بالخيمه لأن قريب الإجابه ، الرابـــــع ، وفقك الله بحله

**معلومات** **العضو** · 03-05-2009, 02:26 AM

مع ان اخونا قايل يارجال العرف ولا عبرنا بس انا بحل الاول
اذا ماهو الفنجال والبياله
او المعنز(المركى) ويالمسنده

وان شاء الله يطلع صح ونعلمه انا اللي حليناه حنا يالبنات

**معلومات** **العضو** · 03-05-2009, 02:05 PM

يؤ والله البنات مدهرات ويحلن مشاء الله عليهن

وين الشباب من الحلول والمساعده

وحده حلت الاول بس ننتظر راعي الغز يعلمنا منهي

**معلومات** **العضو** · 03-05-2009, 04:55 PM

بنت العرنيه
الخياليه
ابوبدر

مالك لوى

الزينة
الاول صح لسانك هو المركى والمخده
والله يستر منك

والله ماهو حقران للبنات
ولكن اللغز جاء كذا والا انتن فيكن الخير والبركه

الذين يشاهدون محتوى الموضوع الآن : 1 ( الأعضاء 0 والزوار 1)

		منتديات صحيفة وادي الدواسر الالكترونية