[معلومات العضو نايف بن مسرع]

بين الريال وبين شيمات الرجال=حرب(ن) ضروس(ن) قـلّ من يفطن لها
نار(ن) لها بين المعاليق اشتعال=وماتحرق إلا من بجوفه شلّها
أحدن رقى للعز في روس العلال=وأحدن على عزه دموعه هلّها
واليا خضع للمال (عبّـاد الريال)=خزمت نفسي لو تموت بغلّها
واللقمة اللي تلبس الرجال شال=لانيب راجيها ولا مشفٍ لّها
أشوم عنها علّ تاليها الزوال=بتموت نفس العز قبل أذلّها
يالله وانا طالبك ياجلّ الجلال=نفسي على دروب المكارم دلّها
واعوذبك يارب من ذل السؤال=ومن وقفة الاقدام عند أعداً لّها
بلهون ياوقت(ن) على أهل الطيب مال=بوجيهنا ليش السيوف تسلّها!
دامك عطيت الفال... فاكرم (م)العقال=يكفي... وخل اهل الحمول تشلّها
ياصاحبي لاعاد تكثر فالجدال=معادلة صعبة ولا اقدر حلّها
ولو تتهمني بالتزمت والهبال=النفس هذي هي وهذا اجبلّـها
لو مت ضامي و الفخر لي راس مال=كني شربت أنهار دجلة كلها
ياما على صدر السما نشّا خيال=وتموت الارض وماطره مابلّها
وكم دوحة(ن) فالقيض وارفة الظلال=لاجيت أبيها قام يقصر ظلها
وكمن هلال(ن) لاح من بعده هلال=وأنا اتصبر وانتظر لعلها
الحظ نوّ(ن) فالسما وبله زلال=دارن تعداها ودارن علّها
أسقى ديار(ن) ماتشد إلها الرحال=وارض الكرم والجود وبله زلّها
المال خلاّ فآخر الوقت اختلال=كم روس قوم(ن) تشتكي من حلّها
يوم إنّ (شيخ المال) لله الكمال=فتخه وبشت وسبحة(ن) يستلّها
مهيب (شيخة يوم ضربات السلال)=كثر الريال وجابها مشتلّها