بوح متواضع..
أتمنى أن يرقى لذائقتكم..
فإليكموه كما عايشته...
( يـــالـــيـــل )
ياليل وان طالك عتاب إللي من الضيقة سروك=أنا بعد لي شرهة ٍ عليك دوك ثبوتها
يوم ارتخت ضاف السدول وطوّل الفجر الضحوك=والناس غطـّـت في هزيع الليل وسط بيوتها
قامت قيامة صدري إللي من عنا وقته تكوك=كن الهموم السود تمشي به على ريموتها
وسقت القدم يـمّ المكان إللي ولو ممشاه شوك=كني أدوس أعتى الهموم بدوجتي واشوتها
مالي نديم إلا النجوم.. ودلتي.. واوراق بوك=لو كان صوتي لارفعته مايجاوب صوتها
أرحل مع إللي لاشكى الخفاق من بعض الدكوك=روحي تسامى في معانقهن وتلقى قوتها
وعلى عربسات الفكر جهزت للمسرى مكوك=أسجّ به عن شوف ناس ٍ شرّعت كبوتها !
سواد ياذيك الوجيه إللي تلوك الهرج لوك=إللي فتحت لاعراض خلق الله غدر تابوتها
كنها على غرات ناس ٍ غافلة تملك صكوك=الطيبة ماتنذكر.. والهينة ماتفوتها
قصْرت يدين اهل الردى.. واهل الحكي.. واهل الشكوك=وتطاولت الالسن عسى ربي يطيل سكوتها
تمازعوا عرج السوالف كل منهم: دوك.. دوك=كنها تجرب في قفا اهل الطايلة جبروتها
وسواد للي في مفال الهينة دايم بروك=بئس الوجيه إللي كشف غيب الزمان كروتها
ملبوسها لون السواد.. ولو تحوك القطن حوك=حتيش لو تبرق عمايمها.. ويلمع بوتها
وبياض للي في رصيد الطايلة تملك بنوك=إللي تذري عن سموم الوقت ضاف بشوتها
لاجيتهم: يامرحبا.. وان رحت عنهم ماقفوك=وجيه ٍ تضاحك للنشامى لو تشحّ وقوتها
ياليل لامنـّي شكيتك مثل من قبلي شكوك=عذري سمين وشرهتي عليك هاك ثبوتها
يوم ارتخت ضاف السدول وطول الفجر الضحوك=والناس غطت في هزيع الليل وسط بيوتها
قامت قيامة صدري إللي من عنا وقته تكوك=كن الهموم السود تمشي به على ريموتها