قصيدة للشاعر الكبير / محمد بن فهد بن ثنوا الخييلي ..
وصلتني من الاخ العزيز الشكري [ ابو عبد الله ] بيض الله وجه ..
ياملا قلبـي فيـه مثـل السواعيـر =مثل الجحيم اللي تزايـد بالاسعـار
غديت من الهوجاس في بحر التفاكير =متهيضن وأدير موجـات الافكـار
علـى بنـى عـم كـرام مناعيـر =دايـم منازلهـم عذيـات الاقفـار
دايـم منازلهـم مـرب المعاشيـر =وبيوتهم هي منـوة الضيـف لازار
منزالهـم شـف البكـار المغاتيـر =مراتع الغزلان ووحـوش الاطيـار
وديان صلـب غاشيتهـا النواويـر =نباتهـا المكنـان وشقـار ومـرار
يالله عسى بـرق مزونـه مزابيـر =فيها من الماء صادق الوبل مطـار
دار بها شفنا الجنان المخاضير = شفنا السعد والكيف والعز وانوار
مدهال سمحين الوجيه المسافير = كرام اللحى زبن الجلاوي وذرى الجار
تغالب ما تستمع للمشاوير = الى بغوا راي(ن) مضو فيه بجهار
وراحو رحيل مجردين مغاوير = وقاموا يذبون الفيافي والاقفار
تغالب غلاب بحور زواخير = موجه يهز المبرهزات وفار
وخلاف ذا يا راكبين مضامير = نجايب من ساس عيرات وخيار
دوارب من عوص جيش المناصير = ربد كما جول النعايم الى ذار
مسراحهن مني وملفاهن نشير = ريف الضعافي مكرم الضيف والجار
ابو صبر ستر العذارى الغنادير = لاجاء نهار فيه زوغات الابصار
والى ركب الخيل يصعق كما الزير = ويهوي كما تهتوي صواريم الاحرار
والى غدا البارود مثل المعاصير= زحزيح ما ينزاح لاشبت النار
سلم على اللي ينطحون الطوابير = حماية القطعان والدار والجار
لاد الخييلي مكرمين الخطاطير = عزاز نفوس موطيه كل زمار
وعلى خوالك يا نشير المصارير= اللي لهم عند العرب ذكر واخبار
وسلم على لاد العميري بتكرير=اللي يفكون المتلي الى احتار
وسلم على لاد العياض بتوقير = اهل الضفر والطيب وبيوتن اكبار
وسلم على اللي كالسباع الكواسير = الاد بن جوزان وافين الاشبار
ياما انتحوا كل التغالب مغاوير = على الاصايل وفوق نبهات الاكوار
يا ما اعتلوا من فوق قب المشاهير= صقر تطير صم جلمود الاوعار
وياما تقفوا ذود قوم مغاتير = وقلايع سبق هوى كل مختار
وياما تناخوا عند تالي المظاهير = الى رمن البيض ملبوس الاستار
وياما تعشوا من قروم مساطير = كل ابلج لاهاش في الحرب دجار
بحدب الظهور المرهفات البواتير = هنادي فيها اجتهد كل بيطار
وخناجر طمس لبوس المناعير= ومزرج له بين الامتان معبار
صلاة ربي عد ما صار ويصير = على النبي ما رفرف الطير بطيار