هات قصيدة في الدواسر من غير شعراء الدواسر

[معلومات العضو شافي بن راشد النتيفات]

قصيدة للشاعر بهيان المسعودي القحطاني في امير قبيلة النتيفات راشد بن نمشان رحمه الله وفي قبيلة النتيفات

نايف اركب وارتحل من فوق ريمة = فوق ما يزها شدادك والكلايف
زين صفق لحوي ريمة في الصريمة = صفق عبدات على بيض عفايف
لازمى رجم ومن دونه خريمة = قربنه واسعن ذا في الذلايف
لعنبو دار الردي دايم وخيمة = مابها ذربين ودلال نظايف
جنبوها جعل من فيها الثليمة = وانحروا مدهال مومية السفايف
النتيفي عارفاً درب العزيمة = شرفه ربي على سبع الطوايف
كلبوا لجواد اهل سمتاً وشيمة = جارهم يامن بهم لاصار خايف

 

 

 

 

[معلومات العضو حفيد الأمراء]

ارحب يابوشالح تراحيب المطر

ودايم مواضيعك هامه وجميلة

وهذي قصيدة الشاعر عيد بن سمير الحربي

في امير الفوج الثالث

الامير مشعان بن حزام العجالين
سلام يا حامي نقاه ودخيله=يوم النقا حماته على الأرض باقين

من الكتوف ليا ردوف الأصيله=تقلب عليهم لو خلت من هل الدين

وشرواك يا مشعان راعي جزيله=بالدين وسلوم الرجال المسمين

يابن الرجال اللي خطاهم طويله=اليوم وأيام اللقا والأكاوين

لهم نصيب من الفعول الجليله=الربع منها فيه ترجح موازين

يا ملبسين الوادي اسم القبيله=غني عن التعريف وانتم غنيين

علمن مواقيف الدواسر دليله=خير الكلام اللي عليه البراهين

ولا الكلام اللي يجي فيه ميله=ماله بسوق أهل المواجيب تثمين

يا مير تفداك العزوم الكليله=الفوت ما عوّد بوقت المصلين

واللي قضا في وقت فرض ونفيله=عنّز على اللي مثل شيخ العجالين

سمح الجناب وعز من يلتجيله=الين من الما هود في حزة اللين

وليا لتطم عيّف عميل بعميله=وليا سمح ما غيروه المثيرين

يا ريف من خاواك وانته زميله=جينا على طاريك من نجد عانين

في لازمٍ يلزم علينا نجيله=وانته لو انّا نتركه قلت مخطين

لو ان السالفه مستحيله=الآدمي ما كوّن آدم من الطين

لكن تراها للنشاما وسيله=والخشم معك إدراك معناه والعين

يوم ان لك عزمٍ يشيل الثقيله=بشر بها اللي جوك يا مير ناصين

من جود عطفك والشعور النبيله=أثابك اللي نزل آيات ياسين

وصلو على راعى الهدى والفضيله=يااللي سمعتو بالنبا قولوا آمين

 

 

 

 

[معلومات العضو شافي بن راشد النتيفات]

بيض الله وجهك على التفاعل ويستاهل الممدوح

 

 

 

 

[معلومات العضو حمد ابن فهد]

أبوشالح بيض الله وجه من رباك ويامال المعزه

كلمة في الخاطر واسجلها

 

 

 

 

[معلومات العضو شافي بن راشد النتيفات]

ووجهك ابيض يابوفهد ولاهنت على مرورك ياغالي الله يطول بعمرك

 

 

 

 

[معلومات العضو فيصل ضيف الله الكبرا]

هذه القصيده للشاعر /غنيم بن سعد الخبيش رحمه الله، قالها بعد تجمع قبيلة الدواسر وجمع مبلغ 25 مليون لأعتاق رقبة محمد بن فهد الصخابره، فأعجب بفعلهم وقال هذه الأبيات

ياإله الكون ياللي على خلقك رقيب =قسمة الشعار خذنا خيار قسومها
يالكريزي كل ماقلت عزّ الله امصيب=العوايد وآل زايد يازين سلومها
أشهد أنه موقف(ن) حرج والمبدا صعيب =مرتكاله كود ناس(ن) تشوق علومها
يوم بني البيت جو من بعيد ومن قريب =من حضر قدام ربعه فهو زيزومها
أذّن المذن وصفوا على صوت الخطيب =جعل قوم(ن) تذكر الله يسد ثلومها
باللوازم والمواجيب ماواحد يغيب =كل نفس(ن) تعرف الحق هذا يومها
لاغريب(ن) فالليالي وذا الموقف غريب =مامشوه الا الدواسر بقوّ عزومها
من تعزوى فالدواسر ظنونه ماتخيب =ينجلي همّه وعينه تهنّا نومها
كل رجلن فيه حنكه وله راس(ن) صليب =غاص فالغبّه وسود البحور يعومها
ارتكينا للشدايد وساعدنا النصيب =يوم بقعاء وجّهة يمنا بسهومها
بيّض الله وجه من هو على الداعي يجيب=عدّ ماتبدا الليالي وعد نجومها

وبيض الله وجهك يابوشالح والله يرحم شايبن ارثك من النار تقبل فائق احترامي لمقامك الشخصي

 

 

 

 

[معلومات العضو شافي بن راشد النتيفات]

تم التنسيق ولاهنت على التفاعل يافيصل وصح لسان شاعرها

 

 

 

 

[معلومات العضو عبدالرحمن بن فلاح آل بريك]

هذه قصه و قصيده كتبها الشاعر / سعود بن فيحان الوريكي العصيمي العتيبي وهو مسجون في سجن الملز محكوم عليه بالقصاص لقتله اثنين في عفيف وفي يوم من الأيام قام بصفعه المقدم المطيري وهو مقيد بالأغلال وبعد أسبوع أتى المقدم المطيري ومعه عسكر الى جناح السجن الذي يمكث فيه الوريكي وعندما دخل تم أنتقام السجين من المقدم المغرور وقاموا معه ربعه ومعهم دواسر ومسكوا العسكر عنه لين اخذ حقه من الضابط ... وهذا المقدم المطيري هو يمثل نفسه و مايمثل قبيلة مطير !! ويقول :

يقول الوريكي يوم ضيـق عليـه الحـجـز=ذكـر لابـتـه مـن جـايـر الوقـت وقيـوده
عـرض له مطـيـريـن نجـومـه تـرزه رز =لجل حكم أخو نوره تعدى على حدوده
وأخص العضيله بالتغطرس لبس له قز=بـعينـه جمـيع النـاس ماهـيب موجوده
نـصـيـتـه و عـسكـره مـن يـجيـه إيـكـز=وأخـذت القضـيه منه والرجل محدوده
عـتـيـبـه بنـي عمـي بهـم افتـخر واعتز=أنا ودون ضباطن مـن السجن وجنوده
طرولي ودق القلـب زودن علـيه وفـز=على لابتـن قصـيرهم تـثـبـت حــدوده
هل المجلس الطيب هل الحيل وأهل العز=تقـدم لنـاصـيـهـا مـن الطيـب كنـبـوده
يقـولـه عتـيـبـي من بغى العز مايحتز=يحب الرغـاده و العـدو يلـعن جـدوده
خويـه على العليا وهـو دوم لـه معـنز=ولا تنـقص حقوقـه ولـو زادت لهـوده
وتناخو بني عاصم وشيبان وقفت عز=علـى عسكـرن حـوله ثـلاثين موجوده
وتعزوا ولد قسام واسمع ولـدمكرز=ترانـا هـل العـادات حنـا هـل الـزوده
وجـونا(( بنـي زايـد)) وأنـا أعدهم لي كنز=تناخو وغدو سورن على من بغى العوده
بني( مسعر) اللي ضربهم بالنحر يركـز=يجـيبـون مـا يبـغـون لـو ثـار بـاروده
و(مخاريم) واحدهم على الطيب دوم يفز=لهم عزوتن من ماضي الوقت مشهوده
و(وداعين) والبيـضا علـى الغآليه تركز=مقـادم لهـم فـالطيب بالعـز مـوجوده
وآلآد( البريكي) فالمواقف رجـال الـعز=تـرى طيبهم ما يآصل الرجل لحدوده
و باقـي القبايـل كـل فخذن لها مركز=سلاطين نجد اللي على الطيب مولوده
يقولـه عتـيـبـي و الشدايد بهـا نـعـتـز=ترى الذل مـا نـرضـاه العـز بلـحـوده

 

 

 

 

[معلومات العضو عبدالرحمن بن فلاح آل بريك]

بسم الله الرحمن الرحيم هذه القصيدة مهداه إلى قبيلة الدواسر عامة وإلى الوداعين والعمور خاصة الذين شأت الأقدار أن نتعين عندهم وقضينا معهم وقتاً طويلاً نتجول في تلك الديار بين تارة وآخرى زوداً على العمل معهم سنتين كاملةً في تلك المدرسة (( مدرسة خيران المتوسطة )) فلم نرى سوى الطيب والإحترام وهذا ليس غريباً عليهم فنعم الزملاء ونعم الأصدقاء فمهما قلت وأردت أن أقول فإنه يعجز اللسان عن النطق والتعبير ويتوقف القلم عن الكتابة والتدوين ويحتار العقل في البحث والتفكير وتفنى عبارات الشكر والتقدير ، فما هي إلا قليل من كثير ، وهم يستأهلون ذلك وأكثر . وفي نهاية هذا العام لبيت رغبتي بنقلي إلى محافظة الدوادمي ،فأردت أن اكتب هذه القصيدة لردّ بعض الجميل . والآن نترككم مع القصيدة ....

يا لله يا قابل صلاة المصلين يا عالم ٍ بالغيب ما فيه غيره يامرسل محمد ويا حافظ الدين تغفر لنا يوم الحشر والحشيرة من بعدها ياهاجسي حضّر الحين واسبح بحور الشعر لوهي خطيرة نظّم بيوت الشعر ما فيه بعدين واختر لنا الجزلة بعرف وبصيرة اكتب لنا الجزلات ما بين قوسين صوب الدواسر محتمين الآخيرة العزوة اللي يحتمون المخلين لاجات صكات الليالي كبيرة أفعالهم بالطيب تملأ الموازين واخبارهم بالمجد في كل ديرة أهل الوفاء والطيب بالعسر واللين وأهل سيوفٍ فاللوازم شطيرة وأهل دلال مبهراتٍ ملاوين وأهل صياني بالشحم مستديرة أهل الثمان اللي بها الناس دارين المعجزات اللي عليهم يسيرة نخبة رجال ٍبالكرامه كريمين والطيب والمعروف ما تستعيره لهم شيم لهم قيم ومتصافين والضيف له قدر ٍ وللجار جيرة عاداتهم لاجات وحده وثنتين سل السيوف وصد خيلٍ مغيرة هذه علوم ٍ موثقة بالبراهين في صفحة التاريخ وسط الجزيرة هم أكسبوها من قبل والزمن شين يوم إنها بين القبائل ضريرة وأخص فيما قلت كل الوداعين هم والعمور ولا عليهم قصيرة يقولها اللي عارف ٍبالدواوين وليا بغى شيءٍ يزين تعبيره من عزوة الهيلا صعوط المجانين كسابة النوماس نعم العشيرة أمجادهم فيما مضى وصلت الصين يوم إنها في نجد تالع سعيرة لن أحتمى الميقاف جو للميادين وخصيمهم تكبر عليه الكسيرة ذباحة الحايل سقم للمعادين إشعارهم يوم الليالي عسيرة واختامها عداد حـــــــجٍّ ملبين وعداد ما تمطر مزون ٍ مطيرة صلاة للي بيّّن الحـــــق تبيين محمد اللي مضح إلنّا المسيرة الشاعر لافي بن سفر العتيبي

 

 

 

 

[معلومات العضو فيصل ضيف الله الكبرا]

هذه القصيدة للشاعر / مانع بن شلحاط العجمي

حينما القاها شخصياً في حفل موقع الدواسر الثاني

ويمتدح فيها عموم الدواسر والقصيدة تعبر عن نفسها

شهر كانون موعد الاحتفال=جمعني مع مداغيش الرجال
هل الطّولات والراي السديد=هل الوقّفات ذربين الفَعَال
سلام الله سلامٍ مايبور=يراضيكم غلا وِدْ و وِصَالْ
وأنا شاعر ليا حَلْ القصيد=ثقيل الروز وبيوتي ثقال
أقَلَّطْهَا على الخَرْمَانْ كَيّْفْ=وتَقْعِدْ راس كَيَّيْفْ الدّْلَالْ
وأنا مِعكم وأنا جدي إعجيم=أكَابِرْ فَخْرْ حيثِ أنِكم (خوال)
أفاخر (بالدواسر) وأسْتَطيْشْ=وأقول الحق وأشرع فالمقال
ظنا دَوْسَرْ هل الجمع الرزين= كذا التاريخ ما فيها جدال
(ابن بدران) يثرينا صداه=ولو هو زال ذِكْرَه لا يزال
ظنا( زايد وتغلب) خلّدوه=طناخ العَوّْدْ في روس العيال
وقف( سالم) يوصى به ظناه=(وداعينٍ )ذخرهم للقتال
و(مخاريمٍ ورجبانٍ) عُصاه=خوانٍ ما تفرقها الجبال
وعيال (صهَيب) لَحَلْ اللزوم=حمول الخيل وكفوف السّْلال
ظنا (مَسْعر) ومَنْ سمي( بريك)=ونَسْلْ (غياث) في يوم الهوال
وآلاد ا(لحريجي) لأعتزيت=وصولات (الشرافاء) فالنزال
وطغا (الفرجان) يخشاه الحريب=كذا جَمْع (الهواملهَ)لا منه صال
وظنا( صخبور والخضران) قوم=وهومات( الهواشله) صعبة منال
و(دَبَالينٍ) تَرَدْ المَعْتدين=وغارات (الشّْيَنَهْ) سِمْ حَال
أقوله و(آل عمار) الدُهَات=أيوالله (والشّْكَرَهْ) صَوّْكْ جال
وفزعات( الغــرره) لعتزيت=وجَرّات( الكبرا) لفح لال
ولكَبْرَتْ( فالنتيفات) أحْتَضَوّْك=ونخوات (آل عرفج) طيب فال
و(تغلب) تغلب الخصم الكبير=ذرى( الحقبان) للزابن ظلال
تعزوا (بالخييلات العمور)=وكفوٍ (بالمشاويه) لجا مجال
وآلاد( الحبيبي) فارقين=(مصاريرٍ )ليا كبرت نصال
يجوز أني نسيت أو ما نسيت=أنا ألتمس العذر في كل حال
فعذراً يا حما ذاك الدَرَيْك=يوم أن الاشراف ردوها شمال
بيومٍ تعتذر عَنْهْ الجموع=وزبنتوا ولد عمي وطال
كذا وأنتم حما ذيك الغروس=وفي هيباتكم يرعا الحلال
فرقتوا يا دواسر بأثنتين=ولا معكم شَبَيهْ ولا مثال
(الأولى وسمكم عصا القصير)=وَمَنْ وأَمنْ بعدِ ما كان ذال
و(الأخرى جاركم من بعد صْيْب=على ذاك الجدار أيْسَاق مال)
ومن شيخانكم( أبن أقويد)=(وأبن حفيظ )يومه طال قال
ومن فريسكم ناس ودُهَات=إلا ياكثرهم من آل وآل
(خجيم وراعي الهَدْلَا وزيد)=(وسحمي والمبيعيج) المثال
و(أبن وقيان وماجد والقضيع)=و(سند) من صهوة الصفرا ما مال
و(أبن نادر) وسبر القوم (ذيب)=(وأطليفيح) شَرَّابْ الزهال
ومنكم (أبن هذّال) الكريم=فَرَقْ وأنتم كريمين السبال
ومَقْطَعْ حقكم فالعرف عرف=(أبن إوثيله) وللقصيا جمال
ومن شعاركم (ظافر) وغير=و(أبن عمهوج) لصر المحال
وأبارك جمعكم هذا وأقول=سلام الله عليكم يا رجال



وللجميع تحياتي

 

 

 

 

[معلومات العضو شافي بن راشد النتيفات]

شكرا على تفاعلكم ولاعليك زود يالشرقي

والموضوع ياا اخوان المطلوب فيه شعراء

من خارج قبيلة الدواسر يمتدحون الدواسر

 

 

 

 

[معلومات العضو فيصل ضيف الله الكبرا]

أبوشالح بيض الله وجه من رباك ويامال المعزه

كلمة في الخاطر واسجلها

وعزالله انها في الخاطر بعد يابوشالح ونت تستاهلها من ابوفهد قبلي وتستاهلها مني

 

 

 

 

[معلومات العضو شافي بن راشد النتيفات]

الله يطول عمرك يافيصل ولاهنت

 

 

 

 

[معلومات العضو محمد الجبريني]

الله لا يهينك اخووي ابو راشد ونعم فيك وفي جميع
الدواسر يستاهلون كاماذكر فيهم من اشعار وأكثررر

تسلم ولاهنت والله لايهينك = ياشافي ابن راشد الدوسري
الله لنا بالشعر يسلم يمينك =ياصافي النيات والقلب البري

سلمة سلمة سلمة اخوي الشاعر/ شافي راشد النتيفات الدوسري
واتشرف بوجود قصيده لي من اضعف القصائد الي كتبت في الدواسر
ونقلك لها شرف لي لاهنت تقبل شكري وفائق وتقديرررري واحتراامي

الشعر في وصف الدواسر ينشط = وفي غيرهم ماحسه انه على وصول
والله لو فيهم عن يدي اقشط =لنظم بهم من جزل الاشعار معسول

وتقبل ودي وشكري لك وفائق تحياتي وتقديري

 

 

 

 

[معلومات العضو أبـ ريماس ـو]

اتمنى حذف الردود الخارجه عن الموضوع و نكتفي بطرح القصائد و اسماء شعرائها وكذلك تنسيق جميع القصائد المطروحه
ع شان يصير الموضوع مختصر للزوار
و من ضمنها ردي هذا احذفه بس طرحته للاقتراح و التوضيح