هات قصيدة في الدواسر من غير شعراء الدواسر

[معلومات العضو شافي بن راشد النتيفات]

أضع بين ايديكم هذه القصيدة للشاعر الكبير/ ملفي المورقي العتيبي حيث القاها ترحيب بقبيلة الدواسر .. في حفل قبيلة عتيبة بنفس المناسبة (( يقول فيها :

يا مرحبا في مرحبـا بالدواسـر=حياكم الله في ضيافـة هـوازن
أهل المكارم في ليـال المعاسـر=يومن ما يوجـد مـوارد اوازن
واليوم يوم الخير راهي وياسـر=نفحة مكارمهم تفـض المخـازن
ويوم الجزيرة بين رابح وخاسر=من المشاكل واختـلال التـوازن
حفنا مثاني نجد مثـل الكواسـر=على ظهور اللي بهلهن تنـازن
وحدن تيامن عنه واحداً تياسـر=خضناه يوم اجموع الابطال حازن
وشيوخنا في الحرب تعتق وتاسر=تاريخنا في نجد مالـه مـوازن
وانتم بعد ما تحبـون المخاسـر=مداتكم في الوقت تجلا المحـازن
اهل المحامر طيبيـن المكاسـر=المنفقين إليا خزن كـل خـازن
ويومنها من بين هايب وجاسـر=وقفاتكم مثل الجبـال الـروازن
وطريحكم من عينه الطير تاسـر=وفيه الظواري ربعن لين جـازن
تاريخكم عملاق ماهـوب كاسـر=وامجادكم في كل الأحوال فـازن

 

 

 

 

[معلومات العضو شافي بن راشد النتيفات]

ايديكم هذه القصيدة للشاعر / راجح بن مشبب المقاطي حيث القاها ترحيب بقبيلة الدواسر .. في حفل قبيلة عتيبة الذي أقامه الشاعر / مرزوق بن معتق المقاطي تكريماً لشيوخ ووجهاء قبيلة الدواسر يوم الأحد 17/5/1428هـ بنفس المناسبه

خيار المبادي طلبة الواحد القيّوم=كريمٍ يجازي راع الإحسان بإحسانه
أساله بحظٍّ مع كبار الحظوظ يقوم=ولطفه وتوفيقه وعفوه وغفرانه
ومن بعد ذا بالعود الازرق وباليشموم=تفوح المشاعر بالتراحيب طربانه
واعبّربنظمٍ كنّه اللولو المنظوم=يقدّم ويسفط في مواجيب سفطانه
هلا مرحبا ترحيبةٍ تسعد المهموم=عدد من يزور البيت ويطوف باركانه
هلا بالدواسر مزبن الخايف المضيوم=كنوز الوفا كسّابة الطيب ميدانه
أهل صرح مجدٍ راسيٍ شامخٍ مزموم=أشمٍّ رست في سبّع الارض سيسانه
تليدٍ شمخ من زايد ليا اليوم=وهو كلّ بادي شمس يزداد بنيانه
رجالٍ ليا شطّت وجا فالعلوم علوم=سعد عين من هم فالملمّات مزبانه
تناخو وفكّو كربة الجاني المحكوم=رهينٍ بحكم الشرع قد قطعت اكفانه
وصل خمسه وعشرين مليون فيه السوم=ولاحسّبو للمال زوده ونقصانه
وجوبه على وضح النقا مكرمٍ محشوم=بعد مااقنعوا بالجاه والمال ديّانه
هذا الماقف اللي ينتورّخ فخر ويدوم=للأجيال بالنوماس والمجد عنوانه
كبار المواقف مالها الاّ ظفر وعزوم=وفعلٍ يبين بحزّة الضيق برهانه
هذا اللي يبين الفرق به بين قوم وقوم=ويبقى بتاريخ العرب طيلة ازمانه
مثل ماحصل يوم الروابع غدنّ قسوم=وعيّا الشريف يكبّ زومه وطغيانه
بلاهم بجمعٍ كبر جمع العجم والروم=وحنّث على شيخانهم باغلظ أيمانه
يبا اللايذ اللي عقب جاهم هناه النوم=دخيل الوجيه اللي بلغ مبلغ امانه
بغو فيه وليا مار معميه زود الزوم=مغوّيه شيطانه ومطغيه سلطانه
وعيّا على الهيبات كلّ ابلجٍ شغموم=شنار الحميّا بيّنٍ بين حجّانه
رسوله بيومٍ هوله يشيّب المفطوم=عبوسٍ يغطّي الشمس عجّه ودخّانه
بدهم الفرنج وطعن كلّ اسمرٍ ملحوم=وحدبٍ شباها ينقح الراس بامتانه
وراسه تناهشته سباع الخلا والحوم=وجمعه مع فجوج الخلا طشّّ طيشانه
والاخرى بعد مالجار جاه اجله المحتوم=من جدار بيته ساقوا ديتْه جيرانه
خذوا نعم يوم النعم كايد وله مرسوم=وتتعب مدوّرة النواميس من شانه
أقوله وانا من لابةٍ مجدها معلوم=عتيبه هل العادات للمجد ترسانه
يوم انّ الحروب شعارها بالفتن مشعوم=ونجد اتّلاطم باحمر الموت جيلانه
أخذناه بطشٍ لابحيله ولابسلوم=ولاورث جدّانٍ مثبّت بحدّانه
هذا والفخر والطيب بين العرب مقسوم=وكلٍّ بطيبه حافظٍ ورث جدّانه
وصلاتي وتسليمي على المصطفى المعصوم=عدد ماهمل من رايح المزن ودّانه

 

 

 

 

[معلومات العضو شافي بن راشد النتيفات]

ومما قاله الشيخ الدكتور والداعيه المعروف عائض بن عبدالله القرني:

سألت القلب من تهـواه خـلاً=فقال الصحب في وادي الدواسر
ابوكـم زايـد زدتـم كـمـالاً=فسابقكم الى الخيـرات قاصـر

وقال ايضاَ:

يبرق البـارق لمقدمـك والراعد رعـدْ=وأرضنـا ترقص لمقـدمك والشاخص يميلْ
الله مـن قلب على نغمتـك قام وقعـدْ=كـن قولك منهـل بـارد مـن سلسبيلْ
أو كما ألعاب خود على المبسـم بـردْ=ضـاع فيه المسك والطعم طعم الزنجبيـلْ
جعـل عين تنضـلك نونها فيـه الرمـدْ=وجعـل قلب ما يحبـك يقطع بالصقيـلْ
يا نشيـد السحر لعلع ويسلم من نشدْ= عزوتـه بـأولاد زايـد مزبنـة الدخيـلْ
يطـرب القمـري ويمسي يغنيها الصردْ=والحمــام إذا سمعهـا يرتلهـا هـديـلْ
يا حمير اسلـم وجاك الوفـا متن وسنـدْ=مثـل غيـث الحشر نوّه يخيل ويستخيـلْ
من رجـال الأزد نعمين والعـالم شهـدْ=مـا نبي مـن خائب الجد والمفلس دليـلْ
ربعنـا الأنصار في الحرب واردهـم وردْ=وحنظلـه منـا شهيد وفي الجنة غسيـلْ
جيشنـا في بدر بدّع وجـوّد في أحـدْ=قطـع روس الشرك بايماننا يشفي الغليـلْ
ما نهاب الموت لو كان في شدق الأسـدْ=باعـة الأرواح في سوق يسلم من يشيـلْ
لو رصاص الحرب يهمي كما وبل البـردْ=فوقنـا يـابو علي فالجماجـم ما تميـلْ
نشرب الـدم مثـل شرب الموله للفنـدْ=وننشـق البـارود كنّـه رياحين النثيـلْ
والدخان إذا حضرنـا الوغـى كنه ثمـدْ =نكتحـل به والقنـا عندنا مكحل وميـلْ
طعننـا صـوب الكلى والحشايا والكِبَدْ=وضربنا بالسيف الاجرب على راس القتيلْ
نلبـس الاكفـان مـن عزمنا يوم الوعدْ=صـدِّق الأخبار يا شيخ والكاذب ذليـلْ
كـم روينا الطيب يا ناس عن خال وجدْ=يطرب الجيـد ويشرق بها النذل الرزيـلْ
وش بعـد تبغى نحدّثـك عنّا وش بعـدْ=اقصر الهقوات تكفى ترى المسرى طويـلْ
شيخنـا لو حـاك شـور تقل يوزن بلدْ=وطفلنـا من جودة الراي جا شيخ ثقيـلْ
والنميمـة والخـنى سوقهـا فينا كسدْ=مـا تسمعنـا لهرجـة حقير قـال قيـلْ
مـا تغنينـا بسلمى ولا نـوف ورغـدْ=ولا تغزلنا من الوجـد بالطـرف الكحيلْ
المساجـد عزنا عـاش والله من سجـدْ=والمصاحـف ذخرنا روحنا الذكـر الجليلْ
والذي مـا يعبد الله يمـوت من الكمـدْ=وش يبي بـالعيش عير على المذود وبيـلْ
عـن صـلاة الفجر ويل الذي عنها رقدْ=تايهٍ مخـذول يا مشبهـه بأصحاب فيـلْ
مـن يريـد المجد يتعب ومن يزرع حصدْ=والنجـاة بطاعـة الله ويـا نعم السبيـلْ
والله اللي صاحـب الجود ما للجود حدْ=مدتـه تغني إذا قطَّـب الـلاش البخيـلْ
يقبـل التائب ومن ردّ ما كنّـه شـردْ=أمـره النافـذ ولو قلـت هذا مستحيـلْ
لـه نزول بآخـر الليل والعـالم هجـدْ= مـن دعـا يبشر ويكـرم وهذا كل ليـلْ
ما نظمـت الشعر لأجل العطايا والرفـدْ = ومـا طلبت من الخلايـق ولو وزنة فتيـلْ
الله مـن علـم وشعر بصدري له زبـدْ=هايـج مـايج ينيّف على دجلـة ونيــلْ
اتمهمـل واطلـب الشعـر بالله هدَّهـدْ=غير يغلبنـي بغـزره وانا جسمـي نحيـلْ
كـم تفجّر مثل سيـل العرمرم واحتشدْ=حطّـم الجـدران من سطوته شال النخيـلْ
مقصـده وادي الدواسر يكّرم من قصدْ=جودهـم في الناس لو سال ينسي كل سيـلْ
يا مخايـل وبل ليـل على القبـلة ركدْ=زعزعتـه الريـح واقبل وله زمر وصهيـلْ
لـه مناشٍ في محايـل وزمجـر في ضمـدْ=راعـده زلـزل بفيفـا ودوى في بجيــلْ
احتكـم في ديـرةِ الجود واهمل واجتهدْ=كـن شبيـه للدواسر ترى الغالي قليــلْ
قالهـا عبـد لمـولاه ما يعـزى بأحـدْ=غير رب النـاس حسبي وهو نعم الوكيـلْ
والصـلاة على محمـد تسير بلا عـددْ=وآل بيتـه والصحابـة خلاصة كل جيـلْ

 

 

 

 

[معلومات العضو شافي بن راشد النتيفات]

قال فرحان ابن محسن الشمري

من يريد المجد يرثله فعـــــــايل = مثل ما قال القريفه فـي لحـــونـه
بالحلايل وعند قوت الــــــدبايل= كــل مـا جالـه مجـال يمدحــــونـه
ندري أن المال والعمـــــر زايـل= والفعايـل بالتوالـي يذكـــــــرونـه
غير هذا واجـد فعل الحمــــــايل = يدركـــــون الطيـب نـاس يفعلونـه
للدواســــر قصة ماله فعــــــايل = الخـوي وموتــــــره جـاو ينقلونـه
ذا وهم في خوف من شر القنابل= وطايرات في سماهــــم يطــردونه
ذي عوايد عند زينيين الحمـــايل = كـــل حزة ضيق ( زايد ) يندبــونه

قصيدة الشمري الثانيه

يا حمود هات الفرت وكمـل زهابـه =كمـل زهابـه يازبون المشافيـق
أسـرح عليـه ولا تحـن الوطابـه =أجنب عسى دربك ودربـه توافيـق
صلهم ترى الممشى يبي من هقابـه =خص إلي زانـت دروب الطواريـق
أنص السد يري زابن منهـو لجابـه =سعد الركاب وسعد أهلها من الضيق
سلم عليه اعداد منشـى السحابـه =وما ورقت لشجار من الويل توريـق
قله ترى فعله فخر مـن حكـا بـه =فعل على عـزم الردييـن ماطيـق
ثم ثنها يـا حمـود فهـل الحزابـه =( دواسرآ) قامـت بفعـل المطاليـق
سلم عليهم كـل مـن هـم بنابـه =سلام أحلى من غبـوق المفاهيـق
ياويش اقول بمدح سرب (إذيابـه ) =يوم استناخ الفرت ثم نشف الريـق
تعصبـوا والكـل يضحـك بنـابـه =وقالوا لي أبشر بالفرج ساعة الضيق
الفـرت حطـوه الذيابـه أنهـابـه =كـل يعلـق نبلتـه فـوق تعليـق
شالـوه ربـع للخطـر مـا تهابـه =حتى الكرد شالوه ما واحـدا عيـق
كل يقـول الفـرت عنـدي وانابـه =خوينـا مـا يلحقـه يـوم تعويـق
يا لبيض يا للي تنقشـن الخضابـه =بالله عليكن للنشا ما عشـا شيـق
يا كيـف ممدحهـم وازيـد الثنابـه =من حد حايـل ليـن حـد العواليـق
مدح على فعل ينـو مـس جوابـه =ماهوب حكي مـا يعـزز بتصديـق
يستاهلـونـه بالثـنـا والوفـابـه =مدح إلي جا الصدق ماهوب تلفيـق

 

 

 

 

[معلومات العضو شافي بن راشد النتيفات]

هذه القصيدة للشاعر / مانع بن شلحاط العجمي ويمتدح فيها عموم الدواسر والقصيدة تعبر عن نفسها

شهر كانون موعد الاحتفال=جمعني مع مداغيش الرجال
هل الطّولات والراي السديد=هل الوقّفات ذربين الفَعَال
سلام الله سلامٍ مايبور=يراضيكم غلا وِدْ و وِصَالْ
وأنا شاعر ليا حَلْ القصيد=ثقيل الروز وبيوتي ثقال
أقَلَّطْهَا على الخَرْمَانْ كَيّْفْ=وتَقْعِدْ راس كَيَّيْفْ الدّْلَالْ
وأنا مِعكم وأنا جدي إعجيم=أكَابِرْ فَخْرْ حيثِ أنِكم (خوال)
أفاخر (بالدواسر) وأسْتَطيْشْ=وأقول الحق وأشرع فالمقال
ظنا دَوْسَرْ هل الجمع الرزين= كذا التاريخ ما فيها جدال
(ابن بدران) يثرينا صداه=ولو هو زال ذِكْرَه لا يزال
وقف( سالم) يوصى به ظناه=(وداعينٍ )ذخرهم للقتال
و(مخاريمٍ ورجبانٍ) عُصاه=خوانٍ ما تفرقها الجبال
وعيال (صهَيب) لَحَلْ اللزوم=حمول الخيل وكفوف السّْلال
ظنا (مَسْعر) ومَنْ سمي( بريك)=ونَسْلْ (غياث) في يوم الهوال
وآلاد ا(لحريجي) لأعتزيت=وصولات (الشرافاء) فالنزال
وطغا (الفرجان) يخشاه الحريب=كذا جَمْع (الهواملهَ)لا منه صال
وظنا( صخبور والخضران) قوم=وهومات( الهواشله) صعبة منال
و(دَبَالينٍ) تَرَدْ المَعْتدين=وغارات (الشّْيَنَهْ) سِمْ حَال
أقوله و(آل عمار) الدُهَات=أيوالله (والشّْكَرَهْ) صَوّْكْ جال
يجوز أني نسيت أو ما نسيت=أنا ألتمس العذر في كل حال
فعذراً يا حما ذاك الدَرَيْك=يوم أن الاشراف ردوها شمال
بيومٍ تعتذر عَنْهْ الجموع=وزبنتوا ولد عمي وطال
كذا وأنتم حما ذيك الغروس=وفي هيباتكم يرعا الحلال
فرقتوا يا دواسر بأثنتين=ولا معكم شَبَيهْ ولا مثال
(الأولى وسمكم عصا القصير)=وَمَنْ وأَمنْ بعدِ ما كان ذال
و(الأخرى جاركم من بعد صْيْب=على ذاك الجدار أيْسَاق مال)
ومن شيخانكم( أبن أقويد)=(وأبن حفيظ )يومه طال قال
ومن فريسكم ناس ودُهَات=إلا ياكثرهم من آل وآل
(خجيم وراعي الهَدْلَا وزيد)=(وسحمي والمبيعيج) المثال
و(أبن وقيان وماجد والقضيع)=و(سند) من صهوة الصفرا ما مال
و(أبن نادر) وسبر القوم (ذيب)=(وأطليفيح) شَرَّابْ الزهال
ومنكم (أبن هذّال) الكريم=فَرَقْ وأنتم كريمين السبال
ومَقْطَعْ حقكم فالعرف عرف=(أبن إوثيله) وللقصيا جمال
ومن شعاركم (ظافر) وغير=و(أبن عمهوج) لصر المحال
وأبارك جمعكم هذا وأقول=سلام الله عليكم يا رجال

--------------------------------------------------------------------------------

 

 

 

 

[معلومات العضو شافي بن راشد النتيفات]

هذه القصيده قاله محمد بن عبدالله بن عبدالكريم المعجل قالها في مناسبة خاصه مع اصدقاء له من البدارين الدواسر :

واهني من نسل بدران ربع له = مايظام الجار والجار بدراني
لا بة تمشي علي الحق والمله = جارهم من بينهم تقل سلطاني
لابة في الكون ماتطري الذالة = كل واحد في اللقا يسبق الثاني
لاتناخوا واعتزوا واجملوا سلة = من وقف في دربهم راح همياني
ال زايــــد ذخرهم في اللقا كله = ولاتفرق بين عامر و ودعاني
بيرق واحد يسرون في ظله= من ربي نجد الي ظلع نجراني
انشد التاريخ عن دقه وجله = للدواسر فعل في كل ميداني
شيخنا صقر الجزيره عضود له= مخلصين له علي طول الازماني
مايعرفون الخيانات والذله=يرخصون الروح من دون الاوطاني
كل ماقلته فالاخيار كفو له= ومن سمعني قال ماهوب غلطاني
جودهم للظيف جود علي حله= يرخصون الزاد والبن والظاني
والختم صلوا علي صاحب الملة= سيد كل الناس عرب وعجماني

 

 

 

 

[معلومات العضو شافي بن راشد النتيفات]

هذه قصيدة ترحيبة ومدح للشاعر محمد بن مشعل بن صبحان في استقبال السفير السعودي أنذاك في الكويت الأمير عبدالله بن عبدالعزيز السديري. يقول الشاعر :

بسم الله الرحمن عـلام مـا خفـى=موجـد خلايقهـا وبيـده دمارهـا
الواحـد المعبـود الفـرد الصمـد=سبحان عازل ليلهـا مـن نهارهـا
مشت سفينة نوح بامـره وقدرتـه=بين الجبل والموج قـدى مسارهـا
هذي ومن بعده هلا بـك ومرحبـا=ما شرقت شمس الضحى وانحدارها
وما لاح براق وما سـار بالوطـى=وعداد ما شاف المشاعـر وزارهـا
وفي دار ابو فيصل وجود ك يسرنا=دارا تكـرم بالـوفـا خطـارهـا
وبمشاهدك ياشيخ نعتـز ونفتخـر=يابن السدارا اللـي رفيـع وقارهـا
زودن على مـا خلفـوه اجدودكـم=كسابـة العليـا مواكـر احرارهـا
انتم خوال ملوك جزيـرة ا لعـرب=اللي نصر الاسلام من انتصارهـا
ودوركم عظيما(( يالسـدارى)) وفعلكـم=بهيبة جوانبهـا ورفعـة اسوارهـا
بمواقـف دون الوطـن تقفونـهـا=مرا يميـن الـدار ومـرا يسارهـا
قومـا تعـز نجـد ونجـد تعزهـا=ومن دون نجد مرخصين اعمارهـا
انتم حماة الدين واعـلام نصرهـا=في ظـل حكامـا تفـرج لجارهـا
ومن لابة في حزة الضيـق واللقـا=لا ثار من تحت الحوافـر غبارهـا
يردون غبـات الياهيـب وردهـا=لا فاض من حوض المنايا حمارها
فرسان سيـرات ومقاديـم سربـه=>>زايدية<< سـو البـلا فـي مغارهـا
رقو سنام المجد فـي قمـة العـلا=ومـن السمينـه ماخذيـن فقارهـا
ومن قبلنا الشعـار غنـوا بمدحكـم=قال الشويعر في جزيـل اشعارهـا
يمـدح (سليمـان) المسمـى جدكـم=افعـال طيبـه شايعـات اذكارهـا
اللـي حمـى ،،،،مــن مقيمـهـا=وفك الذلول وجاب غالـي قشارهـا
ذلول وحيـد وفـي ديـار غربـه=ومن عقب شوف العين محيت اثارها
ولجا على (سليمان) من طيب ذكـره=ومن طيب حظه قام له في مثارهـا
وهـذي مآثـر لابــة (( زايـديـه))=قوماً تأدي جارهـا مـن اجدارهـا
اسيوف حكـام الشريعـه ودينهـا=ومبدأ الرسالـه رافعيـن اشعارهـا
(تركي) حكم بالشرق و(محمـد) الحسـا=و(احمد) وصل حكمه نوازح ديارهـا
اهل الكرم والجود كواكـب النـدى=وزبن المخيف اللي نزل في جوارها
من عهد(( ابن بـدران)) لليـوم فعلكـم=صفحات مجد ساطعـات انوارهـا
تم الكلام وما نقـص فـي جوابـي=تقبـلـوا تحيـتـي واعتـذارهـا
انكرر الترحيـب ونقـول مرحبـا=واللي حضر له قدرها واعتبارهـا
وختامها مني صـلاة علـى النبـي=شفيع الامه يوم تشخص ابصارهـا
رسولنا المعصوم عن كـل الخطـا=اللي حفظه الله وهو وسـط غارهـا

 

 

 

 

[معلومات العضو شافي بن راشد النتيفات]

كان الشاعر فهد العاصمي ، يتردد كل عام على أخواله الرجبان من الدواسر بواديهم بحكم القرابة ، ويجد عندهم الإكرام والحفاوة ، وجزيل العطاء ، وفي موطنه تذكر مواقف أخواله وهو بعيد عنهم مع قبيلته أل عاصم ، وأراد أن يثني عليهم و يمتدحهم على أفعالهم الطيبة معه فأنشد قائلا :

يا هل الركاب اللي تقافت شمالي = بيض المحاقب يقطعن اشهب اللال
ردوا سلامي لا لفيتوا خوالي = أولاد رجب يا عزيزين الافعال
بنيت مجالسهم بروس العلالي = وفنجالهم يقعد خوي الراس لا مال
ثنوه لابن عويس راعي الدلالي = عيد الطروش مقدم الكيف في الحال
وعبدالله اللي يوم لحق المتالي = ما عاد جرت حربته كون با حبال
و ابو ظريس الذرب ريف الهزالي = مقدم مداغيش لهم وقع و افعال
أن جيت حول اديارهم طاب حالي = و أن انتزحنا يسر الرب الاحوال

 

 

 

 

[معلومات العضو شافي بن راشد النتيفات]

هذه قصيدة للشاعر أبو ليله المري أحد شيوخ آل مره في أهل السليل وسكانها من قبائل الوداعين عندما قاموا بواجب الضيافة وأكرموه أحسن إكرام :

يأهل النضا اللي عليكم شانت المله=ائتونـي ادلكـم دار المعازيـبـي
جعل السليل رزين المـزن تندلـه=يجيه سيل يضيق بـة المحانيبـي
جينا الوداعين وحطوا كل شى فله=الحيل تعبا لنا فـوق المعاصيبـي
والقت عند الركايب ماحـد شلـه=انا اشهد ان ال زايد ترث الطيبـي
ليت الذهب ينخزن فى دارهم كلـه=حيثة يعيـن الاجـات المواجيبـي
والمدح كلـه لفرحـان وشروالـه=ترثت كليب حيثة منقـع الطيبـي

 

 

 

 

[معلومات العضو شافي بن راشد النتيفات]

الشيخ الشاعر الفارس راكان بن حثلين هو يمدح ال عمار يوم انشده اولده العمار حضر ولا بدو فقال هذي القصيده :

الله من قلـبٍ تخالـف إشطونـه = وبقعـا تصفـق بـه يميـن ويـسـار
يوم الزعيم لبـس علينـا زبونـه = وأحمل علينـا كـن لـه عندنـا ثـار
يـوم القبايـل والـدول يتبعونـه = نـوى يجلينـا وراء حـد الأمـصـار
لعيون من بالميل يجلـي عيونـه = إنفرق الطابور لـو صـار مـا صـار
ذكرت أنا اللي جارهـم يهملونـه =لاد زايـد سلمهـم همـلـة الـجـار
نصيت اللي ما رضوا لي بالمهونه = نصيـت أهـل السـيـح لاد عـمـار
لجاهـم المطـرود يستقبلـونـه = ومن الخوف يامن عند وافين الأشبـار
والضيف لامن زارهم يكرمونـه=صيانـي تنقـل وعزايمـهـم اكـبـار
كم كبش مـن الضـان يدفعونـه = والا مـن الحشـوان قعـدان وبـكـار
السيـح ديرتـهـم ويستاهلـونـه = لا من استوى بالحمل زينـات الأثمـار
وريـة عليـه البحـر يفجرونـه =بين القبايـل مـا بنـي دونـه جـدار
كم واحـدٍ مـن دونـه يعدلونـه = حماية الأمـدار فـي الموقـف الحـار
حريبهـم منهـم تشـده اجنونـه = لاسمع عزوتهـم مـن المعركـة نـار
والجوخ في يوم اللقـا يلبسونـه =وسلة سيوف الهند مـن صنـع بيطـار
والجار ما يرضون عليه بمهونـه = مـن بينهـم ينـزل ولاكنـه بـجـار
كـم خايـعٍ مطـرف ينزلـونـه = ويرعـون قطـعـان الأزاف نــوار
وكـم عقيـدٍ عندهـا يصفقونـه = مستجنبين الخيـل مـن قـب ومهـار
وجميلهم ما انسـاه لاجـو يبونـه = ولانيـب بـرد المـجـازات بــوار

 

 

 

 

[معلومات العضو شافي بن راشد النتيفات]

قصيدة للشاعر محمد الجبريني السلمي

اشهد ان بعض العرب ماينعنيله = ياحسافه انه من قوم وحمايل
يالدواسر والله انكم اطيب قبيله = فالعرب واطيب قبيله فالقبايل
يوم قدح الزند في راس الفتيله =يشهد التاريخ لكم اروع فعايل
لابتن شجعان ترقون الطويله = بالكرم والطيب وبكل المسايل
للخوي والجار والعاني دخيله =يومها بالسيف والخيل الأصايل
كاسبين الطيب هو وي الجميله = ستر دعجات العيون ام الجدايل
دوسري والنعم ماشي(ن) يحيله = وان تنخوابه خوي بفعل فعايل
مرويت حد السيوف اللي صقيله= يوم بعض الخلق مدري كيف قايل
يوم بعض الناس مافيها عقيله =وان بغت لطيب ضوت للفشايل
لن كف اهل البخل دايم بخيله =مابعد ضريت على كسب الجمايل
والليالي بين عدل وبين مايله = ذوقتنا المر وصنوف الهوايل
ذوقتنا الحنضله والزنجبيله = لننا مانتقن افنون التحايل
وش نسوي دام مافاليد حيله = واليالي بين حط وبين شايل
والسلام اختام والقصه طويله = والبروق اتلوح في غر المخايل

--------------------------------------------------------------------------------

 

 

 

 

[معلومات العضو شافي بن راشد النتيفات]

الشاعر عبيد بن عبدالعزيز الفيصل التميمي - تمـــير

لقيت بالوادي رجال المواجيب = عيال زايد كاسبين الطويلة
يالله عسى من لامني فيهم يخيب = مايهتني بالنوم في كل ليله
مجالس دايم حفاوة وترحيب = قولة (هلا) ماهي عليهم ثقيلة
قدوعهم يشديك حلو المراطيب = ودلالهم بالهيل غص بسبيله
مذبحين الحيل شبابة الطيب = أهل المراجل والعلوم الجزيلة
لاجا الفجر لقيتهم بالمحاريب = يدعون رب مايخيب عميله
دين وخلق وسمت مابه عذاريب = وسوالف تحيي القلوب المحيلة
عسى الوسم لديارهم له مراكيب = مزن من القبلة تتابع مخيله
مدحي لهم مابه مذمة وتثريب = الحق حق وبالأمانه نشيله
وختامها صلوا على منقع الطيب = على النبي واللي سلك مع سبيله

 

 

 

 

[معلومات العضو شافي بن راشد النتيفات]

هذه قصيدة للشاعر:عبيد بن مسفر العرجاني اليامي في مدح الأمير عبدالعزيز بن حزام العجالين خاصة والدواسر عامة

سلام يا أبو حزام يا منبع الطيب=تحيةٍ من شاعر جاك عاني
يا اللي دلالك فوق ضوك محاديب=وقنادها من الهيل والزعفراني
وجيتك مسير يا زبون المواجيب=ويمك هوى قلبي وشوقي حداني
يا بن الكرام اللي تهد الأصاعيب=وبيوتهم تبنى بعالي البياني
والطيب ما فيه شك ولا ريب=يا مكرم الضيفان هم والعواني
ربعك دواسر هم هل العز والطيب=وانته يا أبو حزامٍ زبون الحصاني
ابازهمك يا شوق بيض الرعابيب=ستر العذارى مرودعات الوشامي
وانتم بعيد من الردى والعذاريب=وأهل الكرم أهل العلوم السماني
دواسر عند الملاقى معاطيب=أولاد زايد طيبين المجاني
وجالك بدرب الخير فعل وتجاريب=وفيكم يلوذ اللي شكا من الزماني
يا عيد حفيّات النضا شمخ النيب=عما يكن القلب ينطق لساني
الراس شيب والعوارض غدت شيب=واللي جرالي من زماني كفاني
قلته وأنا من لابةٍ لا عوى الذيب=يا مية ٍ في الضيق تروي السناني
تم الجواب بذكر من يعلم الغيب=ويا لله على زين الجواب تهداني
واصلي واسلم عد جرد المهاديب=على النبي الهاشمي أبن عدناني

 

 

 

 

[معلومات العضو شافي بن راشد النتيفات]

هذه قصيدة للشاعر: ظافر بن حمد العرجاني اليامي في مدح قبيلة العجالين خاصة والدواسر عامة

ياالله يامنزل تبارك وياسين=ماغيرك أسجد له وأكبر وأصلي
طالبك فقهني ووفقني آمين=أنت الملاذ ونور دربي وظلي
وأنت الوحيد الي مع عبادك معين=أنك تجملني إلى من حصلي
مواقف في مدح ناس ميامين=والاالرخوم ومثلها فدوة لي
لاناشد عنها ولاقايل وين=حتى ولو بلسانها لي تهلي
أبقى على المقدار والعز والدين=وإلى دعاني وافي جيت كلي
أحضر الهاجس وسوق الفكر لين=مزون شعري تستخيل وتهلي
وإلى بغيت أذكر فعول الوفيين=أحترت ويش أجيب من ويش أخلي
الوقت مايسمح لسرد الدواوين=ولوتنزف الأقلام ماشفيت غلي
وتبغى أختصار القول رح للعجالين=ياتيك كل الطيب ماغاب ملي
لطيب مجد وللمراجل عناوين=أسطورة التاريخ لأنهم من اللي
كسابة الناموس ضد المعادين=دواسر فيها الشموخ أمتعلي
رجالهم يرسي على العسر واللين=وعدوهم وقت الملاقى يولي
وشيوخهم لامن غدى العلم علمين=تحل مالايمكن أنه يحلي
تضرب على روس العقد حق ويبين=نور على كل الكواكب مطلي
الله خلقهم للمراجل ميادين=وخلا الصدور بعز الأنفس محلي
قلته وانا عندي شهود وبراهين=لاعاش راس اللي شعوره تسلي
وإلى بغيت الطيب فنص العجالين=وتشوف كل الطيب ماغاب ملي
وانا من اللي يرجحون الموازين=عرجاني ويام العريبة هللي

--------------------------------------------------------------------------------

 

 

 

 

[معلومات العضو شافي بن راشد النتيفات]

هذه القصيدة للشاعر عبيد عطالله الشيباني في قبيلة النتيفات

قم يانديبي فوق فكسارأرخم=آخرموديل وفيه كل الوصوفي
الياونس النمره نهض ثم تليم=تليم اللى شاف فالجوشوفي
عليه شغموم شجاع إمشغمم=من ربعي العتبان لزم الكفوفي
ينصا هل الهدار نثارت الدم=أهل الكرم فالعسر يوم الظروفي
لازم لياجيت النتيفات تعزم=ألاد وائل مكرمين الضيوفي
كلٍ يقول إقلط وطالبك قل تم=وزود على الترحيب ذبح الخروفي
وهيلأ وبنّ وعودٍ أزرق يقدم=وطرايفٍ تقطع شفات الشفوفي
ربع قروم وكلبوهم بني عم=الكل منهم فالمواجيب يوفي
أهل إمهار بالملاقاء تلجم=أهل المهارالسرد وأهل السيوفي
أفعالهم تعرف قبل نجد يحكم=ونجدإيتزعزع بين آمان وخوفي
والمدح مايرفع ولاينقص الذم=المح مايرفع بيوت الضعوفي
أنالهم مديون بالطيب ملزم=ونالهم ولوطال الزمان إمعروفي
تنشّرلهم بيضا على راس مازم=بيضآ لهاكل الخلايق تشوفي
تم الجواب إوصل إكتابي إلهم=حطه بيد عامر عشير الهنوفي
قله ترا العتيبي عليكم إيسلم=عداد ماخط القلم بالحروفي
وصلاة ربي عد مزن ترزم=على النبي مالاح برق الصيوفي