وصف الصورة شعرا"

[معلومات العضو عبدالله الحافر الغييثي]

[IMG][/IMG]

محلا السجة مع البر للصدر الكتوم = في فياض(ن) يدله البال مع يشمومها
علها وبل الحيا من مبدرة الوسوم = مزنة(ن) غرا تداحم قنوف غيومها
يرتوي منها وطا الارض وتقض الحزوم = وبلها ودان ما ينقطع ديمومها
ترجع الارض المحل من عطا الرب الرحوم = وتانس النفس الشقية بنفح نسومها
المحاجر فايضه والطيور ابها تعوم = وام سالم تنزل وتعتلي في حومها
بهجة اللي وسط صدره كما لفح السموم = مبطي ونفسه تزايم ثقال همومها
الفيافي مخضره والسما مردم غيوم = والنفوس الساليه غاطسه في نومها
ما يحجب الشوف مبنى ولا قلة يموم = ديرة(ن) كل يسولف بطيب ريومها
مدهل بكار(ن) لعود(ن) مقدر ومحشوم = في هواها النفس تشقى ولاحد يلومها
غاليه واتلاد من يوم زرقات السهوم = تشبح النظرة بهاذيك هذي تومها
ما سجع بالصوت دلالها يامن يسوم = ولا شراها من بغاها مع اول سومها
لاعرضت قامت تبختر بممشى فيه زوم = ومن مواطيها الصغيرة عجل درهومها
منفهق سنامها ناسع الغارب ردوم = مايل(ن) عرقوبها منهدل خرطومها
ارقبه سناد والخد راهي ومعدوم = والاذاني شرف دون الفتر بوقومها
تدهشك لامنها جت من المبرك تقوم = تمتعك بقيامها كنه احد يهومها
ذيلها وقم الشبر والوبر حسك(ن) بروم = صورة(ن) تشدى السحابه ورا تنعومها
راهيات الطول سناد وكبار الجروم = نادرات(ن) ما تضاهى بكبر جرومها
شامة(ن) بذيالها كبر بصمات البهوم = وشامة(ن) في وقمها مثلها بخشومها
ما حلا لا كفها صوت مودها قدوم = وعقب ما تفاوقت درت بمغنومها
مع عتيم الليل والضو وهاج(ن) شعوم = وامهات الخير تجتر في مطعومها
بصحبة اللي فالنوايب يسدون اللزوم = استدارت دلة الكيف عقب اولومها
وابتدا حذف الشمغ وابتدا سرد العلوم = ونسيت النفس الشقية جميع همومها