ياراكب اللي ماصنعه الخواجة

[معلومات العضو كلاش]

المشاركة الأصلية كتبت بواسطة فراج بن فهد

السلام عليكم ورحمة الله وبركاته :

أعضاء وزوار المنتدى الكرام :

كل عام والجميع بخير وتقبل الله منا ومنك صالح الأعمال,

يسرني مشاركتكم من جديد بهذه القصيدة .

.
.
.

" خلف بن ظفر آل تركي "

ابن عمي نسباً , وأدعوه عمي , وهو في الحقيقة أبي ,
حيث توفي والدي رحمه الله وأنا دون سن الخامسة ,
كانت ولازالت أفضاله تغمرني ومهما قلت فيه فلن أفيه معشار حقه ,
هي مجرد محاولة للتعبير لاأكثر .
.
.

ياراكـب اللـي ماصنـعـه الخـواجـة=من (طوكيـو )يحمـل تواريـخ الإنتـاج
فكسـارٍ لـهـم الضمـيـر انفـراجـة=لونه كمـا رغـوة حليـب وكمـا العـاج
مــاورّده ( عبداللطـيـف ) بكـراجـه=من ( البريمـي ) جابـه لنجـد ميـراج
كنـه تحـت نـور القمـر بإرتهـاجـه=ألماسـةٍ مـن فوقهـا النـور وهــاج
وإن أشّـر اصطبـه وحمّـر زجـاجـه=جمر ابدويٍ من تحـت حامـي الصـاج
فـي وقفتـه تيـه وفخـر وانبـلاجـة=صاحب سمو في حفل تخريـج الأفـواج
وإن اشتغـل مالـه ضجيـج ولجـاجـة=همسـاتٍ بشهـر العسـل بيـن الأزواج
ياطـا الوعـر مابـان فيـه ارتجـاجـة=كنـه علـى موكيـت ماهـوب مطنـاج
وإن شاف في الخـط السريـع ازدواجـه=يشلـع كمـا حـرٍ علـى الصيـد نفّـاج
هـذا هـوى اللـي ضايقـاتٍ افجـاجـه=يلعب بـه الهاجـوس مـع كـل منهـاج
نصّـه حزامـي فـي نهـار المـواجـه=بحر الصخا والجود في غـرب الأفـلاج
ملفـاك قصـرٍ للضـيـوف ابتهـاجـة=يلقـى بـه العانـي مسـرات وإبـهـاج
فـي مجلسـه للعـود الأزرق عجـاجـه=ولاحـطّ لأبـوابـه قـفـولٍ ومــزلاج
مـن جـاه عمسـانٍ يكيّـف مـزاجـه=بـريّـةٍ فنجالـهـا وصـفـة اعــلاج
ولاقلـط الا مــن غـوالـي انعـاجـه=حيلٍ شحمهن في الصحـن لـه تمـواج
ودرّ البكـار الـلـي غـزيـرٍ نتـاجـه=يالله عسـى ذوده مـن الوسـم ثجـاج
بـحـرٍ تـلاطـم بالمـكـارم أمـواجـه=مافكـر بحجـم الخسـايـر والإحــراج
وإن قيل من هو ؟ قلت : شعري سماجة..=إن ماذكـر عمـي ذرا كــل محـتـاج
(عمي خلف ) لاجـا الزمـان انعواجـة=بـإذن الولـي عنـده مفاتيـح الإفـراج
سمـح الجنـاب اللـي طليـقٍ احجاجـه=عوق الخصيم وللخوي ضحكـة احجـاج
جينـا لـه أيـتـامٍ بفـقـرٍ وحـاجـة=وافـرش لنـا البيـداء زهـورٍ وديبـاج
ظــل ظلـيـلٍ ماتمـايـل اسـيـاجـه=حطـه لنـا رب البشـر درع واسـيـاج
عقـب الزمـان اللـي جرعنـا هماجـه=نشرب قـراحٍ فـاض مـن بيـر هـداج
بأبـثّ مدحـي لـه علـى كـل مـاجـة=وأرفع له البيضـا علـى روس الأبـراج
لـعـل يـفـداه الــردي والدجـاجـة=ويفـداه فـراجٍ مـع اعـيـال فــراج

.
.

فراج بن فهد آل تركي

ويلوموني بعد لاقلت شاعر منتدانا لا والله شاعر شباب الدواسر كلهم ..

والله مالي مصلحه حتى يقال أني أجامل لكن الله وهبنا عقول نميز بها

الذهب ودنينه والنحاس ورنينه ..

عموماً يبو فهد كل عام وأنت بخير والله يطوّل عمر العم خلف آل تركي الشكره

ويمتعّه بالصحه والعافيه ووالله أن الواحد يعتب على ألي مثلك بسبب الأنقطاع

عن المنتدى لكن يوم تباشرنا بمثل هالقصيده أنك تلجمنا ويضيع عتبنا بلجة بحورك

وفرحتنا بتواجدك

تقبّل أعجابي بأفكار ومعاني ومفردات وسبك قصائدك وبشخصك الكريم ..

 

 

 

 

[معلومات العضو فراج بن فهد آل تركي]

المشاركة الأصلية كتبت بواسطة كلاش

ويلوموني بعد لاقلت شاعر منتدانا لا والله شاعر شباب الدواسر كلهم ..

والله مالي مصلحه حتى يقال أني أجامل لكن الله وهبنا عقول نميز بها

الذهب ودنينه والنحاس ورنينه ..

عموماً يبو فهد كل عام وأنت بخير والله يطوّل عمر العم خلف آل تركي الشكره

ويمتعّه بالصحه والعافيه ووالله أن الواحد يعتب على ألي مثلك بسبب الأنقطاع

عن المنتدى لكن يوم تباشرنا بمثل هالقصيده أنك تلجمنا ويضيع عتبنا بلجة بحورك

وفرحتنا بتواجدك

تقبّل أعجابي بأفكار ومعاني ومفردات وسبك قصائدك وبشخصك الكريم ..

أخوي كلاش

والله أن كلامك لحاله أزين من قصيدي

واللي يلومونك لاحطيتني شاعر منتدانا أو شاعر شباب الدواسر
ترى معهم حق وأنا أخوك

فأنا رجل أقول الشعر هواية وليس احتراف , ولا أحب أن أدخل في مقارنة
أو تنافس مع أحد في مجال الشعر , بل أن لقب شاعر يضايقني في كثير
من الأحيان .
ومع هذا فلا أنكر أن للشعر إيجابياته التي أهمها بالنسبة لي أنه
وسيلة للتعبير عن مواقف وأفكار ومشاعر قائله , ووسيلة لتقديم
شيء يكسب رضاء وإعجاب الرجال خصوصاً من أبناء العمومة أمثالك .

فثق ثقة تامة أني أعتبر دائماً قصائدي متواضعة إلا فقط حينما أتذكر
أنها تلقت إشادة من أمثالك الذين لهم في الشعر خبرة ودراية .

تقبل من أخيك وافر الشكر والتقدير والإمتنان .