استفسار عن الجــــــــــــــزلا وما دار فيها من احداث

[معلومات العضو العماني]

المشاركة الأصلية كتبت بواسطة ابو خطاب الحطيم

السلام عليكم ورحمة الله وبركاته

الاخ سلطان مساك الله بالخير

الجزلا عد للحرارشه من الرجبان وحصل عليها هية بين الرجبان وال عليان ولحقت بفزعة من القبلتين والهيه الاولى على الحرارشه خص وعلى راس الدندان واللي حضرها في اليوم الاول 16 او19 يوم الدندان يقول في عرض القصده والله مافي الجزل زودا على تسعة عشر والقصيده طويله ولا اريد ذكرها حقيقة لأني لا ارى ان تذكر مثل هذه الاحداث القريبه
المهم ان الجزلا الى الان وهي للحراشه وعليها بركة ماء ومكينه

ولكم تحياتي

اللهم اغفر للمسلمين والمسلمات والمؤمنين والمؤمنات

اللهم انصر المجاهدين في سبيلك في كل مكان

اللهم كن لأخواننا المجاهدين في فلسطين

جزاك الله خير يابو خطاب على التوضيح وهذه قصيدة الدندان يوم هيتهم هاذي :





عبدالله بن محمد بن حزيم الحرارشة الرجباني ( رحمة الله عليه )
الملقب ( الدندان )


وقال الدندان :

صبحونا طلعت الشمس وانباج السفر = في جموع ٍ ماعرفنا نعد احسابها
ثم زهمنا صلب جد ٍ يسوون العبر= خبرة ٍ كنهم أسود ٍ تعض اشنابها
مخروا سود من النيل سبلات النظر =مدبحات ٍ كن سود الحنوش رقابها
واشتبك شوب اشهب الملح وابليس ٍ حظر = وكل مدغوش ٍ يمينه على مقضابها
والله مافي الشبوا زود ٍ على خمسة عشر = واقعدوا ناس ٍ جموع ٍ تسن احرابها
نطحوهم مغرب الشمس والوارد صدر = وعاف منها عقب ماذاق سو اسبابها
ذا لعينا شمخ النيف حسكات الوبر = الفطير اللي تشادي الجريد رقابها
والله ان تسند مع الجوب لازاف الزهر = وان تعدي (جبجب ٍ) وانت ماترضابها
يانديبي وارتحل حايل ٍ فج النحر = حرة ٍ لا روّحت يعجبك صلاّبها
صوب صبيان (آل زايد) بمردود الخبر = سرهم بالعلم لاجيت ياركّابها
سعد منهم لابته محزمه خزن الظفر = هل فعول ٍ من عصور الجهل يدرى بها
بيض الله وجه من شاف بالعينه حضر = وحقه البيضا تنثر عليه اثيابها

يقول واحد من قحطان أيضا :

ياجاي( ابن حزيم) ترانا بالوعد = (والجزل) من صوب المناشي سايله
ورصاصنا يشبه لدندان الرعد = وناتي على وضح النقا في القايله

الأمير مناحي بن هجرس آل حزيم رحمه الله


ورد عليه الشيخ مناحي بن هجرس آل حزيم الحرارشه رحمه الله :

تهيّض النشّاد من قول ٍ يرد = اللي يقول( الجزل) تراها سايله
لاسالت( الجزلا) فيا ليل السعد = وذا من كرم ربي ومن فضايله
اهلها نصوها مثل مال لا ورد = في كنة الجازا عطاش ٍ حايله
يبغون ديرتهم وجّداد العهد= لا من كسا نور الزهر مسايله
وصية الشيبان حافظها الولد = وصغيرنا تبع لسلم أوايله
ذي دارنا من عصر جدان ٍ لجد = وقد قاله النشّاد في مثايله
قبليها الجزلا ليا خرب تحد = وتنحي على غرس عذوقه مايله
غرس رسخ من غير معروف ٍ لأحد = ومرسخينه بالسيوف العايله
بسيوف هند ٍ مترفات ماترد = ويقعد بها بالهوش بروس ٍ مايله
انشد على ندوان في يوم ٍ يعد = من سيف عود ٍ ورّخت فعايله
مع ظاوي ابن فهيد من قوم القعد = ومن سيف عمي والعيون تخايله
لاخير بهرج يقال بلا وكد = وقول نقوله ترده دلايله
اللي يقول انا لكم عند الوعد = لاجا الوعد ليلٍ ولا في القايله
غره مزاباته ونفاذ العدد = وجمعه على قرنبعه قبايله
هرج القفا مهوب ناموس ٍ لأحد =والزور مايرفع مقامة قايله
شرف مع البرقا عليناهم شرد = وماعاد ذاق الماء ونفسه سايله
عرض على القيعه بليله مارقد = وماردّه الا العنقري ياشايله
ومن غاب منا جعل يطوى باللحد = وياجعل تكسي دركته فعايله
وعين ٍ تبي بنته عساها الرمد = ماتوّخذ بنته وذي فعايله
الموت ماخلى الذليل ليا قعد = دلّه وهو متراكي ٍ في الذايله
ان كانهم يطرون سكّان البلد = فأهلها (وداعين) توطي العايله
حريبهم لاانتهى مارقد = ولاهو بعيد صوب ديرة وايله
التارده من كل مخّاذ ٍ ترد = وان كان ماقلته فكلن ٍ قايله