قصيدة في زواج نايف بن مسرع !!!!!

[معلومات العضو نايف بن مسرع]

[QUOTE=دغش البطي]

أعزائي منسوبي منتديات قبيلة الدواسر الرسمي السلام عليكم ورحمة الله وبركاته وبعد أهدي لكم هذه القصيدة التي تشرفت بإلقائها ليلة البارحة بمناسبة زواج الأخ والشاعر العزيز الغالي : نايف بن عبدالمحسن آل مسرع المساعرة في منطقة الخرج والحقيقة لقد كانت ليلةٍ من ليال العز والبهجة والسرور وذلك عندما إلتقينا بالأخوة الأعزاء أعضاء وإدارة المنتدى وبني عمنا الغالين كما لايفوتني أن أتقدم بالشكر الجزيل لنايف وأخوانه على ماوجدناه من حسن الضيافة والكرم والتقدير وإن لم يكن عليهم غريباً لاأطيل عليكم القصيدة بين أيديكم .

سلام الله عليكم عد ماذعـذع هبـوب النـود=سلام الدين والأسـلام قبـل الشعـر نبدابـه
سلامٍ كالعسل في مطعمه وأصفى من القرهود=سـلامٍ صافـيٍ مـن خاطـرٍ قـام وتغنابـه
يعم أهل الوفاء وأهل المراجل كاسبين الفـود=عزيزين النفوس اللي لهم قدر ولهـم جابـه
يقوله شاعرٍ مايجهل المنطـوق والمقصـود=على سلم العوارف والمعرفـه رتََـب إكتابـه
على دعوة حليف الجود نايف بأبذل المجهود=عسانا عند إبن مسرع نُجود ونكسب إعجابـه
من الدمام حثيت الركايب والزمن محدود=شفوقٍ خاطري في طرقتي لمواجه أحبابـه
بغيت مشاركتكم في الفرح ياكاسبيـن الجـود=عسى ربـي يُوفـق مـن تـزوج ويتهنابـه
وعساكم ياأهل الفعل المشَرََف والفخر في زود=وعسى درب السعادة صوبكم ماينقفـل بابـه
وعساك العز ياحفلٍ على سآس الشرف مـشدود=يُحاضونه رجـالٍ للوفـاء والجود كسَابـه
رجالٍ تكسب المجد العـلا وأفعالهـا سنـود=مداغيشٍ تحوش الطايلـة والطيـب تشقابـه
رجالٍ في المواقف سِلْمها ماتقـرب المنقـود=شغاميـمٍ الرجال اللي لغالـي الـروح جـلاَبـه
فعايلهم تنومـس ربعهـم وتُزعـل الحسـود=من الوقت القديم اللي مضى والطيب تحضابـه
بني عمي سند رآسي ليا من صك عود بعود=وإليا منََه كشـر وجـه الزمـان ودار دولابـه
سلايل لابةٍ تنشـاف لامـن قـوَس البـارود=مواقفهم نهار الحرب بين النـاس يدرابـه
مساعرةٍ تُضد الضـد لامـن قادهـا المقـرود=عزاويهم تروََع خصمهـم ويضَيـع إحسابـه
هل الوقفات والفزعات لامـن دبَـر الشـرود=هل الصولات والجولات يـوم النـار شبَابـه
مُتيهة العشاير للطرف يوم البـرى مـردود=دبشهم كل ماطاح الحياء في القفـر يرعَابـه
عيال صهيب إبن زايد أُسودٍ في اللقاء وفهود=عطيبين الضرايب قاضبين المـدح بنصابـه
وحنا اليوم ننعم في بلدنـا والرخـاء ماجـود=تحت حُكم الزعيم اللي حكمنـا وإرتضينابـه
زعيم العدل والأحسان والكف الصخى الممدود=زعيم الدار وأهل الدار والأسـلام وأعرابـه
أبو متعب زعيم الطايلات اللي عليها شهـود=توشَح بالعلوم اللي تنومس وأتعـب إركَابـه
عذاب المعتدين ومزبن المحتـاج والمظهـود=حكيم الرآي والمنطوق نجـمٍ فـوق حرََابـه
عسى أيامه طويله بالمعزه والفـرح وسعـود=وعساه بخيـر والصحـة ترفَـل دوم بثيَابـه
ولاننسى ولي العهد لاجـارت علينـا السـود=لنـا سـدٍ منيـعٍ مـن الأعـادي ونتذرابـه
أبو خالد صديق المجد كسََاب الثناء المعهـود=مواقيفـه تشرفنـا ودرب الخيـر يسعـابـه
وعسى ربي يحفظ الديرة اللي بالوفاء تُجـود=ديارٍ تحت حكم الشـرع والتوحيـد وكتابـه
وشعبٍ لأجل حب الدار والأسلام صار جنـود=تحت رهن الأشـارة لادعتنـا الـدار ثلاَبـه
وأبختم مابديته يالنشامـى كاسبيـن الجـود=عسى ربـي يُوفـق مـن تـزوج ويتهنابـه

«®°·.¸.•°°·.¸¸.•°°·.¸.•°®»

محبوب الجميع الشاعر الغالي ( دغش البطي )
الكتابة عن شخص مثلك أو الكتابة عن قصيدة لمن هم في مستواك أمر ليس بالسهل
على أحد ... ولكن لا أقول إلا :
لقد تشرف الحفل وأهله بحضورك وحضور الأخوان الغالين اللي جاو معك من الشرقية
ومن المناطق الأخرى ، كما تشرفنا جميعاً بالأمسية الشعرية اللي كنت أحد فرسانها
والشعراء الآخرين اللي كانوا بجانبك على المنصة.
فلك ولكل من حضر نقول : بيض الله وجيهكم وأطال الله أعماركم على طاعة وعسى
الله يقدرنا لرد علومكم الطيبة في مناسباتكم السعيدة المتكررة بإذن الله.
وتقبل مودة ومحبة وتقدير أخوك الصغير _ (( نايف بن مسرع ))

«®°·.¸.•°°·.¸¸.•°°·.¸.•°®»