قبيلة الدواسر حاضرة وبادية تنعي فقيدها الأمير عبدالرحمن بن أحمد السديري

[معلومات العضو ممدوح بن سلطان السديري]

وحي الضمير

يا جرح قلبي كيف ندله وننساك=ما تنسى يا مدهل الغانميني
حنت معاليق الحشا فقد لاماك=أحن وجذب في حنيني ونيني
يالشيخ يا وافي الخصايل بكيناك=يا كثر دمعن فاض من موق عيني
يا من لك الدنيا بكت مر فرقاك=يبكيك هذا الكون دنيا وديني
العقل والأخلاق زادت مزاياك=فيك الوفا والجود متخالطيني
عنك الردى بعده بعد السما ذاك=بعد السما عن ساكنين البطيني
لبست تاج العز والعز يزهاك=تاج الشرف يا طيب الطيبيني
عز الرفيق وعز من هو تنصاك=يفرح بك اللي من زمانه حزيني
كم من سجينٍ راح عتقا لحسناك=ياما طلقت من السجن من سجيني
الطيب لهل الطيب مثلك وشرواك=فحول الرجال أهل الوفا الأوليني
الطيب ورثك مار فعلك بيمناك=عساه بالفردوس هاك اليميني
تفخر جزيرتنا بذكرك وطرياك=بكل الجزيرة لك محاسن تبيني
محاسناً تنبيك من فعل يمناك=يمنى تزيل هموم عجف السنيني
ما ملهدن البيض مثلك وشرواك=ولا شفت أنا بالكون مثلك بعيني
خال الأسود اللي رفيعه سجاياك=غيثن على الإسلام والمسلميني
يا الله يا بو فيصل عسى الخلد ملفاك=عساك جار لسيد المرسليني
يا لله عسى الجنة مقرك وتلقاك=عساك مع لابرار والصالحيني
لعل طوبا هي مقرك ومثواك=بجاه من له بالحرم ساجديني
يا رب ياللي كل حيا ترجاك=علام بالخافي وباللي يبيني
عساك بالفردوس تغفر خطاياك=قولوا معي أمين يا السامعيني
وعزاي للأسرة وربعك هذولاك=وعزاي للحضار والغايبيني
وعزاي للي تذرف الدمع سفاك=على أبو فيصل تذرف الدمعتيني
يا غافل الدنيا ترى الموت يقفاك=لا بد ما يأتيك يومن يقيني
الموت ما خلا النبي لا عدمناك=الموت حق وكلنا ميتيني
لو طالت أيامك ترى الموت يلقاك=هذي دروبه هادم اللذتيني
الله يا بو ماجد من السو يحماك=أنت العوض بأبطالنا الراحليني
وكل السدارى عزنا لا فقدناك=جميعهم تاجن بعالي جبيني

الشاعر : عوض بن محمد الزقيحان (أبو طلال)