بالقاف أسلي خاطـري كـل ماظـاق=خواطر(ن) تنبع من اهجـوس ضيقـه
مثايل(ن) مع داجـي الليـل تنسـاق=أولـه لهـا ولـه القلـوب العشيقـه
أسس قواعدها علـى بيـض الأوراق=وابني عليها مـن البيـوت الغميقـه
من شأن من يطرح لها السمع يشتاق=ونقادهـا مـا أبغـا يجيلـه طريقـه
ماكل من ينطـق يقـال إنـه نطـاق=يحكـم عليـه إيـلا تكلـم نطيـقـه
ولاكل رمـاي(ن) يقـال انـه تفـاق=ولاكل صيد(ن) من قنص لـه يعيقـه
وإن جيت بوصف من التواصيف مالاق=بحث(ن) عن إعجاب الوجيه الطليقـه
أختـرت مايطـرب رفيعيـن الاذواق=ومـن الزلـل حصنتهـا بالحقيـقـه
حقايـق(ن) ماهيـب تحتـاج ميثـاق=تشهـد لصحتهـا العقـول الوثيقـه
عن ما تشوف أعيوني مـن التفـراق=فـي سيـرة الدنيـا وطبـع الخليقـه
وأبدى وأقول الطيب من فضل خـلاق=ومـن لاوهبـه الله يظيـع طريـقـه
والناس ترفعها المراجـل والاخـلاق=يوم الـردي كسبـه عـداوة رفيقـه
رجل(ن) يجي لقرابـه اظـلال ورواق=تجذبـه للطيـب الاصـول العريقـه
ورجل(ن) يلامن طاب طيبه تلصمـاق=مثل السـراب يـزول عجـل بريقـه
ورجل(ن) مجاله بالثنا يشرق إشـراق=ورجل (ن)كما جمة قليب(ن) عميقـه
ورجل(ن) نظر عينـه رفيـع للآفـاق=ورجل(ن) عيونه في الأمـور الدقيقـه
ورجل(ن) براسه من الصواديف دناق=يروغ منها لـو تجـي فـي شقيقـه
ورجل(ن) يلا نشفت من الحمل الارياق=يشيل حمـل اللـي عجـز لا يطيقـه
والبلشـة اللـي مـا تلهمـد بلـزاق=اللـي لخـو مـره رحـول ووسيقـه
اللي لربعـه حرقـة اكبـود وإرهـاق=خلقـة وبـا ماينعـرف لـه طريقـه
اللـي علـى طـرد المقفيـن شفـاق=ومن كثر هرجه بالقفا نشـف ريقـه
وإذا درى ان الوضع قـرب التوهـاق=جوده ومجهوده يجـي فـي طقيقـه
مايدري إن له في المطاليـق معـلاق=يحشم جنابـه لجـل حشمـة فريقـه
حلو اللسان اللي مـع الوقـت بـواق=مـا أشبهـه كـون العبـاة الرقيقـه
هذا لك أفضـل بيـع جمعـاه بفـراق=من قبل تصبح منـه كبـدك حريقـه
أخي الغالي/ الشاعر الكبير/ عبدالله بن مرضي الجماعين ،،
عز الله إنك أسعدتنا و ونستنا الله يونسك ويسعدك بالعافية،،
صح لسانك ،، و لاهنت على القصيدة الجزلة من شاعر تعجز العبارات والكلمات أن توفيه حقه في شعره العظيم التي تدل على طيب راسه وشخصه النبيل.
بيض الله وجهك،، وتقبل تحيات أخوك ومحبك في الله/صالح الجعيدي