السلام عليكم ،،، القصيدة جزلة و أعجبتني ،،، قلت أنزلها لكم يالنشاما ،،، عسى أن تنال إعجابكم ،،
الحق مايزعـل زحـول الرجاجيـل=وكل على ما قيـل مـن دون حقـه
ومادام لي حق عن الحق مـا اميـل=مهما لقيـت مـن التعـب و المشقـه
الرجل ودك حـزة الضيـق حلحيـل=وبعض الموافق مـا تعامـل برقـه
ماني بمن يرضى على النفس تذليـل=من الذل ما ارضى لو بمثقـال بقـه
ولاني بمن يركض ورى القول والقيل=ولاني من اللـي لاخـذا العلـم بقـه
ولا التفت لحقوق غيـري ولا اعيـل=والثوب نستـر خملتـه مـا نشقـه
والراس راس ولا يعود علـى الذيـل=و الذيب ينهش باللحـم مـا استرقـه
والكدش ما تحسب ليا عـدت الخيـل=ولا يجبـر المسمـار كـود المدقـه
والشمس نور ونورها يجلـي الليـل=والنـار تبـدا بكـل مـا تستـدقـه
والجدي مرجع والعرب عشقها سهيل=والنوخـذه يفهـم بغـبـه ورقــه
والكيـف هيـل ودلتيـن وفناجيـل=وبـن ونجـر لا نضـا البـن دقـه
من شب له من نور غيـره قناديـل=يستـر علـى نفسـه قبـل لا تعقـه
من صد من غيضه عساها تساهيـل=نقضي ولا نتعـب ورى كـل نقـه
يزعـل وترضيـه الليـال المقابيـل=وان كانهـا بالحـق حنـا نحـقـه
والا فانـا ماجـاه منـي بهـاذيـل=وكانه زعل مـن موقفـي يستحقـه
يشد حيله بالزعـل كـان بـه حيـل=وفي طوفته لاضـاق راسـه يطقـه
ما همني لو فصل الهـرج تفصيـل=نجـم عـلا مـا كـل عيـن تحقـه
اشره على بعض الرجال المشاكيـل=ما ميـزت مـا بيـن جلـه ودقـه
والا الخبـول اللـي تـرد الأقاويـل=الكـل منهـم منتـه وسـط رقــه
يا جاهـل كثـرة عليـك الغرابيـل=من الشوايـب ضايـع الفكـر نقـه
اتعب على كسب الرجـال الحلاحيـل=والا الردي له عرض الأكتاف لقـه
وقت الرخا يعجبك بالحـط والشيـل=من السطر يرقص علـى كـل دقـه
يذبح ويصلخ فـي كـلام وتضليـل=وينهار لا من اشهـب الوقـت رقـه
الرجل ما يخـدع بزيـف وتمثيـل=ولا يخاوى كـل مـن كـان عقـه
عليك باللـي يفهـم العـدل والميـل=اليا حصل عن جـور الايـام وقـه
ينفعك لا صكـت عليـك المحابيـل=هذاك حطـه فـوق راسـك ورقـه
القصيدة للشاعر سعود الردعان الهاجري،،،
وتقبلوا تحيات أخوكم "آل جعيد الدوسري"