انا احمد الله مسلم(ن) وسعودي= ومعرّب(ن) من ساس ابوي وجدّي
ماهي مشاكل لا مدحت جدودي= المشكلة لو قلت ما احد(ن) قدّي
طولة ولد عمّي وزوده زودي=وارفى خماله كان هو متردّي
والعزّ والناموس تبغى شهودي=ما هي سواليف(ن) تجي واتعدّي
ان ما استوت من فوق متن الجودي=وامست مع جدي الشّمال اتقدّي
ولاّ كما نفد(ن) تلوفه نودي=الصبح يشمخ والضحى ينهدّي
الله يظلّل شجرة آل سعودي= الشجرة اللي ظلّها ممتدّي
لا عادك الله يالليالي السّودي= يوم الجهل واسلوبه المتعدّي
اليوم في عيشة رخا وامهودي=في ظلّ سيف(ن) ما برد له حدّي
يا نفحة الدّين الكريمه عودي= ويا لفحة الجهل الكريهه هدّي
بعض العرب تفكيرههم محدودي= في باله انّه بالعرب متغدّي
زين السوالف والجميع اقعودي= ويا شينها وان عوّدت للجِدّي
ان الفتى من قال : فعل اعضودي= ليس الفتى من قال : سوّى جَدّي
والكامل الله ربنا المعبودي= ولاّ الخلايق بين جزر ومدّي
ادعي الولي في خلوتي واسجودي= ما اشكي على غير المهيمن سدّي
يالله دخيلك لا سكنت لحودي= ما غيرك احد من العذاب ايعدّي
سنّة محمد والكتاب احدودي= وما خالف النهج القويم يردّي
عهد مضى في مبرمات اعهودي= ما غير ربّي والنبيّ انبدّي
وان ميّلتْ دنياي عن مقصودي= ما مال عن سرج العقيدة شدّي
وعليكم السلام ورحمة الله وبركاته
الشاعر الكبير تأبط خيراً
الحقيقه أن غيبة اللي مثلك وشرواك تزعجنا كثيراً
ونحن إفتقدناك في الأيام الماضيه وندعو الله عز وجل أن يكون المانع خيراً
ولنا عتب عليك وهو عتب محبة على غيابك اللذي لايسرنا
ولكن على ماقال من طول الغيبات جاب الغنايم والحقيقه جبت الغنايم
قصيدة فوق التقييم وفوق الوصف لاعدمتك
فلقد إستمتعت بقرآءة هذه الفاتنة والمليئة بالحكم والجزاله الشعريه
فهنا الحبك الشعري والسبك اللذي يأسر القلوب
وقصيدة واقعيه جداً وهي قمة ومن شاعر قمة خلقاً وشعراً
فصح الله لسانك وإعتلا شآنك دنياً وآخره
وأدام الله عزك وشموخك
تقبل الود والتقدير والشكر والعرفان لمقامك العالي ولاعاد تقطع فينا
طالت حياتك على عز وطاعة
محبك ومغليك " دغش البطي "