السلام عليكم ورحمة الله وبركاته
قصيدة للشيخ شالح بن هدلان أتمنى أن اكون وفقت في نقلها ..
أمس الضحى عديت روس الطويلات
هيضت في راس الحَجَا ما طرا لِـي
وتسابقن دمـوع عينـي غزيـرات
وصفقت بالكف اليميـن الشمالـي
جريت من خافي المعاليـق ونـات
والقلب من بين الصناديـق جَالـي
واخوي يااللي يم قارة خفـا فـات
من عاد من عقبة بيستـر خمالـي
ليته كفانـي سـو بقعـا ولاَ مـات
وانـا كفيتـه سـو قبـر هيالـي
وليته مع الحيين راعي الجمـالات
وانا فدنلـه مـن غبـون الليالـي
واخوي يا للي يوم الاخوان فـلات
من خلقته ما قـال ذالكـك وذا لـي
تبكيه هجن تالـي الليـل عجـلات
ترقب وعدها يـوم غـاب الهلالـي
وتبكي على شوفه بِنـي عفيفـات
من عقب فقـده حـر مـن الدلالـي
عوق العديم إن جاء نهار المثارات
والخيل من حسه يجيهـن جفالـي
لكم فائق احترامي وتقديري