السلام عليكم
وش حالكم
هذي قصيده للامام تركي بن عبد الله ال سعود ومن اقوا واجزل القصايد اللي مرت علي وافتريت في المنتديات فوجدت القصيده غير كامله وغير مرتبة الابيات فحبيت انزلها لكم كامله مرتبه مع قصتها وهي
ان الامام تركي ارسل القصيده هذي لولد عمه مشاري بن سعود في مصر بعد ما راح وتركه في حروبه
وكان وقت روحته لمصر ترك الامام تركي في وسط الحروب الطاحنه بين الامام تركي واعدائه وقيل انه اسير ( مشاري في مصر ) وبعد ما زانت الامور تذكر مشاري وكيف حكم نجد ويعلمه عن خويه الاجرب ( السيف ) وعقب ما حكم نجد والقصيده ابلغ من ان اتكلم او اشرحها
طار الكرى عن موق عيني وفرا = وفزيت من نومي طرالي طواري
وابديت من جاش الحشا ما تدرا= وأسهرت من حولي بكثر الهذاري
خط لفاني زاد قلبي بحرا= من شاكي ضيم النيا والعزاري
سريا قلم وأكتب على ما تورا =أزكي سلام لابن عمي مشاري
شيخ على درب الشجاعه مضرا= من لابة يوم الملاقا ضواري
ياما سهرنا حاكم ما يطرا= واليوم دنيا ضاع فيها أفتكاري
أشكي لمن يبكي له الجود طرا= ضراب هامات العدا مايداري
يا حيف يا خطو الشجاع المضرا=فى مصر مملوك لحمر العتاري
من الزاد غادله سنام وسرا=من الذل شبعان ومن العز عاري
وش عاد لو تلبس حرير يجرا=ومتوج تاج الذهب بالزراري
في دنياك يا بن العم هذي مغرا= ولا خير فى دنيا توري النكاري
تسقيك حلو ثم تسقيك مرا=ولذاتها بين البرايا عواري
اكفخ بجنحان السعد لاتدرا=فالعمر ما يا قاه كثر المداري
مافى يد المخلوق نفع وضرا=وما قدر الباري على العبد جاري
واسلم وسلم لى على من تورا=واذكر لهم حالي وما كان جاري
ان سايلو عني فحالي تسرا=قبقب شراع العز لو كنت داري
يوم ان كل من خويه تبرا=حطيت الاجرب لي خويي ٍ مباري
نعم الرفيق الى سطا ثم جرا=يودع مناعير النشاما حباري
رميت عني برقع الذل برا = ولا خير من لا يدوس المحاري
يبقا الفخر وانا بقبري معرا=وافعال تركي مثل شمس النهاري
أحضنت نجد عقب ماهى تطرا=مصيونه عن حر لفح المذاري
وانزلتها غصب بخير وشرا=وجمعت شمل بالقرايا وقاري
والشرع فيها قد مشا واستمرا=ويقرا بنا درس الضحى كل قاري
زال الهوى والغى عنها وفرا=ويقضي بها القاضي بليا مصاري
وان سلت عن من قال لى لا تزرا=نجد غدت باب بليا سواري
ومن أمن الجاني كفا ما تحرا=وتازي حريمه بالقرايا وقاري
واجهدت فى طلب العلا لين قرا=وطاب الكرى مع لابسات الخزاري
ومن غاص غبات البحر جاب درا=ويحمد مصابيح السرى كل ساري
وانا احمد اللي جاب لى ما تحرا=واذهب غبار الذل عني وطاري
والعمر ما يزداد مثقال ذرا=عمر الفتى والرزق فى كف باري
وصلاة ربي عد ما خط بالرا= على النبي ما طاف بالبيت عاري
وعسا ان تنال اعجابكم
ومع الف سلامه