السلام عليكم ورحمة الله وبركاته
هذي مساجله بين والدي حفظه الله /شافي بن خلف النتيفات
والشاعر /شافي بن راشد النتيفات
ارجو ان تنال على رظاكم واستحسانكم
يقول شافي بن خلف |
يالله ياللي جميع الخلق تلجاله=ياعالم ظاهر المخلوق والخافي
طالبك ليل(ن)علينا ينشي خياله=نوه عروض وبرقه له تكيشافي
قام يتراكم ربابه ويترافا له=الشرقي يقهقره والوبل هتافي
سيله يطم الوطا وان جا العتش شاله=يرعد ويبرق وكنه يقهقر خلافي
سيله يدك الهمل من في مقياله=بكور وسم يعم المملكة ظافي
ويخظر شجر(ن)هشيمه طول امحاله=في قدرته يصبح المرظان متعافي
ويبدل الله من حال الى حاله=لاقال كن كان بين النون والكافي
وسيل الركا ينسف عتاشه على جاله=حتى يجي للنصي في الجفره حفافي
وحول على الجله واسقى الدحي وحباله=حول عليها قنيف نوه اردافي
حتى يملي كموم العرق وهجاله=من عسعس(ن) للرواشن نبتها زافي
يزوف عشبه وبعض الخد ماجاله=كون ام سالم تجر الصوت غطرافي
والخير لاكثر كل(ن)راح في فاله=الله يظفي علينا ستره الظافي
ويعز لسلام بابن سعود ورجاله=حكامنا نصرته من ماض لسلافي
ومن مات منهم عسى الفردوس منزاله=امين وامين من قلب لهم صافي
والحي جعل السعد والنصر يبرا له=بجاه من حج بيت الله واطافي
وبرسل لبوشالح من عندي رسالة=شابت بيوتي وبسندها على شافي
من رقم جوالي ارسلها لجواله=ان رد ولا فنا مبدع وعرافي
يقول منهو تهيض وانشرح باله=له ماقف في الشعر عن كل ميقافي
انقا جزيل الشعر واخلي هزاله=واغرف بحر واقطف من الورد لانافي
هاظت شجوني وشعري زانت احواله=والقاف ينساق الى منه لقا قافي
لاشاب قافك ياشافي عندي اكماله=اسوق قاف مع اهل العرف ينشافي
ياشاعر شعره يمثل له ارساله=وافي وقاف يقوله يعتبر وافي
لو ان الاعلام يدري عنه قد جاله=واله الفخر لانصاه لركبه يظافي
ويجيه لو يدفع الاعلام من ماله=يستاهل اللي تعنا لجله وطافي
لكن ذالوقت ياشافي تهياله=ناس غثيثة ومنهم صار ينعافي
منك انتعلم وذكرك دوم يثناله=انا اشهد انك لغرس الجود قطافي
يابو خلف جاك قاف يشعب جماله=احوال الامه تراها مالقت رافي
مايلطف الا ولي الكون بظلاله=والناس ماهيب لاترحم وتنخافي
ندعي ولكن وضع القلب يبغاله=توبه وذل ورجوع وخاطر صافي
ندعي وفينا الحسد والحال يرثاله=والغل في قلوبنا تمكن وحافي
ولاعراض خلق الله المعفين قتاله=ويحط منهو ردي في منزل سنافي
ياوضع ياللي معاد اليوم يسواله=وضع تغير ولكن قول ياكافي
يالله بغيث ليامن هل هماله=وبله حقوقا يسيل كل محرافي
ويخف راع الحلال الشره برياله=عقب القحط والغلا وتجميع الاسلافي
وتدعي وانا ادعي وكل يدعي قباله=لدارنا اللي نعيش بظلها الدافي
الله يعز الوطن ويقدي رجاله=حكامنا اللي علينا خيرهم ظافي
والمعذره يارفيقي واختم القاله=قاف كتب رد من شافي على شافي