السلام عليكم ورحمة الله وبركاته وبعد أقدم لكم هذه القصيدتين للشاعرين بخيت بن محسن بن حفيظ الشكرة ومجاراة من الشاعر عيدان بن راجس الهوامله البادي الشاعر بخيت ويقول :
ياراعي البل كان تبغي المماراة=عليك باللي صنقره كنه حاروب
أذنيه نصبٍ ماتعوَد لعلباه=ترى رخاوة الأذن يابدو عذروب
ومنين مادرته تعجبك حلاياه=خده عريض وغاربه كنه مسلوب
قافٍ سمعته جرني للمجاراه=من شاعرٍ ركز معانيه بإسلوب
كلامٍ أحلى ماقريته وبأقراه=وألذ ماشفته على الطرس مكتوب
بخيت بن محسن بداه وتنقَاه=خلاَ الشوايب وإنتقى كل مرغوب
الطيب ورثٍ له وكسبٍ ليمناه=ولايزله من المواجيب ماجوب
سمعوني أقرأء منهجه وأتهجاه=وقالو مجارى منهجه منك مطلوب
قلت إسمعوْ ماصاغه الفكر وأنشاه=وصخَر شواردها على طرق مسحوب
ياراعي البل كان تبغى المماراه=إشتر فحل ماربط في السوق مجلوب
أسود إسنادٍ يشعف الورد ممشاه=دايم مع الأول مولَع ومرعوب
زينه إليا روَح بعيدٍ معشَاه=مستتبعٍ له من المعاشير جندوب
كن الوروك صحون صينٍ مجفَاه=متنه عريض وغاربه سيف شنصوب
مافي إرقبته من اللحم ماتمرواه=كنه إيتناوشله نباتٍ بعرقوب
وأذانيٍ فوق العواتق مساواه=كافور فرخٍ مابعد جاه لاهوب
والخشم فارع والمهادل مدلاَه=ومنين ماجيته إلا مايلٍ صوب
يلفت نظر من شاف عظمه وماطاه=من وسع صدره مايجي فيه شاذوب
بنته لها صدرٍ وسلفٍ ومثناه=تظهر لو إن البوش حوبٍ ورى حوب
وساعٍ بواهرها نظيرٍ مساواه=وسنامها في مدفن الورك مصبوب
ويسمحلي اللي بعض الأوصاف ماأرضاه=ماكل شاعر للتواصيف موهوب
وسلامتكم جميعاً
محب الجميع : دغش البطي