سلام ياللي كنت احسبنك سلاحي لااعتزيـت
.. ذخري ليا ساقت علـي المعظـلات سنينهـا
جاك الشعر يحمل مشاريه العتب مع كل بيت
.. قصيـدة سببـت معناهـا وسبـك حينـهـا
اليـا رجعنـا للحقيقـه والله انـي مادريـت
.. ابطيت ادور خوة الطيـب ولا ادري وينهـا
جرحتني جرح لو اداوي جروحـي كمبليـت
.. في ذمتي ذمـه ماتبـرى علتـه مـن بينهـا
لو ان دمع العين بيخفف من الصدمـه بكيـت
.. الله يقدرني على زيـن الظـروف وشينهـا
بس ابشر اني ياضعيف الراي فوق اللي هقيت
.. ولا خير في نـاس بدنياهـا تضيـع دينهـا
اذا حلقت الدقن قلطنـي عليهـم بيـت بيـت
.. وان ماحلقت الدقن مكرمهـا مانيـب اهينهـا
المعذره ناظرت وجهي فالمرايـه واستحيـت
.. مانيب مثـل اللـي يباريهـا ويلطـم عينهـا
فلاح القرقاح