ياعاشقين الهرج في ظهر الانسان=وياللي تحبون الحديث وسماعه
ودي اسمعكم كلامٍ بميزان=ميزان هرج ومايزن به بضاعه
هرج القفى ياناس شرٍ وبهتان=واكل اللحم فالغيب خبث وقلاعه
راعي الحكي تلقاه شفقٍ وولهان=نمّام يفرح بالحكي واجتماعه
وجهٍ ودر بالحقد والبغض مليان=خساسته شيٍ يعشق اتّباعه
عندي دلالة حق والحق نيشان=درب السنع مايستوي والبشاعه
لاصار لك مشروه والرجل غلطان=واجه شجاعٍ مايعيش بقناعه
خل الحكي والثرثره عنّك يفلان=الزم طريقٍ يرفعك باتباعه
واللي رسم دربه على درب شيطان=وش فايده مادام صعب اقتناعه
ودي ابينلك كلامٍ ببرهان=يللي لسانك آلةٍ للطباعه
انا علومي مثل همّال ودّان=مانيب ورعٍ مافطم من رضاعه
رجلٍ واميز بين عدلٍ ونقصان=ولانيب مهبولٍ عنى الوقت صاعه
اخاوي اللي يشبه الذيب سرحان=كل المراجل عادته في طباعه
اليا زهمته قال انا سيف شامان=خويي اللي سيف عزٍ وطاعه
ماهوب مثل اللي تخبّى ولابان=يوم ان وقت الضيق صعبٍ رداعه
لاهوب حاسدني ولاهوب منّان=ولاهوب مثل اللي كذوبه متاعه
ناسٍ تراها لكن الشكل شتان=الشكل طيب لكن القلب باعه
فالشر يحكيبك وفالخير غيران=ناسٍ عملها بس نشر الاشاعه
ياهيه انا قد الحمل فوق الامتان=عين العدو تاجد بعيني مراعه
فارس بن سالم ومن صلب دبلان=وابوي قرمٍ من خيار الجماعه
من لابةٍ يشهد لها طول الازمان=اهل الكرم والجود واهل الشجاعه
شجعان لامن صار للحرب ميدان=نرّث على كبد العدو الفجاعه
خضران لاغار المعادين خضران=عصاة حرب وفالمغازي سباعه
صبينا فالحرب قرمٍ وفتان=لاسل سيف الحرب يطرب لماعه
بينتنا قولي على خير برهان=ياللي تحبون الحكي واستماعه
وياعاشقين الهرج في بعض الاحيان=كفّو القذى ياعاشقين الاشاعه
وختامها صلوا على خير انسان=محمد اللي خصّنا بالشفاعه
وسلامتكم .. اخوكم/فارس بن سالم بن فارس الدبالين
الله يسلمك ،، قصـــيده رائعهـ في كل بيت من أبياااتها ،، صـــح لساااانك
واعتلى شاانك ...
احــــترامي وتقديري ..