بسم الله الرحمن الرحيم
هذه قصيده قلتها رثاءٍ في الشهيد النقيب/ ضويحي بن سعود الصخابره يرحمه الله
وهذا اقل شي نقدمه له
سبحان من يعلم خفيات الاسرار = عالم نوايا الخلق محصي عددها
له الشكر تبجيل واجلال واكبار =بأمره سمك سبعٍ وسبعٍ مهدها
مستنسخاً مانعمله سر وجهار =واللي زرع فيها بخير حصدها
ياجنة الفردوس يادار الابرار =اعلا المراتب فاز منهو صعدها
من باع نفسه في رضا والِ الاقدار =انا اشهد ان نفسه تحصل سعدها
عساك يابو سعود بجنان وأنهار =ونفسك تحصل عند ربك وعدها
ارخصت روحك يوم عج الدخن ثار = وضرب القذائف مثل وابل وبردها
وغطا خضار الجو دخان وغبار = مخيلةٍ تمطر ويرزم رعدها
وردت حوض الموت بعزوم واصرار= وردة شرف تكتب المنهو وردها
أكبر عزانا موتة العز والكار = بدلتك دفنت معك داخل لحدها
حرٍ تسلسل من مواكير الاحرار =شقر الحرار اللي ينومس هددها
يوم الجهل ومصافق اسيوف ومهار= وخيلٍ تنير وخيل تعطيك يدها
انا ورثنا المجد شيبان وصغار = قبيلة يزهى المكارم ولدها
اولاد ابن صخبور وافين الاشبار =من فعلهم لاعدا تموت بكمدها
دواسر في الحرب يهدون الاعمار =في ساعةٍ يفخر بها من شهدها
ارواحهم دون الوطن ستر وجدار =ماغيرت ليام صادق عهدها