[معلومات العضو نمر بن الأشيب]

	السلام عليكم ورحمة الله وبركاته هذة قصيدتين ... مجاراة بين الشاعر الأمير محمد الأحمد السديري والشاعر الكويتي مرشد البذال رحمهم الله جميعا .. أضعها بين أيديكم .. لعلها تحوز على رضاكم أرسل الشاعر الأمير محمد الأحمد السديري قصيدة للشاعر مرشد البذال وكانت مملوءة بالحكم والنصائح وقد أرسلها مع الشاعر بندر الضحيك المطيري قصيدة الأمير محمد السديري يالله أنا من جود حسناك طالبك = عفوك ومدك حيث ما انت بخيلِ يا الآدمي دنياك هذي تعذبك = لوطفت فيها ما لقيت الدليلِ كل على مذهب امامه يخاطبك = يبيك من زايد ذنوبه تشيلِ اليا عصيت أهل المذاهب تعاتبك = كل يقول ابيك يمي تجي لي لو انتحيت بعيد بالسو تطلبك = وكل بصاعه من ذنوبه يشيلِ احد يصحح لـك حديثـه ويرهبـك = واحدٍ يقـول الحـق عنـدي نزيلِ واحدٍ يخيفك فـي كلامـه ويدبـك = ابليس يضحك له وهـو مستشيلِ الناس عوجـان المناطـق تكذبـك = عن الصحيح الكذب معهـم بديلِ ان مارضيت بقولهم نِتِف شاربـك = تكبـر ذنوبـك لوغنـاك تهليلِ ناس على درب الفضيلـه تحاربـك = وعلى دروب الشـر تهـذل هذيلِ دروبهم عسرات عـوجٍ وتتعبـك = مـا تستـوي لـك لا ولا تستوي لي ينبيك عن دنياك ماضـي تجاربـك = وعزي لحالك كـان عزمك قليلِ اتبع نبيك واتـرك اللـي مجنبـك = واقضب مماشـى سنَتـه لا تعيلِ اللي بغار النـور للرشـد يندبـك = وابوبكـر عنـده نديـم وخليلِ نصايحـه للرشـد حـذرا تغايبـك = هرجه صحيح وكـل فعلـه جميلِ سنـة نبياً للفضيلـه تقـربـك = المصطفـى مالـه شبيـه وعديلِ واحذرك عن نقالة السـو تقربـك = ومن يتبـع العايـل لـزوم يعيلِ لوانت ما تغضب ترى الناس تغضبك = عقـب المعـزه يجعلونـك ذليلِ وترى رديَ العرف للعيـب يجذبـك = وتصير لدروب الـردى لـه عميلِ وبنت الرَدِي حذراك حذراك تعجبـك = احذر تصير لمثـل هـذي حليلِ وعن ما يعيب النسل عرَب مناسبك = عليك في بنت الحصـان الاصيلِ يجي ولدها تفتخر به قرايبك = وياقف في وجه الخصيم القبيلي ان كبْرتْ القالات بالفعـل يعجبـك = ويبْردْ همومك كـان قلبـك غليلِ مثل القطامي فـي طياره يشببـك = والدَم مـن مضراب كفـه يسيلِ إن كان ما صلبين الاريا مكاسبك = تراك بيـن النـاس تبقـى هزيلِ ترى دروب الخبث يالعبد تذهبـك = يفوت عمرك ما تحصـل حصيلِ ومعاشر الخايب مع الناس بذريك = وتصبح قليل الميـز عقلـك هبيلِ ومعاشر الطيب على الطيب يجلبـك = يرقيـك للعِليـا بـظـل ظليلِ لا تقرب الأجرب بالامراض يعطبـك = ويصيرجسمك مثل جسمـه عليلِ ممشى الخنامن صافي العقل يسلبك = ويصير لـك يـمْ الرذيلـه سبيلِ وعن مارد الانذال نـزه مشاربـك = اشرب نظيـف لـو وارده طويلِ ليَاك تنسى بين الاجواد واجبـك = واللي يريد المجد حملـه ثقيلِ يا الآدمي وان كان كثْرت مصايبك = ازبن على محـي ا لبـلاد المحيلِ ازبن علـى ربَ بعرشـه يراقبـك = وناجه وبعـد العسـر يسرٍ جليلِ ناجه ولاجل ارضاه وجـه ركايبـك = وخلـك لـعـلام السراير دخيلِ وهوالذي ينجيك من كـود صايبـك = ويذريك من كربـات هـولٍ مهيلِ يا العبد مكن عنـد ربـك مقاضبك = فكـر وقـدَر وانتـبـه لاتميلِ ولحدٍ عن الخلاق يالعبـد حاجبـك = هـو الـذي مـدَه وعفـوه جزيلِ وهو الذي فيما فعلتـه يحاسبـك = وهو الـذي بـارزاق عبـده كفيلِ واحذر يا ابن حوَا تطمـن لحاجبـك = الا لــربٍ للخـلايـق يـزيلِ اللي بعفوه عن عذابه يراقبك = وعينه لكـل الخلـق دايـم تخيلِ في لوحه المحفوظ يا العبد مذهبـك = نزَل بحق وكـل مـا بـه فضيلِ وقد رد عليه الشاعر مرشد البذال مجاريا بقصيدة ذكر فيها طبيعة البادية وأهلها وخصالهم الحميدة وقد أرسلها للأمير مع الشاعر سعود بن نوطان قصيدة الشاعر مرشد البذال لاعدت يارجمٍ ضحى اليوم مرقبك = قعدت في راسك نديمي سِبيليْ تنسف علي من الذواري هبايبك = قامت خليات الفجوج اتهوى لي يارجم شوش خاطري واستهاض ابك = يارجم من كثر الطواري إبدي لي اسباب عدٍ في شعيبك مطانبك = عدٍ نعرفه يوم طربات جيلي ياعد ابسألك عن اللي خبرت إبك = قد شفتهم بالعين ربي وكيلي واليوم أشوفه داير جوَك الشَبك = خرب معاطينك سواقي النخيلِ يا عد وين اللي نزل في مساهبك = وين الضعون النازلة والرحيلِ وين الجهام اللي خلوجه تحن ابك = ليا ضيعت مفرودها هوْدْ ليلِ وين النزيل اللي قطينه مقطبك = الفجر حسْ نجورهم له صهيلِ وين المهار اللي فزعها يطربك = ليا ناص صياح الضحى بالشليلِ ليا قال يا اللي ماكرْ العود ناتبكْ = يومٍ به العريس عاف المقيلِ ركبوا على قبٍ سِطرهن يشاغبك = جنَك إلصياح الضحى بتعجيلي قال الزهوف إيصف لنا قبل نضربك = ايتقدم لين ربعي تجي لي قال افهك الصايب خصيمك مقاضبك = قبل الفزع يكمل فلا تحتري لي يومٍ طابور المشاهير حاط ابك = ناباه أمير الخيل قلبه وغيلِ يا راعي البل قل لنا وش مهربك = صبرٍ على هالحال ماله ضويلِ قال العقيد فلان زارك وهازبك = يقول ذقها يا ميبس صميلي عندك حلايبنا واخذنا حلايبك = هذا بدال العام يوم تغزي لي تلاحظوا كل يقول امش ويش ابك = كل تجند سيف ماصٍ صقيلِ راحن مثل جول القطا اللي معجبك = حجَم عليه الوقت جلع محيلِ يا عزتي يا اللي جوادك تجول بك = متعطلٍ غلَق عليه الشبيلي لحقوا هل البل يا معزَل كسايبك = كل يدوَه يا ام ديك اشبحي لي عيناك يا بوشٍ جذبنا تحطبك = خلجٍ تعزل للسهوم اتعزيلِ يا زاير الملعب حضر من يلاعبك = في ملعبٍ صوت الفشق له عويلِ من بينهم شوف المعارك يشيَبك = في ساعةٍ ما كل من طاح وِِِيْلي لا عدت يا يومٍ عجاجك يطير ابك = ياما هفا به من طريحٍ دحيلِ وليا هرب خطو الوليدة من الدَبك = الصبح باكر عشْقِته تستقيلِ تقول ودرَ يا مدهنَ ذوايبك = لا واخسارة كدنَي لك ثليلِ إن كان ربعك باللقا ما تهوش ابك = انا حليلة من نخاه التويلي يحول يا سلم القديمين ما اصعبك = من لا عرفهم شك في وزن جيلي يا عد هذي كلها من سبايبك = ذكرتني واشقيت من يصطبي لي مرحوم يا جيلٍ رحل نستعز ابك = ما ظن يرجع دوركم مستحيلِ واليوم يا هل وقت يا وش نقول ابك = قولٍ بلا برهان ما ينحكي لي لولا البعض يا وقت طيبة مطيبك = مثل الرسوم اللي لمدحك دليلِ ومصارعينٍ راعي الكذب والهبك = ناس طلبها السعسعة و النقيلي عندك يحش بنا وعندي يحش بك = الله من شين العمل يقتضي لي ليا حضر قدام وجهك يلبلبك = تقول هذا الحق منه يهفي لي وليا ذهب علق سهومه بغاربك = فهق زناده معلقٍ بالفتيلي من خان امانه بعده عن مناصبك = لو يمتزح قدمك سوات الثعيلي قل له عداك الخير عقلي يشك ابك = لو انت تجهد بالعمل واتعدى لي تراك لو عييت ما هو بغاضبك = اليا قلت له تعبير بنت الصليلي لا تامن الغدار غدره يشقلبك = يرميك وسط البير شين الدغيلِ وليا عرف في وسطها دق منكبك = وقف على راسك يهت النثيلِ ان كان ذربات النصايح تفيد ابك = ابنصِحِك كانك لمثلي تسيلِ رابع فهيمٍ للفهامه يدربك = عارف وحيالٍ لمن كان حيلي اليا عطيته غايتك ما يخون ابك = يصير لك في مشكلاتك زميلِ ولا ردي العزم ماهوب ثايبك = لا يعجبك لو شفت جسمه جثيلِ ان كان زول النصر كبره يهيَبك = تراه زوله مثل زول الرجاجيلي والخبل وسط المحتضر لا يداعبك = خل اللغى بينك وبينه قتيلِِ عن كلمةٍ قدام الاجناب تشذبك = تصير صبغٍ ما محاه الغسيلِ وختامها يا راحمٍ نستجير ابك = مولاي تغفر زلتي وتعفي لي العرابي