ياسعود مانمنا من الغبن يومين
........ ياسعود تكفى بالحروف غبنتني
ياحروفها ياسعود عن الف سكين
........ منقوعة بالسم كره طعنتني
يوم طعنتني قلت للجرح اهلين
........ أهلين بطعون الغرام وحشتني
يالله حبيبي عجل الطعن ذا لحين
........ يالله تخير بين صدري ومتني
ياليتها يوم طعنتني طعنت زين
....... وياليتها بطعنة قوية ذبحتني
تبي تذل القلب ياسعود وتهين
.......ماتدري أنها فوق فوق رفعتني
ماقابل الشينه أبد يوم بالشين
........ ومارمي بيوت الناس لو هي رمتني
ولو ماترد الصاع ياسعود صاعين
........ ماكانت اللي من البنات أعجبتني
ياسعود أهل العشق والله مساكين
........ أسأل نجوم الليل عني عرفتني
ياما سهرت بجنبها تشتكي لين
........ تطلع خيوط الشمس ثم تركتني
وأفرح لها لمن غفت قرة العين
........ وأزعل اذا قالت همومي أسهرتني
ياسعود اهل العشق والله مجانين
....... مجنونها ياسعود لو هي كرهتني
تدعي علي ياسعود واقول آمين
........ وأدعي لها يا سعود كل ماصدفتني
ولو بشتكي ياسعود بكتب دواويين
.......بشكي حروف الشوق ليه حرقتني
وياسعود وصل له من القلب بيتين
........توصل لقلب الي بهواها سبتني
الجرح دين وينقضي لو بعد حين
........وانا مسامح جرحها اللي عطتني
ومانالني مما جرى كود ثنتين
........أني أنغبت ومن منامي حرمتني
مما راق لي