[معلومات العضو فارس الدبالين]

بسم الله الرحمن الرحيم

السلام عليكم ورحمة الله وبركاته ,,

اخواني ,,, مساء/صباح .. الخير

اقدم لكم هذه المتواضعه واتمنى ان ترتقي لذائقتكم الجزله

وهي مجاراه لقصيدة شاعرنا الكبير خالد بن مدعث

اللي مبداها يقول:

ياحمامه كفّي الله لايجزاك خير = من صلاة الصبح وانتي تجرين النياح

ابومدعث حاكى الحمامه في قصيدته الجزله وانا جاريته محاكيآ البحر

وانا قلت القصيده وانا (ماسك خفاره على البحر) في جده ,, حبيت

انوه ولا اطيل عليكم اليكم القصيده التي اعتبرها (من القلب للقلب)

.. اقول :

يابحر لاعادك الله ولا يجزاك خير=من صلاة العصر تصفق وموجك مستراح
ماتقدّر من على الجال يشكيلك عصير=كل ماتصفق بموجك تصافقه الجراح
كان موجك هايجه غبةٍ ماها غزير=والله ان فاقصى المعاليق شيٍ مايزاح
وكانه ابسبة مجرات فلكٍ بك تسير=وسط قلبي يجري الهم ماشاف ارتياح
وكانك ابفقد الجواهر حزين ومستذير=والله اني فاقد اديار قانين الملاح
وكان هيضك القمر لاغدى نوره سفير=والله اني من سميه تعلمت الشحاح
كن همي يابحر سيف وفوادي جفير=وليمتى والحظ ماسل سيفه والرماح
اتوجد من صواديف بقعا واستخير=وجد عودٍ فاقدٍ شوف ذوده والمراح
منجبر في بحر جده على ماقيل غير=واشهد اني كارهه مير مامنّه مراح
عسكري لكن عينّت جحاد الضمير=واقرع النفس العزيزه لكن السد باح
أخدم اديار الشريفين ماهاب النذير=بس حطوني على البحْر ماهيب البراح
سكةٍ مانيب فيها عليم ولا خبير=اهتوي لرض الوسيعه واحب الانشراح
مالي بدار البخاري رفيق ولا عشير=وعفتها لجل ان فيها تحرر وانفتاح
ابغي اللي من كرمهم يعزّون القصير=لابةٍ تاسم عصا الجار وتشيل السلاح
اتصبر واتحرى مناديب وبشير=وادعي الله رب ذالكون يطلق بالسراح
ذي خفايا من غدا هم قلبه له خشير=من همومٍ تارد القلب لين القلب فاح
ويش اسوي يابحر والقدر حقٍ يصير=قسمة الله يابحر حق واطلبك السماح
بس لاتكثر جروحي وانا جنبك خفير=كلما زودت موجك يزيدن الجراح