[معلومات العضو درعان بن عبدالله]

أخواني الأعزءا قصيدة جديدة من قصائد ساقي الورد أتمنى أن تنال استحسان الجميع ويكون لها صدى طيب أخوكم / درعان بن عبدالله بن عريعر بن درعان

ياصاحبي لا تطري البعد كافي = عذبتني لا تطري الموت تكفا
ماهي بعادة جوّي يكون صافي = ويومه صفا بتصد عنّي وتجفا؟
مرات أحس إنك تعرف الخوافي = والنور عنك أحس مرات يخفا!!
ياصاحبي لا جبت طاري التجافي = كنّك تورّدني على جال منفا
كنّك تعرّضني عجاج السوافي = كنّك تحزّ قليبي بحد شلفا
اسقيتني سم الفراق الزعافي = هدّيت حالي واعتلا الحال ضعفا
يابن الحلال ارحم ذبحني شغافي = لا خاطرٍ سالي ولا رمش يغفا
أبي أعيش الحب حد الكفافي = وسفينتي تسكن موانيك مرفا
وأكون لك لو خانك الوقت وافي = وكل الجروح تطيب عندي وتشفا
وان كان ما فاد الحكي بك ،، عوافي = أبشتكيك وكل مشقوق يرفا
أبشتكيك لقصر وهج القوافي = حيث انّه لطلاّبة الحق ملفا
كان أهملو شكواي ،، أباسير حافي = ولا عاد لي شكوى ولا قول حرفا
وكان أنصفوني منك والحق ظافي؟ = بأمشي واقول القصر وفّى وكفّا