[معلومات العضو شافي القويسي المخاريم]

بسم الله الرحمن الرحيم



قصائد مختاره لكبار الشعراء

اتمنى ان ما طرحته يحوز على رضاكم......


1

يالله ياللي تسجد الناس لرضاه=ياوامر(ن)خلقه على حج بيته
تفرج لمن سده على الناس ما ابداه=راضي على مقسومك اللي عطيته
شئ يسل الحال والجسم يبراه=والناس ما يشفون إما شفيته
قالوا سفا بالحال وش اللي أغواه=قلت آه ويش المنكر اللي وطيته
قالوا جهلت وبان علمك لمنهاه=قلت آه علمي ياملا ما كميته
قالوا ندور لك مع الناس حلياه=قلت آه لو غيره بكفي رميته
قالوا تزوج كود تدله وتنساه=قلت آه لو خذت أربع(ن)ما نسيته
قالوا من أقصى الناس وين أنت وياه=قلت آه ما أنسى يوم جاني وجيته
قالوا نشوفه عند هذا وهذاه=قلت آه ما عمره عقب حجر بيته
قالوا عليل(ن)ناقل(ن)داه برداه=قلت آه بأقرابي وروحي فديته
قالوا كثر شيبك وقلبك بعمياه=قلت آه لو قلبي غرير(ن)نهيته
قالوا نشير ولا نفع ما حكيناه=قلت آه هراج النمايم عصيته
يا ناس خلوا كل وادي ومجراه=قلتوا كثير وقولكم ما لقيته

2

يا رب صبرني على أمرك وبلواك=وأجبر عزا من شاف ضيم العزاير
مثل الدريك اللي على حوض الأدراك=يبكي ودمعه فوق الأوجان حاير
يا عين هلي ذارف الدمع سفاك=وأبكي وهاتي ما خفى من عباير
أبكي على حسن النبا زين الأسلاك=اللي عليه مغوزر الدمع فاير
قدم العرب غادي بشوش(ن)وضحاك=والكبد يصلاها لهيب السعاير
كني ربيط الروم في وسط شباك=والا كسير(ن)موجعته الجباير
علي نذر ان ولف الله بلاماك=لرز رايات الفرح والبشاير

3

دعوني اهيم بغبة الغي وحداني=فلا العقل يأمرني ولا العذل ينهاني
اهيم بغبات الهوى مثل من هوى=حثيث على طلب الليالي ولالزماني
لولا الهوى والحب والوصل والرجا=ما صارت الدنيا عشاير وخلاني
الا يا عذولي لو يمسك من الهوى=كما مسني ما كن بالعذل تشناني
اقوله بعد ما زل خمس من الدجى=وانا في لهيب القيظ حافي وظمياني
احسب نجوم الليل ما بان واختفى=فلا غاب نجم الا وانا ارقب الثاني
اجي له الى هرف سنا الليل واندرس=وصارت نجوم الليل كفه بميزاني
فلا طارق يطرق ولا داري درى=حذا من خلقني للشقا عقب عدماني
ادافع صروف الوقت بالعزم والرجا=واجاهد هوى نفسي ونفسه وشيطاني
واصوم وافطر خشية الواش والحسد=لعل الحسود اسباب سوه تعداني
الا ياطلاب الهوى خلوا الهوى=الى صار مكفول الحوادث والاكواني
ما فذ منه الا نجوس تجنست=على صورة آدم والعمل غير رباني
اقوله وانا من ضيقة الراي والجدا=اخيل الحيا واشرب من الغبن غدراني

4

عشقت القمر حيث القمر ينبعث به نور =واخص الليالي البيض تزهاه ويزهنه
واحب الهوى لاهب من خايع ممطور =وريح النفل حيث النفل طيب الخنه
واحب الجمالة والجمالة عمل مبروك =واحب الغناه وعز نفسي عن المنه
واحب الصراحة والصراحة بها مسرور =حيث أن الصراحة تقطع الشك والظنه
واحب الكريمه اللي يفرج عن المعسور =اليا من عطى حتى اهله ما دروا عنه
احب الرجال العارفه واكره المغرور =من اغتر في بعض المظاهر يغرنه
سقا الله ليال ماضية قبل هدم السور =نحفر العدود ونشرب الماء من الشنه
نشوف البنات اليا اوردن كنهم الحور =مهار مشاويلن بالاعياد معتنه
على الماء تشوف بيوتهم كنهن القور =كثير القبايل تقطن العد بالكنه
على البال ذكراها ياليت الليالي دور =ياليت الليالي ما خذنه يجيبنه
تذكرت شيبان لنا يوم حنا بزور =يحثوننا بالطيب والفرض والسنة
لو عاشوا حياة قاسية في بحر وبرور =عسى الله يعوضهم بما فات بالجنة
لو دورن مضى من بينهم وين ذاك الدور =زمان مضى له ذكريات يحلنه
يوم الذهب ما يلبسونه بدون خصور =جمال النسا ما هو من السوق يشرنه
فقدنا حياة البدو مع شوفة المظهور =ولا عاد به بدو ولا الطرش له حنه

5

ألا يا من لقلبٍ كل ما جا الليل جاه خلاج =يلوج ويجتلد بالصدر والعربان ممسيني
انا متحيرٍ ما ادري عن المدخال والمخراج =الا واعمس رايي ما لقيت اللي يقديني
الا يا مجيب دعوة من تصافق قوقه الامواج =أنا بحماك يا وال الخلايق لا تخليني
ألا يا وجْد روحي وجد من خلّوه بالمسهاج =كسير الساق بنحور المعادين المغلّيني
الى من دك هاجوسي ولو اني على ديباج =ولو جَنّي جميع البيض غيره ما تسليني
الا واهَني مخلوقٍ يفرّج ضيقة الادلاج =الى منه دخل بالسوق غادٍ له مياديني
ترى بعض العرب عمْلَه بروحه مثل عمل سراج =يضوي للعرب والنار في قلب المسيكيني

6

البارحة ما هملج الطرف بنعـــــــاس=ما فاض من نجم عيوني تخيلــــــــه
لا باس يا عيني على السهرلا باس =على وليف ٍ فات ما القى مثيلــــــه
عنا قطع شوف المواصل له ارماس=ولا في يدي من ناب الارداف حيلـــه
فيما مضى ياخذ جوابي من الراس=واليوم لا عاني وأنا ما اعني لــــــــه
العشرة اللي ما توثق على ساس=تطيح لو صارت حصون ٍ طويلـــــــــــة
يا ونتي منها المعاليق يبــــــــاس= صبري قضى ما باقي الا قليلـــــــه
صبرت صبر ٍ صابني منه وسواس=صبر له النفس العزيزة ذليلـــــــــــة
على وليف ٍ حال من دونه الياس=والياس طب ٍ للقلوب العليلــــــــــة
من يتبع المقفي مرده للافلاس=مثل الذي بالقيظ يدفق صميلــــــــه
هذي دروب الحب جِدَّد ودراّس= الله يمضيها بستر وجميلـــــــــــــــه
موفق ٍ للخير ياظبي الأطعاس= لا تحسب الدنيا بأهلها طويلـــــــــه
و صلاة ربي عد ما هب نسناس=على نبي ٍ وضح الله دليلــــــــــــــه

7

عفا الله عن عينٍٍ للأعضا محاربه=وجسمٍ نديفٍ زايد الهم شاغبه
أسهر إليا نام المعافا ومدمعي=قدهل مابين النظيرين ساكبه
دع العذل عني يانصيحي وخلني=فشرواك مايرضا هوانٍٍ لصاحبه
شهرت عن الزهدا وهي لي قضيّه=ولا يمنع المخلوق ماالله كاتبه
في كل دارٍٍ للرجال معيشه= والأرزاق كافلها جزالٍ وهايبه
والله لو قلت اخطبو لي فأنني=صبيّ الشقا مالان للضد جانبه
ولاني غويٍٍّ بك ولابي سفاهه=عزيزٍ ولانفسي لدنياك طالبه
اخترت بعد الدار في نازح المدا=ولا قولة (براكات ) قد هان جانبه
وقلت لما اشرفت ذات عشيّه=على مرقبٍ عدا الذرا من مراقبه
فيا مبلغٍ مني ذو المجد والثنا=ومن شب شارات المعالي مكاسبه
مبارك زبن الجانيات ابن مطلب=ذرا الجار والعانين عن كل نايبه
ثم ابلغه مني سلامٍ مضاعف=عدد ماهمل وبل السما من سحايبه
وقل ياحما دن السبايا عن القنا=إليا احمر من عود البلنزا ذوايبه
ويامورد الأسياف بيضٍ حدودها= ومصدارها حمراََ من الدم شاربه
ويازين راعي عوّدةٍ قصرت به=معقّبةٍ في تالي الخيل تاعبه
إليا قل ماء المرزمات واجدبت= وقل الحيا ووقات الأمحال كاهبه
بنيت لنا بيتٍ من العز شامخ=ســل اللــه أن لايهدم الضد جانبه
فإليا نبحت من قريبٍ كلابهم=ودبت من البغضا علينا عقاربه
نحيناك بوّروك المطايا ويممت=بنا صوب فرغٍٍ صارخاتٍ ثعالبه
بيومٍ من الجوزا ومستوقد الحصا=تلوذ بأعضاد المطايا جخادبه
موت الفتا في كل دوٍٍّ سملـّق=خليٍٍّ من الأوناس قفرا جوانبه
في دوّةٍٍ يتيه بها الدليل مخافه=وشجر المفالي طامساتٍ مراقبه
على الرجل اشوى من مقامه بديرة=يعيش بها الغبن فيها مطالبه
فمن قلط الهندي ومن وخر العصا= جلا الهم وصبح نازحٍ عن قرايبه
فقلته على بيتٍ قديمٍ سمعته= وهو مثلما قال التميمي لصاحبه
أذا الخل اورالك صدودٍ فواره=صدودٍ ولوّ كانت جزالٍ وهايبه
وصلوا على خير البرايا محمد= نبيّ الهدا وازكا قريش مناسبه

8

ياهل العيرات بكره كان مريتوا طوارف خلي=خبروه اني شكيت الهم والساموح عقب فراقه
مانسيت الصاحب اللي بالموّده والهوى صافي ليّ=جالي أصفا من غدير (الجلت)وحلا من حليب الناقه
مانسيته يوم أنا أنهل من كما..ذوب العسل واملي=خابرٍ نفسي عيوف ولاتداني عقبه العشاقه
مع ثلاثٍ عارضني صبح يوم العيد دق وجلي=وصفهن ثنتين جل وثالثتهٍن بالوصوف ادقاقه
أنهب الممشا لجلهن مير أهن ماودهن يدنلي=كل ماقربت منهن خالفني وقطعن الساقه
يالطيف الحال غظـّات الصبايا كيف ماياون لي=حملنيّ من كثيب الرمل ملموض وعليه وساقه
صابني منهن هنوفٍ من لماها علتي ودون لي=ودي أصبر مير قلبي من فراقه غاديٍٍّ حراقه
صرت مثل اللي يعبر في زمانه كل حل بحلي=الله أقوى كل عبدٍٍ مشتكا حاله على خلاقه
كن عينه عين شيهانٍٍ ربا بالنايف المتعلي= أو كما عين الغزال اللي يلد أبها على دراقه
جادلٍ تل الضماير في كلاليب المحبه تلي= تل هجنٍٍ في سموم القيض عطشا والشراب شفاقه

9

يالله ياللي بيدك العزّ والجاه = ياللي لخلات المخاليق رافي
يامن خلل عبدك ليا بان ترفاه = ياعالمٍ غاية خفا كلّ خافي
الطف بحال اللي تبهذل بدنياه = وداج بجميع أنحا النحايا وطافي
يطرد ورى حظٍ عليك أنت مشهاه = لاشكّ شاف من الزمان أختلافي
من كثر ماله سارو الناس برضاه = ولو كان ناقص قالو الناس وافي
ومن قلّ مابيده ترى الناس تشناه = لوّ كان يسقيهم عسل قنط صافي
فالمال كمّ ساسٍ طمانٍ وعلاه = والفقر كمّ حطم روابع سنافي
لاشك مال العبد عن حكم مولاه = من خير والاّ شر والرب كافي
ماكتب للمخلوق لابد يلقاه = امّا هزايم شرّ والا عوافي

10

مل قلب فر من شوفة غباشه=فرت الشيهان من عالي ضخرها
من محل مايوافق لي مشاشه=ديرتي يبرين جاذبني خبرها
ياهل المعروف مافيه انخشاشه=تحت نجم سهيل طمع في سفرها
فوق فرت تو ماجاء من قراشه=والمكينه تو مادقت نمرها
منوة المترخص اليا خذ معاشه=كل عين مهندس يعجب نظرها
تشتغل والسلف مايمديه ناشه=والتواير وامن سبة خطرها
صنعت اللي حطته الأفكار باشه=خذ قياس البر عاده في بحرها
باصر بتفصيل تقطيعة قماشه=ماتعدى حدها ولا قصرها
لاضرب له تختخ تمدي دشاشه=قام يطفح مايدقر لها شجرها
وان وطا التغريز يظهر من عتاشه=والتواير مايمس القاع اثرها

11

وجودي على بيت الشعر عقب بيت الطين=وجودي على شوف المغاتير منثره
وجودي على خوة هل الموتر المقفين=وجودي على شوف السهل من ورا الحره
ليا حلوا البدوان وصاروا على بيتين=ومن كان له خل مع ذاك ماغره

12

يوم جيـت البيـت ماشفـت رواد يـرود=مالقيت الا العصافيـر وأشجـار النباتـي
قلت يالجيران هالبيت مـن ذيـر عنـوده=علمونـي بالخبـر والجـواري جارياتـي
قالوا الجيران سافر ولا نعـرف وجـوده=هقوة أنه يطلـب العلـم بيـن الجامعاتـي
وأهله راحوا على موتر(ن) يطوي عمـود=وأنتـووا مصيافهـم بالديـار البارداتـي
قلت وين القاه قالوا من ورى الغربي حدوده=في ديار(ن) ماتعرف البراقـع والعباتـي
أتصل بأنكلترا والمطـار أسـأل جنـوده=ياعسى تلقى الخبر مع مديـر الطايراتـي
قلت يرجع بالسلامه ويوفي لـي وعـوده=وأتمنـى لـه يجيـب الشهايـد عالياتـي

13

اختـار سمحـات الـدروب النظيفـة = اللي غسلها رايـح المـزن برشـاش
يمشونهـا قـوم النفـوس الشريـفـة= اللي ضمايرهـم نقيـة كمـا الشـاش
ابيوتهـم مثـل الحصـون المنيـفـة= ما هي لطير البوم غيران واعشـاش
وإحلالهم للضيـف دايـم مريـفـه = لو رجلهم يسرح ويضوي على مـاش
والرجـل منهـم مـا يخلـي رديفـه = إن ما ت مثله مات وان عاش له عاش
وان مات منهم رجـل عقـب خليفـه= يطعن نحور القـوم ويـرد الادبـاش
يعرف هدف روحه ويعـرف وليفـه = ما يعرف الخونـة ولا هـو بغشـاش
وليـا رزقـه الله بعـذراء عفيـفـة = ايحطها مـا بيـن نونـه والارمـاش
ماهو على الخفـرات يستـل سيفـه = وان طالعوا فيـه الرجاجيـل ينحـاش
حلـو النبـا سمـح المحيـا لضيفـه = ويصير له خـادم مسخـر وفـراش
وان مـد مـا مـدت يمينـه قصيفـة = مدت يمينـه تبهـر الخبـل والـلاش
واليا هـرج تلقـى علومـه طريفـة = ما هـو لهفـوات المناعيـر منقـاش
وان شبت النيـران مـا هـو بليفـة = في ساعة الكربـة سـواي ورشـاش
سده بعيد ولا أحـد يعـرف غريفـه = ولا هو لعرض المكرم العرض نهاش
والشوك في جنبـه سـوات القطيفـة = إن كان ما له بيت مامـون وافـراش
ما يرتكي فـوق الخبـول الضعيفـة = اللـي ليـا حركتهـا قدرهـا طـاش
وان جـا نهـار كـل قـرم يعيـفـه = ما هو ليا ثارت على القـوم رمـاش
الكذب يعرف بيـن الأجـواد زيفـه = والصدق مثل السيف صاطي وحشاش
وصحيفته يـا طيبهـا مـن صحيفـة = ولهـا مـن العقـال كاتـب ونقـاش
حـاز المراجـل والمراجـل كليفـة = الا على اللي كل مـا رامهـا هـاش
وان شاف له من جانب القـوم خيفـة = تلقـاه للخيفـة مهـاجـم وبـطـاش
الصدق والمعـرف والطيـب كيفـه = ويغبش لها مع طلعة الفجـر مغبـاش
للحمل مـا تلقـى جنوبـه صخيفـة = حوله بروق تعمـي العيـن وافـلاش
يصبر على جرحـه ويمسـح نزيفـه = طبه بشبه خير مـن طـب الاحبـاش
ولا هو كمـا سبـع سنونـه ضعيفـة = دايـم يلحسهـا وللعظـام عــراش
وان شاف له في غيبة النـاس شيفـة = ما هو بخبل لاخضر العـود قـراش
دنيـاه لـن صـارت ذلـول عسيفـة = طوع علهـا كـل عاصـي ونفـاش
وان كان قفـت مـا عليهـا حسيفـة = ولا هو ورا هوج المعاصير قشـاش
وان جاع ما وقع كمـا طيـر جيفـة= وان عري ما يلبس سماليل وأخيـاش

14

ألا يالهبوب الباردة عجَلي هبي =على جاش من قامت هواجيسه أتلوبه
أنا مرةٍ أصحى ومره يغيبي =وأسَرح معا كثر الطواري بغيبوبه
ألا يادهر ماهو بحقٍ تلاعبي =وخليتني لمقَرد الخلق لعبوبه
أعبادٍ مغفلها الزمان وتعجبي =يحسبون قل المال فالرجل عذروبه
وأنا قانعٍ باللي علي كاتبه ربي =ومومن بمقدوره وقانع بمكتوبه
ولا أبغى عما الاريا برايه يجربي =وهو ماعرف ماجوب ربي وماجوبه
هذور المجالس راعي المدح والسَبي =وهو بالخلا لو جاه بنتٍ خذت ثوبه
يقولون لي جز من تصرفك وتحَبي =وهي توبتي من مجتمعهم هي التوبه
ديار الوباء من طبها راح متوبَي =وقرَابة الجرباء على الحول مجروبه
أنا عارفٍ منصاي إلا من بدانبَي =وعارف طريقي والذي باتجه صوبه
وأنا أعرف من أعادي وأنا أعرف من أحبَي =وبه ناس لاتعرف ولاهي بمحبوبه

15

آليا جهلت انشد ترى مابها عيب=لا تنخدع للجهل وأنت السبايب
عيب الفتى مافية شك ولاريب=ترك الفروض وقطع وصل القرايب
والعيب ترك ملازمات ألموا جيب=وتبع الردى ومجالسة كل خايب
فالتجربة برهان مافية تكذيب=واليا جهلت انشد من القوم شايب
ولا قول يوجد شايب يعلم الغيب=الغيب يعلم به مدير الهبايب
لاشك يوجد شايب له تجاريب=ومن الدهـر شاف الفكر والعجايب
بيض النواصي جبهته كلها شيب=من كثر ما مرت علية المصايب
قد صارع الدنيا على الخبث والطيب=فالغوص وإلا فوق روس النجايب

16

من عز نفسه عزه الله عن الناس=وانا عزيز وعزتي راس مالي
مانيب من يتبع سواليف بلاس=اعز نفسي عنه وابعد مجالي
مبعد مجالي عن هرابيد الانجاس=اهل الردى ياجعلهم للزوالي
اللي سوالفهم تجي مالها اقياس=افلان قال وقال وافلان قالي
اللي بدون احساس يدفن بلا احساس=لاناشدن عنه ولاقلت غالي
واقول في بعض الرجاجيل لاباس=رجال فاالكلمه وباالفعل خالي
يجذبك باالكلمه معا زين الالباس=وتقول هذى اللي يسما الهلالي
ولانيب اعم الناس والناس اجناس=احدن يحوش الطيب واحدن موالي
النفس تبغا طيب الذات والساس=معرب الجدين عمن وخالي
لاحتاس فكري قلت لاباس ياراس=اذكر فعول مبهرين الدلالي
اللي لهم في ساحة الطيب نبراس=نعم الرجال ونعم ذيك الرجالي
افعالهم تذكر على قب الافراس=يذكرهم التاريخ اول وتالي
نعم الرجال اللي تنومس تنوماس=ياطيب فزعتها على كل حالي
اهل المواقف فعلها يرفع الراس=واهل البيوت الشامخات العوالي
وصلاة ربي عد ماهب نسناس=وعداد ماذعذع علينا الشمالي

17

عليك الفرج ياالله ياحي ياقيّوم =إلهٍ عباده كلها تلفت يمّه
الا يارفيقي والله انه عداك اللوم =انا اللي علي اللوم في ذمتي ذمه
ولكن سامحني ترى العلم فيه علوم =ولا يفرح اللي بيننا ينقل النمه
حصل ماحصل والعبد يصبر على المقسوم =يدور الزمان ويخلف العزم والهمه
طرات الرجل لا لحقه من الزمان هموم =ما يدري بسده كود خيرة بني عمه
وسيع البنايد في الشدايد قوي عزوم =لعظك زمانك شال همّك مع همّه
وانا والله اني ماتهنى بحلو النوم =ورفيقي عليه هموم الايام ملتمه
اشيل الحمل منه واحطّه علي واقوم =مقام يورد مظامي الما على الجمّه
لكن الزمان الشين ظالم وانا مظلوم =على الهون ياللي تمدح الوقت وتذمه
تهب الهبايب والسفن في البحور تعوم =وتقفي بها صلف الهبايب عن اليمه
هبوب تصلفقها وبحر وسما ونجوم =وموج تقفاه العواصيف وتزمه

18

اشغلتنـي ياهـم واسهـرت عينـي=من زرتني والنـوم مايدخـل المـوق
لازارنـي همـي وبـيـح كنيـنـي=خذيت لي لا هـود الليـل طـاروق
امـا اِلعبـه مسحـوب ولا هجينـي=من ضيقتي ماهو من الوله والشـوق
ياحسرتي ياما مضـى مـن سنينـي=والله يستر لايجـي الطـاق مطبـوق
اللـي مـن الله كاتبـه فـي جبينـي=سبحانه اللي دبر الرزق مـن فـوق
امـن العـدم لـو اتوسـد يميـنـي=في ذمتي ماهييـن نفسـي لمخلـوق
وكرامـةٍ منـهـا تـعـدا يديـنـي=والله ماحظـاهـا ولا اذوقـهـا ذوق
ووالله ماجـي واحــد ٍ مايبيـنـي=لو كان يلحقني من الوقـت لاحـوق
ولاني وراء غرات ربعـي ادوينـي=وادخل على الله ماعرف الغدر والبوق
واللـي ليامنـي زهمـتـه يجيـنـي=باسوق نفسي لابـدا لازمـه سـوق
لـو الحجـاز ونجـد بينـه وبينـي=الاٍ عنـه يمنعنـي المـوت والعـوق
ويامعتـلـي يـااكـرم الاكرميـنـ=ياللي مليـت اجسادنـا دم وعـروق
لوضعي ولسراري وشينـي وزينـي=عهد ً علي لاخلي الصـدر صنـدوق
للناس لـو اسـرار صـدري تبينـي=والله ماتنفعنـي وانـا منـك مزنـوق
ماينـفـع الا فزعـتـك يامعيـنـي=ماهو بشرط كـل مطـرود ملحـوق

19

يا من تشاورنـي وبيّنـت خافيـك=ان قلتلك كلمة صحيـح احتملهـا
لاطالني مـرك ولاذقـت حاليـك=خوّة صدف وقتك جديـراً بأجلهـا
ومن واجب الخوه ابـرك واداريـك=واضغط على نفسي واخفي زعلهـا
ولابد ما تقفـي وغيـري يخاويـك=ويبين لـك نجاحهـا مـن فشلهـا
من خبرتي تـوّك تجـرب مساعيـك=وجديدها ما يخبـرك عـن سملهـا
اصبـر ودورات الليالـي توريـك=وتاخـذ عبـر بحداثهـا وتعقلهـا
لكن انا بعطيـك نبـذه ووصيـك=والباقيـات الله بغيـبـه كفلـهـا
من واقعـك لاتبنـي الا مباديـك=اللـي يجنبـك النفـوس وجهلهـا
ومن الخيال ابـن المدايـن بياديـك=وبعـد البنـا هـد المدايـن بهلهـا
وارفع مقامك لايجي فيك تشكيـك=ثقتـك فـي نفسـك يقلـل زللها
واحذر تجامل واحـدٍ مـا يدانيـك=لوحاجتك دونـه ضعيـفٍ أملهـا
ترى الدسائس بالعمل مـا تعليـك=اختر جـزال سمانهـا عـن هزلهـا
عملك بعيـون الرجاجيـل يحييـك=وان كلفوك بكلمـة الحـق قلهـا
ولاتلتفت للي مضى مـن لياليـك=ما فات مات وقولتـك لـو زلهـا
اللي يفوتك فات غيـرك وقافيـك=امـور وان فاتـتـك دوّر بدلـهـا
وخل الطمع دايم عـدوّك وتنبيـك=دنياك عـن نـاسٍ طمعهـا خذلهـا
رزقك مسجل وانت في الرحم ويجيك=وارزاق غيرك ماتجـي غيـر اهلهـا
كل الامـور مثبتـه عنـد واليـك=وروس القمم ما خلدت من وصلهـا
دنياك لوتضحك بوجهـك تبكيـك=والنفس ماتدري متى وقـت اجلهـا
انصحك لاتركض وراهـا وتغريـك=هـذا رحـل عنهـا وهـذا نزلهـا
اللي يمشي ركـب غيـرك يمشيـك=والباقيـات الصالحـات وعملـهـا

20

ألاجواد واجد والمراجل لها كساب =لكن واعد العشرة ليا صرت جمالي
يطير الشرار وكل نارٍ لها شباب =ومن ولع النيران يصبر على الصالي
تجارب حياتي معجزة وادروب أصعاب =ولقيت الرجال انواع والوان وشكالي
صديق الشدايد ما خذا منك علم وجاب =وسيع الصدر يضحك ولا هو بزعالي
صديق الشدايد لا ينافق ولا يغتاب =يدله غريب الدار ويزين الجالي
وصديق الرخى عقاب ومصادقه عقاب =شجاع الحكي والمدح بالقيل والقالي
وصديق الرخى ما غير صورة ولبس ثياب =يا ليته يبرقع ماله شماغ وعقالي
وعندي نصيحه جد ماقلتها لعاب =أقول الصحيح ونايم القلب يصحالي
ترا خوة أهل الطيب يالطيبين أطباب =يطيب السقيم وخوة الاش سلالي
تغانم شبابك يا بيض الوجه دامك شاب =ترى البدر لو يطلع قمر عود أهلالي
فلا تهجر المسجد وخلك ورى المحراب =ترى روضة المسجد لها منزلٍ عالي
ولا تترك اللي يزهمك خايفٍ مرتاب =ترى الذل ما نجى الثعل با لتحيالي
ولا لندى غير الفدى لو تروح أرقاب =ومن ضاع شوره يا خذ الشور ويمالي
ومن با شرك بالعذر لاتلحقه بعتاب =ولا تشوف نفسك شيخ والناس عمالي
ولا تهين نفسك لو تجي بين ضرس وناب =وهيبتك لا تنقص ولو ربع مثقالي
وبنت الردي لا يعجبك زينها الجذاب =تراها كما المخيال خيل وتخيالي
ولو شفت حمر خدودها وثمان أعذاب =لا بدك تمنى ليت ما جالك أعيالي
ولدها لا ياشاف النقى والملاقى هاب =ذليلٍ بخيلٍ فيه خفخاف وجفالي
أخذ بنت قرمٍ طيبٍ ساسها ما عاب =تنومسك بنت الشبل ويجيلك أشبالي
أعيال الذياب تصير مثل الذياب أذياب =وعيال الثعالب مثلها زهر الاذيالي
وفرخ الصقر مثله وفرخ الغراب غراب =وبوم الخراب ايقابل العش ويلالي
الي صار راسك فوق يا طيب الا نساب =فلا ينحني لقدام رجلين ونعالي
لكن الله اللي يكتب الرزق يا خطاب =هو اللي يفك الباب ويقص الا قفالي
ولا يهمل الا واحدٍِ عايفٍ الاشباب =ولا ضيع أحقوق البشر غير الا همالي
وترى للقصايد كيف والكيف له شراب =وانا ما مشرب الا كيف راسي بفنجالي
ولا طاوع الجاهل ولا جامل النصاب =أقدم يمين الحق واحط معذالي
ولا ني بو الله طيبن له مع من طاب =ومن طاب لي برخص له الحال والمالي
أكذب وانا خابر واجامل وانا كذاب =سنين مضت هي صدق والا يورالي
تلخبط جهاز المخ وانهارت الاعصاب =وفورت دمي وارتفع ضغطه العالي
لكن في رجى اللي من رجى رحمته ماخاب =هو الواحد العالي وهو ربناالوالي
وهو الخالق الرازق وهو المعطي الوهاب =له الملك كله والكمايل والاكمالي
رئوفٍ رئيفٍ رحمته تنقذ المنصاب =يغيث الديار الممحله عقب المحالي
شديد العقاب ويعتق المذنب اللي تاب =عسى ما يوخذنا بسيات الاعمالي
كما قاله الله فصبروا يأولي الالباب =ترى الصبر زين وكلمة الحق تنقالي
واصلي واسلم عد ما تنبت الاعشاب =وما لاح براقٍ سرى يشعل أشعالي
على المصطفى اللي وحد الدين والاحزاب =شفيع أمته يوم الهوايل والاهوالي