[معلومات العضو عبدالرحمن الشرافي]

اخواني الاعزاء ,,,


أسعد الله أوقاتكم بكل خييير ..



أضع بين ايديكم هذه المساجله بيني و بين الشاعر / راشد المسعري

وابدء بقصيدتي اللتي اسندتها له وثماَ برده ..


اقول في قصيدتي ::

الا يا ابن مسعر خيمتك وش جرا بها = اشوف الزمان اشتلها ثم جرى بها
يخر المطر من فوق لا من نزل مطر =والا هبة الصلفا تفتق حجابها
وشفت الديار اللي من اول بها عرب = لا كنها من اول ما وطتها ركابها
وكلن تولى منصبه من ولايته = وعلى الراهي المسمي تجمّع دوابها
خبول العرب شاخت وشاخت رعايها =وضاعت خطاياها وضيّع صوابها
ولا ادري علام الوقت لفة محالته = يا لين العدود أمست تغثرب شرابها
فيا رب من عقب الدهر تنزل المطر = يعم البلاد سهولها مع هضابها
نصاك القصيد من الشرافي يا ابو محسن = ونتنا من أصحاب المعرفه جوابها

فرد علي ابو محسن :

ابن سالم يمكن بصيده صوابها = لكن علومه باعدت عن صوابها
انا مسكني قصرن تذري ركونه= في راس عيطا والردي مارقابها
ماهوب خيمة يصفق بجالها الهواء = ومع دورة الايام تضعف اطنابها
قصرن يروده كل قرمً صميدع = من لابتي والا طوارف اصحابها
الضيف يلقاء به كرامه و واجب= واما العدا ماقد حسبنا حسابها
وبلادنا من فضل الاله عامره = وكم واحدن مبطي نواها وهابها
وخبول العرب نكبه على باقي العرب = و ما ظنتي يوم اللقاء ينغزا بها
والوقت فعلاً فيه لفه ودوره = حكمة اله الكون منشي سحابها
وان عاكست لك يالشرافي مده = لابد من يومً يولي عقابها

وسلامتكم,,,