بسم الله الرحمن الرحيم
أخواني أعضاء وزوار هذا المنتدى الشامخ بإسمه وبرجاله
السلام عليكم ورحمة الله
أحببت أن تكون مشاركتي الأولى قصيده في مدح من يستحقون المدح
عساها تنال إعجابكم
ياقصيدي تزهب والعمر فاني= القصايد دعاني اليوم داعيها
صوب وادي الدواسر فز بحصاني=ديرتي ماسلت مني وانا ابيها
يالله اللي عظيم الملك والشاني=ياعليمن بظاهرها وخافيها
جعل بارق حياك وصدق الامزاني=تامره لين ياتي فوق اراضيها
نوض برقه يسر ويبهج أعياني= والرعد لج صوته في نواحيها
ثم هلّت مطرها عقب الآذاني= مزنةً كل راعي ذود يرجيها
ياخذ أيام فوق الهضب وداني= من جبلها ألين يسيل واديها
لاوصلت السليل صوبها عاني=فز قلبي لها من كثر ماأغليها
دار ربعي وجداني وخلاني= لابتن نفتخر لا حل طاريها
لاد زايد كعام المعتدي الجاني=عزوةً كلنا متجمعً فيها
لابتي للكرم رمزً وعنواني =بيرق الطيب لازمته باياديها
هيه ياللي يغرك راي شيطاني=(إنتبه لايحوس الطين صافيها)
خلك معززً في حدكم هاني=أنصحك والنصيحه لا تخليها
إذكر اللي مضا في غبر الازماني=لابتي ووقعها في اللي يعاديها
ياسلامي عليهم قاصي وداني=عد ماسبحت نفسً لواليها
وياسلامي عليهم عد ماباني=نور شمسً على الوادي ومن فيه
أخوكم: مهدي بن منديل بن جماهر بن وثيله الرجباني
(ضرغام)