[معلومات العضو مبارك بن محيا الدوسري]

أعزائي المرور

نقدت قصيدة للشاعر بكر الركبان في أحد المنتديات فوجدته مسند لي قصيدة موديها على هرش يعارضني في نقدي للقصيدة فرديت عليه بهذه القصيدة ..

أتمنى أن تصل لذائقتكم فترويها.......

مرحبا بالهرش واللي في علاقه=عد ما تنقر من الشّرقي نقيره
تنطح الشّراه بعلومٍ دقاقه=تقنعه لعل له بالأمر خيره
شاعرٍ غنّى لامن الطّرق شاقه=والقوافي مثل سيفٍ في جفيره
أرهف من الموس يا موس الحلاقه=و أصدق من الجدي للعين البصيره
يا بكر و العلم ما ضِِِِِِيّق خناقه =والعوارف كلّ علمٍ تستنيره
و الدّسايس ما لنا فيها سراقه=و إن عجبك العلم والاّ هاك غيره
ما نوصّف بكرةٍ في بطن ناقه=لجل يقنع شاعرٍ راسه شويره
أسمع الجزلات و أعشقها عشاقه=والزّهايف ما لنا فيها بذيره
والقمر ما بدره بيشبه محاقه=والحقيره لا تجي جنب النضيره
إن طلبت القاف يا الشّراه لاقه=جاك قافٍ ما يخسوع في مسيره
يبطي النّقاد ما يلزم شقاقه=كان له في عالم النقاد سيره
ما يحوفه صف هزلٍ في سياقه=و الجزايل كل جزلٍ تستثيره
و الحجج لا صارها هشّه رقاقه=تفلج اللي قادها و تسر غيره
يا بكر جاتك من ردودي ذواقه=ميّز الطّعمة ترى ما فيه شيره
فإن عسرت القاف ما لك فيه طاقه=تبتحل فيها شواعيرٍ شطيره
العراقي مات ما فارق عراقه=يحسب إنّه لا عصا ما جاه طيره
جتك والله أعلم بها ساقه بساقه= ما نلحّفها تحت جنح الحصيره
والختام ..الهرش لا تطلق وثاقه=انحره واختص من جوفه بريره