السلام عليكم ورحمة الله وبركاته :
أبيات متواضعة من الجديد , أتمنى لها بعض القبول :
.
.
.
الهنوف اللي تغيظ المزاييني=في زحام السوق ماداجت اخطاها
ودّعتني في بدايات ( عشريني )= وأتركتني واحدٍ من ضحاياها
قالت : " اصبر ! " قلت : " صبري مخاويني= من بداية رحلة العمر لأتلاها "
ويوم قفّت وأشهب الليل ضاويني=ابتسمت وعبرتي في حناياها
قلت : " روحي في طريق المحبيني=مع مراح مقيط في البير وارشاها
آتسلى وأرجي الله يسليني=والضماير يعلم الله ببلواها
سالفة عشقٍ قديمة تباريني=مامحت الأيام في القلب ذكراها
واستقر الوضع من ( عام الألفيني)=واتعظنا واستعضنا بشرواها
أختها جتني على أول ( ثلاثيني)=في تواصيف الحسن كنها إياها
كنها وضحاً قناها ( ابن قرنيني)=في المزاين يطرب البال ممشاها
مرحباً من ( نجد) ل ( الحايط الصيني)=عدّ ماشفنا الكوراث وعشناها
قالت : " اصبر يا(ابن تركي) لبعديني=اجمع كْنوز الذهب ثمّ عطناها "
وأيّني أجمع مهرها لذلحيني=الله يْكلّل جهودي بلقياها
والعلوم الباقية بين قوسيني=يارسولي قل لها مانسيناها
قل لها أني في ( بلد الإنقليزيني)=جعل همّال السحاب ايتعداها
كلّما برّاقها لاح في عيني=وأرزم الراعد وهشّم رفاياها
قامت العبره تزاحم شراييني=ودّها تظهر وعزمي تحداها
طبعي وطبع الرجال العزيزيني=ماتدلّ دموعنا وين مجراها
الله الله ياظهور البعاريني=ويش جاك مْن الحمول ونقلناها !!
والطموح اللي على الغرب حاديني=(حاجةٍ في نفس يعقوب ) وأخفاها
ليست الثروه وجمع الملاييني=وليست الشهره ولاباهر أضواها
دام ربّي من غنا النفس معطيني=ماترجّيت العباد وعطاياها
وشهرةٍ يقدر عليها المجانيني=استوى فيها أطيب الناس وأرداها
عارفٍ قدري ولا أحدٍ يوصيني=الثقة في النفس شيّدت مبناها
أزرع أحلامي وتزهر دواويني=وأسأل الحاجات من ربٍ أرهاها
وحاجتي لاجاتني فآخر سنيني=قلت : " جعل اللي مضى كله افداها"
والهروج العوج ماهيب تعنيني=أغلق أذني دونها وآتخطاها
لوّه بيسلم من الناس شيئيني=كان سلمت ناقة الله وسقياها
البشر في غيبة الوازع الديني=تحسب المتعة بكثرة خطاياها
.
.