[معلومات العضو كرباج]

.. السـلامـ عليكمـ ورحمة الله وبركاته ..

قلطة بوش وبلير .. (لاتفوتكمـ) ..!!

بلير :

الله لا يجزاك بالخيـر.. يا بوش=ورطتنا في حرب صدام ورطة
عزمتني.. تقول بترول واقروش=بس الحقيقة روحتي معك غلطة

بوش

:

يا بلير ردّ العلم عن بوش بن بوش=الله خلقنا للمقاريـد سلطة
وابوي عنده للرياجيل دنبوش=كم واحدٍ .. شلنا فلوسه ونفطه

بلير

:

أبوك والنعمين .. مير انت مربوش=تموت بالنفط وتحبّ شفطه
صحيح عندك مال وسلاح وجيوش=مير اتوقّع لك .. تدهور وسقطة

بوش

:

يابلير كانك خفت بوم احتمى الهوش=حرام.. ماتاخذ من النفط نقطة
قبلك.. ترى (شيراك) قد راح مكروش=شوفه.. يصـرّح كلّ يوم بمحطّة

بلير

:

وراك.. ماتعطي لشيراك.. عرموش=تراه مشغلنـا.. بشيـله وحطّـه
واليا انتهى موضوعنا.. نرسل اطورش=ونجمع المبلـغ من الربع قطّه

بوش

:

شيراك هذا عنده الفكر.. مغشوش=فرط علي في مجلس الامن فرطه
يـدزّه اليـابـان والصيـن.. ويطوش=ومجهّـز (الفيتو).. لتحقيق الشرطه

بلير

:

يابوش.. انا مرهق وخايف ومدهوش=وانته تقـول الحرب خدعه وخطّه
أسرّاي واسرّاك.. امتلى منهم الحوش=عزّ الله انّه صابني منك جلطه

بوش

:

ما قلت لك كم فيه اذاعات ودشوش=لاتكشف المعنـى.. وانا اقول غطّه
وان قالوا انّا (علوج),واصحابنا جحوش=ماهمنا (الصحّـاف) واللي يحطه

وسـلامتكمـ يالربع ..!!
عساااهـا جازت لكمـ ..!!

اخوكمـ/ محمد (ابو القوافي)