[معلومات العضو نايف الفصام]

سلام يا حب(ن) عليه الدهر مال=سود الليالي بالحقايق صريحه
سبحان منهو بدل الحال بالحال=من بعد سجات القلوب الصحيحه
مالت موازين العداله باالآمال=وانهد ركن الحب وأعلن مطيحه
حاولت في عهد(ن) طوى القيد وانزال=لا شك مدات الزمن جت شحيحه
يالله يامعبود يارب ياوال=تجعل خواتمها علينا مليحه
أنت الفرج للي شكى ضيقة البال=ياجالي هموم الزمان القبيحه
لاجيت منا زلزل خطاي زلزال=وان جيت منا للكدر هب ريحه
حاولت فيها حلول ما هيب تنحال=غيمة حزن هاضت سببها القريحه
إثر الموده هم سم(ن) وغربال=قلوب أهلها دووم منها جريحه
جرح بقلبي بين الأضلاع نزال=ياما لحقني منه صيحه وصيحه
يالله دخيلك قد حداني على الجال=أنصح لحال اللي طلبك النصيحه
وانا ادري أن القلب ماهوب جوال=تدخل شريحة ثم تلغي شريحه
مشاعر(ن) ماهي على الكيف تنشال=ولا هي لغير مودها مستبيحه
وختامها حب(ن) عليه الدهر مال=مرحوم ذاك الحب والله يبيحه