الله مـن قلـبٍ غـدا فيـه ولـوال=سبـة رفيـقٍ معدنـه لـي تجـلاّ
جيته وانا مشفي على راحـة البـال=واثره سـرابٍ كـل مـا اجيـه ولاّ
ماجيته اطلب لي من اموالـه ريـال=ولا ريد يفرش لي على الـدرب زلاّ
وما ابغي يصفصف لي اباريق ودلال=وضوٍ سناهـا مـن حطبهـا تعـلاّ
لاذي ولاهاذيـك وان رحـب وقـال=وثنـى تراحيبـه وحـيـا وهــلاّ
لا ما خدعني ضحك سـن وتبهـلال=وان جات حـزة وقفـتٍ لـه تـولاّ
والله ورب البيـت ماهـوب رجـال=من لا تواجـه لـه مـع رجـال ذلاّ
والله لو هو طيـب العـم والخـال=وربعه عن اللاهوب والشمس ظـلاّ
ماينفعـه لاصـار ماهـوب يحتـال=حمل المراجـل وان حملهـا تخـلاّ
ماهو غريب يميل غصـنٍ الا مـال=طبع الغصون تميـل وايضـا تـدلاّ
ويبقى الجبل مابين وديـان وجبـال=ثابت يشيل الحمـل لـو مـا يشـلاّ
لو هو قصير الطول يرسي ويحتـال=عالـي وكـل اللـي رقـوه اتعـلاّ
وياللي تلبي كل مـا سـرك الحـال=وليـا تعسـر قلـت آسـف وكـلاّ
الله ولا نفعتـك يـا خايـب الفـال=بابطي وانا ما دست عنـدك محـلاّ
لولا الرحم والوصل واحشم لي رجال=لاقطعك يا رَجلٍ عن الطيـب ضـلاّ
للشاعر مشبب العاصمي