السلام عليكم ورحمة الله وبركاته
اليكم هذه القصيده التي أتمنى أن تنال لو على ذره من أعجابكم
أنا البارحه ضايق وأغني وأجر الصوت =طرت لي طواري غايبه كنت ناسيها
وأشوف الليال المقبله كنها تابوت=ولد النظر فيها وأنا منسجم فيها
أبي نعمة النسيان ولا سيوف الموت = ترا النفس ضاقت والبلا في محانيها
وترى الضيقه اللي نازعت قلبي المكبوت=أطرق لها المنكوس يالله تعديها
وهذا من صدودك يابو شفتين التوت=عليك المدامع دمها بعد صافيها
تجمّع لي الاحزان وأجمع لك الياقوت=وحارب جميع الناس لجلك وأجافيها
تهيمن على قلبي سبب غيبتك طاغوت=يجرجر عروقي بالموده ويلويها
بعد زينك / في عيني جميع البنات سحوت=ولا من طريتي قلت : فدوة مواطيها
قدم سحرك الطاغي تدهور عقل وبشوت= وعلى بيتك الخطّاب تحفي خطاويها
وأنا العاشق الهايم وانا الفارس المنعوت=أعسف المشاعر في طريقك وأعنيها
ولقيت الهجر بارد وأنا ما عليّه كوت = وشبيت صدري نار والشوق يدفيها
ما دام الوصل حبله غدا بيننا مفلوت =سلام ٍ على دنيا المحبه وأهاليها
ويوم الوداع اللي أبتدى وأنتهى بسكوت=لا ما تبعتك بس خطوتك أراعيها
وسلامتكم
الشاعر / عبدالرحمن بن دعس الشرافي