البارحه جفني عن النوم طاير=عقب العلوم اللي على القلب تصلاه
من شن لجا في خافيات الضماير=اسبابها شيخ ٍ تقافت مطاياه
اميرنا وقت الامور العساير=من حدته سود الليالي تنصاه
مرحوم يامعطي الحقوق القصاير=جاره على نفسه حقوقه مبداه
كريم يذبح نابيات الفقاير=ضيفه على جزل الكرامات عشاه
يمناه جزله مايمد الصغاير=مــضرين جزل العطايا بيمناه
شيخ ٍ وفعله شايفه بالبصاير=هادي بن زابن وهاذي سجاياه
ياما عطانا من جداد الغماير=توه جديداً مابعد بان ممشاه
وغير المواتر طيبات الحراير=وخيل ٍ على خيل الصحابه مسماه
وكم فك مسجون ٍ عليه الحضاير=فكه من اللي يطلبونه ونجاه
يالله عساه يفوز يوم الحشاير=بجاه منهو تسجد الناس لرضاه
انعد فعل من هل الطيب صاير=فعل ٍ جميل راعي الطيب سواه
ماني بمن يجرى بفعل النكاير=من بار بالحسنا عسى الله يبلاه
فعل الشرف عند الردي من الخساير=ليت الردي يقعد وحيد ٍ بدنياه
الموت ليته لي شوير ٍ وشاير=نفداه باللي يبغي القلب فرقاه
يالله ياعالم خفي السراير=ياعالم الجهرى وعالم خفاياه
محيي العظام اللي هميد ٍ نخاير=سامع دبيب النمل في ليل ظلماه
منشي الخيال اللي يشق الزباير=يمطر على قبر الشجاع برفاياه
تنبت على قبره زهور وبذاير=بجاه الكريم اللي على الناس حسناه
هذا وصلوا عد من حج زاير=على النبي في كل وقت وطرياه