ياللي فرح شوفك كما صبح الأعياد = تكفى تريّث لاتعجّل خطاويك
القلب من دونك على الهم منقاد = عايش على جمر الغضى في تحريك
والعين من دونك بها حرّ وقّاد = تشكي عليك وتشتكي لك وتشكيك
لاااعاااد صبحٍ خاليٍ منك لاعاااد = قلبي تدكّه عاسرات الدواكيك
وشلون تطري لي تواديع وبعاد؟! = وشلون تشرح في عيونك واياديك؟!
دام انك الراحه وشربي مع الزاد = ياكيف قلّي في سهوله بأخليك؟!
كانك تجي بعناد بآآجيك بعناااد = وكانك تبي عمري فلك عمر مغليك
اللي تبي سمّه ترى جاك منقاد = أزعل جميع الخلق لجلك وأراضيك
لانيب لاشاكي ولانيب نشّاد = دام ان همّي في حياتي يسلّيك!؟
عسى الهموم بداخل القلب تزداد = وعسى بجوفي همّ ناسك واهاليك
انا فدى عينك وانا دوم رداد = عنك المصايب في رحى الوقت حاميك
يازين ياغيمٍ نشى فوق الأشهاد = هلّ المحبه في صحاري محبيك
لاتستمع في قول حاسد وحسّاد = ولا يهمّك هرج ناسٍ بتغويك
يازين ياوجدي عليكم توجّاد = شخصٍ تخاوى مع قرومٍ شرابيك
يوم انتصف درب السفر ليلهم ساد = قالوا نبي نمسي ولا عاد يمديك
وامسى الفتى مابين حامد وحمّاد = واصبح وقالوا له ترى الشيخ يدعيك
قام وتنهض ثم توجه لمدّاد = لقا الخبر ضاقت عليه المساليك
قالوا له انك للرديات قصّاد = ياكيف يامسلم تردى هقاويك
قال الخبر؟! قالوا من عصور الاجداد = العار عار ولازم إنّا نجازيك
ياكيف تبغي كشف عورات الاجواد = ياكيف تسمح بالخيانه مباديك
حاول يبرر موقفه بس مافاد = قالوا له انك ناويٍ بنتنا ذيك..
لكنّ ربك كاشفك قبل الاعداد = والشكر لله والي الكون واليك
يومك غدرت وللمواجيب جحّاد = نبي نفكك من حشيمة بني خيك
عطنا زهابك واعتزل درب الاذواد = نبي نجنّب كل دربٍ يودّيك
خلّوه وحده يشتكي زود الانكاد = روحه غدا فيها من الهمّ تفكيك
تنزل دموعه كل ماهلّ رعّاد = كن السما تنطق : " قضا حكم باريك "
هذاك وجدي وجد حاله بالاسناد = عليك ياللي كثر صدّك يحلّيك
يامنبع الفرحه وياصبح الاعياااااد = تكفى تريّث لاتعجّل خطاويك