السلام عليكم ورحمة الله وبركاته هذه اول مشاركة لي في منتدى الدواسر وابداها بقصيدة للشاعر
رحمه الله واسكنه فسيح جناته/شلعان بن ظافر الودعاني الدوسري.
وجودي على بدو رعو حومة النقيان=رعو في جديد العشب لازاف زملوقه
وجودي على شوف المعاشير والحيران=مظاهير اهلها جات للقفر مسيوقه
نصو مرتع فيه الخزامى مع المكنان=يعط الندا به ما بعد يبست عروقه
وبنوا ابيوت واستقلت كما الحيطان=تراها غناة الروح والنفس ملحوقه
وشب المنارة متعب البن للضيفان=وتلافو عليه اللي يحبون منطوقه
حمس طبخة تقعد خوا الدايخ العمسان=ولاهيب لانيه ولاهيب محروقه
نكبها بنجر كل ما ضرب زاد جنان=الى من ضجر كن صوته يجيه من فوقه
حكمها على غاية هل الكيف والظفران=بها زعفران وهيل واشكال مرفوقه
وخذاها خفيف النفس في دلة الرسلان =بها طمغه من حقوها فوق مدقوقه
وبعد ساعة قامت تواردهم الذيدان=رتع كل ذود عقب مشيه وطاروقه
رعت كل عشب خايع ما تبي رعيان=مع كل شقه عشبها تومي عنوقه
كساها الشحم عقب الهزل لين جات سمان=فضايل كريم خاط من جوده افتوقه
فحلها مع طرفها والوجيه ازيان=كما الطار محني الزبد يضرب اشدوقه
الا يا وجودي وجد من فارق البدوان=طواه الهيام وثومة القلب محروقه
انا ما ذبحني كود من عودها ريان =كما غصن موز تدبح بروسه عذوقه
رقيق المعنق كنها قايد بلا غزلان=الا من مشت كنها من الحقو منتوقه
جرحني وراح ومكسبي منه الحرمان=جداي الونين ودمعه العين مدفوقه
وارجو ان تنال على رضاكم والله الله بالردود
راعـــــــــــــي الرمــــــــــــــــــــــح.