بسم الله الرحمن الرحيم
السلام عليكم ورحمة الله وبركاته
ـــــــــــــ
تلبية لـطلب ابن العم الغالي /
ابو سليط .
نقلت لكم هذه القصيد لـ الشاعر /
خالد بن مدعث بن نفل الخرفاني الدوسري .
السالفه ومافيها أن
خالد بن مدعث له أخو أسمه
غانم ,
فـ أستشار
غانم اخوه
خالد وش يشتري موتر ؟
قال له
خالد : اصبر يوم وأنا اعلمك .
فقال هذه القصيدة :
يا ( غانم ) أشتر من جديد المواطيـر = ( شاص ٍ ) على كيف الغريب الخــلاوي
لونه مع الأصباح كنه نحر طيـر = ولونه مع أتلى الليل نجــم سمـاوي
خطه مع الجنبين ياهيه ما غيــر = شفة هنوف من سقا التــوت راوي !!
أليا مشى كنه ولـد شيخ ٍ امغيــر = مصطور صفقه صفق سيل النحـاوي
ولافز تسمع له مع القاع تصفيــر = صرّ السواني فوق بير ٍ قصـــاوي
ولاوقف ماله من الوصف تصـوير = ألا كما وصف العديـم النـــداوي
صوت كفراته لونسة شلعت القيـر = كنه أعوى ذيب من الجوع طــاوي
وجلد التواير يجلد الحيد والعيــر = رعاد مزن ٍ والبـَرد منـه هـــاوي
وحس المكينه لا استوت فزة السيـر = حس الهنوف المترفـي السحــاوي
ورفارف ٍ يشقابها الفكر ويحيــر = كنه ردايف لابسـاة الغطــــاوي
له مقدم ٍكنـه يقـود الطـوابيـر = أو مثل قبع العسكري الفــــداوي
ماخذبه أعيال الجحلط مشاويــر = ولا حملوا حوضه بجحٍ حســـاوي
ما ساقه ألا محتميــن المعاشيـر = أهل العزاوي مخلفين الهقــــاوي
هو علة أللي ما براسه صعاطيــر = وهو طب من يونس على الكبد لاوي
هو منوة أقلوب الزحول المناعير = يا كـــم دونه يقصـرن المنـــاوي
يازين فوقه لمشينى به اعصيــر = مـــع خايع ٍ ماداج فيها الشــواوي
وسهيل بان وطلعته مقدم الخيـر= نجم ٍ مـع الغيث المغيث أمتخـــاوي
والوسم جاله مع أدخوله تباشيـر = وذكـــر الحياء جت له أعلوم وحراوي
يا الله بهمال ٍ بصوب المزابيــر = نـــون ٍ سنا برقه مع الغرب ضاوي
يسقي الديار الممحلاة المداهيــر = ألـــلي ثراها فوقها العــود ذاوي
وبل ٍ وصوته لسقا القاع ( تكبيــر ) = شهرين والما حاير فـ المحـــاوي
حتى غدى روس ( الزبيدي )مشاهير = فوق الثراء يعمي العيون ويــداوي
كنه أنهود ٍ قطعــن الأزاريــر = يضيع معهن مدعيــن الفتـــاوي (1)
قفر تعانقبه أغصــون الناويـر = الـــــريح طيب ولـ أم سالم غناوي
والروض بطرافه تحن المغاتيـر = وحيرانهن يبـــرلهن بالخطــاوي
وقفة فحلهن بينهن كنه النيــر = ولا عقيـــد ٍ دون داره حـمــاوي
ذي جنـة الدنيا والأيام تعبيــر = ولا زينها .. ألا مقتفيهــا بـــلاوي
لو ما نسج الرجل في الخبت ونسير= معاد نلقى للوناســـه حــــراوي
أقنوص والارايحين مسايـيــر = صوب الرجال أمزبنين الجـــلاوي
ربع لهم حشمه وقيمه وتقديــر = مجلاسهــم ماهوب مجلس قهـــاوي
العود الأزرق والدلال المباهيـر = ودثر الشحم فوق الصحون أمتسـاوي
(( دواسرٍ )) يوم الحــرايب بواتيـر = ويوم الرخا حبلً متين رهــــاوي
أصغارهم يثنون عند المضاهيـر = ستر العذارى والــدبش والعــزاوي
وكبارهم مثل الوحوش الهواميـر = أسيوفهم بين النحــر والكــلاوي
وباقي القبايل " نعم " من غير تقصير = وكل ٍ على فعله يعــد الحكـــاوي
غير النشاما ما يبي القلب تدويـر = في شوفهم يسلى العلــيل الشقـاوي
أسج معهم والليالــي مقاديــر = والعمر مره يالخفـــوق السنــاوي
وش خانة الدنيا وجمع الدنانيـر = وحنــا علينا نازع الــروح نـاوي
،،
(1)
(يضيع معهن مدعين الفتاوي) : يقصد في هذا البيت الذين يتسترون بالدين ، وليسوا من أهله ،
أما .. أهل الدين فلن يضيعوا معها بأذن الله .
..........
وسامحوني اذا حصل مني قصووووور
أخوكم //
بلنتي
..........
وسامحوني اذا حصل مني قصووووور
أخوكم //
بلنتي