[معلومات العضو عناد]

لي ثلاثة عشر يوم أتجلّد وأسهر الليل من شيّ جرالي = والشهر زلّ ما أميز عداده لا تلومون من كثرت شطونه
أطلب اللي خلقني وأتعبّد وأرتجي خالقي يلطف بحالي = فاز عبدٍ تعلّق بالعباده ، من تردّى بدينه ما يبونه
قالوا: الناس وش بك يامحمد قلت: أنا فيّ جرحٍ له ليالي = مير حيل الله أقوى من عباده والدخاتر ما هم بيعالجونه
أبعالج فلكنّ أتركّد والدهر فيه ميلات وعدالي = ما هنا واحدٍ يبلغ مراده لو يعض الأصابع في سنونه
في ضميري جروحٍ ما تعدد والله اللي عليم بكل حالي = مير سبع الخلا أبخص في رقاده كلّ واحد يقدّنه عيونه
ما كتب خالقك ماهوب يرّد لو تمد الجنيه مع الريالي = كم عقيدٍ تحوّل من شداده عقب ما هم بربعه يمدحونه
ما يفيد التمنّي لو توجد لين تسقط على البير المدالي = ونعرف الوقت حرّه من براده وكل راسٍ يشيلنّه متونه
السماء اليوم بالغيمه ملبّد ما هنا شمس غاطينا الظلالي = والله اللي بصيرٍ في عباده يظهر الشمس ويفرّق مزونه