اخواني الكرام
السلام عليكم ورحمة الله وبركاته
ابتلي الكثير مع الاسف بمنازل خرابها أكثر من عمارها ... فالكهرباء كل يوم ملتمسه والتلفون يوشوش والموية تسرب والحوش فيه هبوط والجدران متشلخه و البويه متقشعه والسقف يندي والبيبان لاكه ووو ... وهذا كله نتيجة الامانة في العمل وكفاءة الايدي العاملة المرخصة من وزراة العمل !!! مالة عليك ياوزارة المبلابس النسائية الداخلية!!!
المهم ...هذا يهون ... المشكلة التي اتحرج منها كثيرا ... واحس ان عرضي انتهك وكرامتي اهينت .. طبعا معنويا ... اذا خرب عندي شي في البيت جبت باكستاني اوبنغالي ولا يرده إلى غرفة النوم ... رايح جاي بين الغرف علشان يركب فيش والا يمدد لسخانه .... واقعد كل يومي مقابله .. ولا يخلص إلا حافظ بيتي مسمار مسمار !!
وكانت آخر مره جبت باكستاني يتعلم الحرفه على بيتي زي العادة .. المشكلة كانت واضحه ما يبيلها معلم ... سيفون يهرب .. المهم ... يوم شافه قال القلب خربان ولا زم يغير ويكلفك شغل يد خمسين ريال .. خير ان شاء الله محاضر في الجامعة ساعته بخمسين وتركيب السيفون بالكثير نصف ساعه .. ما علينا نبي نخلص ...بس وشلون خربان وتوه جديد .. قال يارجال .. طبعا باللهجة السعوستانية .. البضائع المقلده الوان واشكال عندنكم في البلد وقفت على سيفون .. جيب سرعه صديق ... الله يخلخلنا وزارة التجاره والجمارك حيث انهم مفتحين على الأخر ..
قلتله خلاص بعد الصلاة تعال ركب القلب على أني اذا طلعت من المسجد مريت محل مواد البناء ... وانا قاعد اتوضى في الحمام لاحظت برغي في ذراع السيفون لوزن مقاس الماء .. والله واجيب مفك وافره وانزل ميزان العوامه ووقف النزيف ...ايه ولله انه نزيف ..
قلب جديد ياباكستاني ياحرامي ... ان قلنا ما يعرف فهي مشلكة ... وان كان يعرف فمشكله بعد .. لانه بيقول في نفسه بدال ما افر البرغي واخذ عليها عشر ريالات خلني اخذ عليه خمسين .. هذا سعودي فلوس كثير !!!! المهم ... جا بعد الصلاة وطق الباب ... علمته المشكلة وقلت رح حسبي الله عليك و على اللي خلاك تشتغل ... هو ربي وكفى!!
عندها قلت ياولد ... ليش ما اسوي شغلي بنفسي .. الا متى وحنا في جهل ... إلى متى و هالعمالة تنتهك بيوتنا طول وعرض علشان شي تافه ... وليتها تعرف .. السيارة ما تبدأ تخرب الا اذا دخلت ورشة او وكالة .. عندنا طبعا ... كله بسبة هالعمالة اللي تجي تعلم علينا ... ووزارة الكالا...... لا انظمة ولا شي ... سجل مهنته في الفيزا وبس .. وخله يدرعم في البلد !!!
وبعدها بديت اتعلم شوي في السباكه وشوي في الكهرب وشوي في البنا وانت ماشي ...
حسيت بان الشغله سهله ومسليه .. وتجاوزت مرحلة التصليح إلى التطوير .. على سبيل المثال عندي سيب اظلم وفيه لمبتين على فيش واحد .. وحبيت اخلي كل لمبه على فيش علشان اوفر بالكهرب ...وكل ما جبت كهربائي قال ما تقدر وتحتاج تكسير وتحاج شغل وتكاليف .. وفقدت الامل قلت ياولد بلاها ... فك لمبه وبس !!!
وبعد ما بديت افهم شوي في الكهرباء ... شريت سسته بخمسة اريل ... وفتحت الفيش وغطى اللمبه وسحبت سلك اثنين ملي من اللمبه إلى الفيش بالسسته وفيش مفتاحين وانتهت معاناتي من هاللمبتين ومصاريفها ...
صدق من قال العلم نور ... ياسلام اذا صار الواحد يعرف الاساسيات في تصليح بيته او سيارته او اداوته الكهربائية ... ويستغنى عن هالعمال الداجه في البلد !!! ليش ما نطور قدراتنا المهنية ... علشان نقدر نتعامل مع مشاكلنا في بيوتنا وسيارتنا وغيرها .. انا ما اقول نصير سباكين ودهانين .. بس على الاقل نصير فاهمين شوي ... ما ندربي هالروس وبس !!
جارنا في الديره ... فلان الفلاني ... هو وعياله صبغوا بيتهم من برى كامل .. استأجروا صقاله وقميص ابو عشره وفرشه رول ... ويومين والبيت ابيض .. بيض الله وجيهكم ... وكانت بدايته يوم اختلف مع الدهان المصري .. والسبب ان جارنا قال انا ابجيب براميل الدهان علشان يضمن نوعيته ... قام المصري ورفع سعر شغل اليد .. وشم جارنا ريحه نصبه على مستوى .. وكرشه ودهن بيته بنفسه ...
اخواني الكرم ادعوكم لزيارة هذا الموقع ... موقع الادارة العامة لتصميم وتطوير المناهج التابعة للمؤسسة العامة للتعليم الفني والتدريب المهني ... جميع مناهجها تلقونها على ملفات اكروبات جاهزة للتحميل ...
رابط الموقع
رابط حقائب التدريب
رسالة شكر ارفعها عبر هذا المنتدى .. بعد اذن الادارة ... إلى هذه المؤسسة الجبارة على هذا الجهد المتميز ..
من حلف له بالله فاليرضى .. والذي رفع سبعا وبسط سبعا إني ما اعرف محافظ المؤسسة ولا يعرفني ولم التقي به في حياتي ولا اعمل في المؤسسة ... وليس لي مصلحة من سبه او مدحه .. ولكن من لا يشكر الناس لا يشكر الله ... المحافظ د. علي بن ناصر الغفيص .. تتكلم عنه النقلة النوعية التي احدثها في المؤسسة .. واحليكم إلى موقع المؤسسة لترى مدينة علمية كاملة تتحدث عن انجازات هذا الرجل ... فله منا الشكر ومن الله الجزاء .. وهو بحق الرجل المناسب في المكان المناسب
بوركت يادكتور علي وبوركت مساعيك .. ولا حرمك الله الاجر ...
حمل من هنا ما تشاء وابدأ في الاعتماد على نفسك ...
اخوكم ودعان