[معلومات العضو عبدالرحمن الشرافي]

بسم الله والصلاة والسلام على رسول الله


انقل لكم هذه القصائد


للشيخ التائب/ حجاب بن عبدالله بن نحيت (( غفر الله له ))


(1)

لي قصةٍ عنها اكثر الناس يـدرون=مـع عالـمٍ لا قابلونـي تكهربـت
ناسٍ اليا مروا مع السوق يمشـون=اضيع ما اعرف الثلاثاء من السبت
اللي نسيتوا مالكـم حـق تنسـون=يعنـي نسيتونـي لأنـي تغيـبـت
اغيب وكل النـاس مثلـي يغيبـون=كم بالقرى ناسٍ لهم نـاس بالخبـت
صديت واهل الحب عـاده يصـدون=لـو الغـلا بقلوبهـم نابـتٍ نبـت
يخشون ناسٍ يرقصـون ويدقـون=هذا جرى يمكن وهذا جـرى ثبـت
وانا ولو صديت ما زلـت مرهـون=وش عاد لو في بعض الاوقات جنبت
أعيش في جوٍ (ن) من البعد محزون=من يوم عن ديرة حبيبـي تغرّبْـت
اللـي تلومونـي كفـى لا تلومـون=ولا تضيق خطركم لو انـي تعذبـت
يمكن بهالتعذيب راضـي وممنـون=والا على طول الزمن قـد تدربـت
وانا ادري ان الناس مثلي يحبـون=لكن مـا تعبـوا مثـل مـا تتعبـت
اظن ما محدٍ حب مثلـي بهالكـون=ولو قص واحد قصتي كـان كذبـت
شيٍ يخلـي كامـل العقـل مجنـون=ما كنت اصدق بالهوى لين جربـت
هذا الخبر والحال من دون في دون=وانا خلاص مـن النهايـه تقربـت

(2)

اما حصل شوفك على القرب باسلوب=ما تنفع الوقفـه ورا زلفـه البـاب
جرحتنـي جـرحٍ مقـدر ومكتـوب=ستين يوم الجرح ينـزف ولا طـاب
والله لو اني علـى الامـر مغلـوب=لأاقعد بداري من مساجين الاحبـاب
واصبحت انا مابين طالب ومطلـوب=الحق عندك وانت له صرت طـلاب
نقيتكم من بيـن عشريـن محبـوب=يا خوفتي ان كان ظني بكـم خـاب
اخاف قلبي ينصهر صهـر ويـذوب=ويصير شي ما حسبنا لـه حسـاب
ان ما حصل حبٍ على صفه قلـوب=ما يتفـق بالحـب صـادق وكـذاب
وانا ترى مجبـور اسميـك حبـوب=واهل الهوى بقولوا الحـب غـلاب
غلاب يغلب من تنى والمنـى كـوب=وشلون انا اللي شاربٍ عشره اكواب
وانا لو اقوى اتـوب والله لاتـوب=لكن ما واحد وقـع بالهـوى وتـاب

(3)

نارٍ بكبدي تشتعـل آآآآه اوف اوف=بالله نـادوا لـي جنـود المطافـي
مذكور بالدوحـه غـزالٍ يوصـف=يخشى عليه من الحسد لو يشافـي
بأبيض شفرر سته وستين يعـرف=يستاهلـه ابـو الثمـان الرهافـي
يلومنـي الحـب نــاسٍ ملـقـف=اللـي محبتهـم محـبـه هـرافـي
ياناس انا في حالـي ادر واعـرف=وش عاد قلتم ما بـك الا العوافـي
وانا ادرى انـي بالمحبـه مكلـف=واشوف ميلتي وجهتـي وانحرافـي
ادري ولكن ما استطيـع اتصـرف=الا بميـزان الشـعـر والقـوافـي
يا ليت من يوصل كتـابٍ مظـرف=ويجيب شرح من اريش العين وافي
اللـي تـودون الكـلام المـحـرف=ما توصلونه كامـل بـلا اختلافـي
قولوا لها تامـر علـي واتشـرف=اجي على الاقدام لو كنـت حاوفـي
او قولـةٍ سرعـه تجـي لاتخلـف=ياللـي تجيهـا قلهـا لا تخـافـي
الجسم ينشف ليه وش لون ينشـف=الـى حصـل حـبٍ تـلاه العيافـي
تشهد على حبي ( شبابه وخندف) *=واللي سمع يشهد علـى باعترافـي

وسلامتكم ..



(( واعدكم قريباً بقصائد اخرى للشاعر / حجاب بن نحيت ))


اخوكم/ عبدالرحمن الشرافي