سرى الليل وانا والهواجيس في مسراي = اطالع نجوم غربت عقب مطلعها
اسرح معا الهوجاس واضرب راي براي = ابدد همومي والهواجيس تجمعها
هواجيس قلبي ذاك رايح وهذا جاي = تخالف علي بالليل والصبح أودعها
على الصاحب اللي بالغلى حدنا لقصاي = غرام لعب بالقلب والنفس مجزعها
تسيطر بقانون الهوا واستباح حماي = لو اني عزيز وعزة النفس ترفعها
انا كان مقفي من دروب الغرام اقفاي = معزل ومعذر فالمحبه وبايعها
لكن المحبه لو تخفت بكل خفاي = تجيها الصدوف اللي تبين مواجعها
الا واشقى روحي والا واكبر بلواي = اجامل وعيني لايع البين لايعها
تولعت فالذي من ورا هقوة الهقاي = هنوف جذبني في هواها تواضعها
عليها عروق القلب من هالسنه ضماي = وبساتين قلبي يابسات(ن)مزارعها
تتل الضماير تل دلو لها لقاي = اليا هزها مياحها جاك شالعها
وليف مرابيه ابعدت وافختت برباي = تنحا وامان الوصل مانيب قاطعها
انا يوم هلت دمعته ظلمت دنياي = وباشر عيوني عبرة ماتوقعها
يوم انه وقف ثم حط يمناه في يمناي = تقل ان روحي نازع الموت ينزعها
من الحسره اضرب كف يمناي في يسراي = على وقفتي والعين تذرف مدامعها
تنحت بي الايام لين قلعت مرساي = والايام تفريق الولايف طبايعها
الا يالطيف الروح ياغايتي ومناي = ترى القلب معكم وداعت (ن)لاتضيعها
اسامر نجوم الليل وانا على مركاي = واعود على الذكرى القديمه واراجعها
ذكرت الوصوف اللي سبب علتي ودواي = ضاقت بي الدنيا وربي موسعها
ذكرت العيون اللي ليا سلهمت بظباي = زرق رماح في ظميري مواقعها
عيون اشقر يرهي من بعد اللحوق ارهاي = لاحول على جول الحباري نبرقعها
وجيد تغشاه اشقر للنحر كساي = كما ليل شقرا هزته في تشعشعها
تحت شيخ قوم وكل يوم(ن) وهو غزاي = ليا قيل ياهل الخير يرخي مصارعها
شبيه العنود اللي تحاوز من الرماي = نعرها اشهب البارود والريح صايعها
هنوف خذت قلبي ومنها قصرت اخطاي = سبب عالم(ن)ماعاد نعرف طبايعها
ابنخاك يبن عون يامنتهى شكواي = وانا اخبرك ليا جتك الدعاوي تسنعها
نصيتك يبو نايف وانا خابر منصاي = منصا الرجال اللي على الطيب تجمعنا