[معلومات العضو حسن بن بطحيه]

السليل مركز العز

ياوجودي كل ماهب ذعذاع البراد= راح وقت العصر الاول وجاء عقبه عصير
طالت الفيه ومالت وطاب لي القعاد= اتفكر في ليال يحير بها البصير
بالعصير اللي يثير الشجن وسط الفؤاد= مع غروب الشمس كل المشاعر تستثير
حزة فيها انفصال البياض من السواد= توجب التفكير في دبرة الرب القدير
حزة فيها الطواري تجي كثر الجراد= كبرها ياعبرها مير صايبها عسير
تشحن اللي قد له شهور ماشاف البلاد= ديرة من حبها عجها عندي غثير
ديرة من ربها ماتحمل الابتعاد=يهتويها جعلها القوم لو من دون خير
السليل مركز العز للمجد امتداد= مستقر للوداعين مدية القصير
مكرمين الضيف قبل الرخا والاقتصاد= قبل ماكلاً يجي بالكرمسيد وأمير
يوم وقت الجوع والفقر وأيام الكساد=ماطفت ضيانهم جعل مافيهم فقير
وحتموها لاد جمعان بسيوف احداد= كم حريب بين ارغاه من عقب الهدير
لابة تاخذ ولاهيب توخذ بالطراد= ماذكر شدو ليا جا من الخصم النذير
منهم اللي ثبت السلم فعله وستقاد= مثل بطحية سعدهم ليا قدم سفير
ذي مواريد ابلهم ذي مواريهااجداد=ذي مداهيل المناعير والمجد الشهير
هم هل الصولات وهل المغازي والشداد= قالها المرحوم شلعان من يكنى جرير
شاعراً خلد كنوز مثل كنز المعاد=أبلغ التوصيف بكتاب ابن ظافرمثير
غير هذا زادها بالغلا حب اوداد= من غلا عود سكنها حشا ماله نظير
شايبي ياجعل يومي قبل يومه وكاد=شايبي بالحب لا والتي ماله خشير
شايبي ياوي شايب ولا مثله انداد=بالغلا ماشاركه لا كبير ولا صغير
ليت عمره ليت ياليت من عمري يزاد=ليت عمري لجل ابويه خلقه الله سبير
كان سقت ايام عمري مع عيالي ظماد=سقتها بحساب عمره عسى عمره وفير
جعل عمر ماكسب ضحكه الشايب نفاد= عاد مابه خيروإن صار من هذي قصير
لارضى برضاه نكسب رضى رب العباد= محكم التنزيل وصى وبآياته يشير
في رضاه الخير واصلاح وهدايه رشاد= واجب بره ولازم ولامنه تعذير
طاعته من طاعه الله وتبغى الاجتهاد= واشهد ان العز في خدمه العود الكبير
باطلب الله والله اللي عليه الاعتماد=ياعساي ارد حقه الشي اليسير
منه أخذت العلم والعلم مبداة المهاد=في ثلاث ذكرها في الحديث المستنير
السباحه والرمايه مع ركب الاجياد=والفروسيه لها شان ورجال تغير
الفروسيه لها فارس عنده مباد= يحتويها لاتعصب وهو فيها خبير
مثل ابوهادي ليا قام في رايه سداد=ينقل القالات لو كبرها من كبر نير
عند ابوهادي لها زاد وزنادوعتاد= ماسواه يسوقها لين يتعبهاالمسير
الروابع والروايا مع قدح الزناد= هو فحلها لابدا العلم والوضع الخطير
الشجاعه دلته والنعارة له اقناد= والنفوس اعزاز واطهر من الشاش الحرير
المراجل حاشها كلها جمع وافراد= يوم غيرة طافي الضو ودلاله هجير
يوم غيره خاضع للمره دون ارتداد= تامره وتسنده مثل ماتامر غرير
المراجل لادخل سوقها زاد المزاد= مايحسب للخساير عسى خيره كثير
المراجل قالها قول وفعاله وتاد= للمكارم عد والناس وراد وصدير
يعرفه من جا من الوقت يشكي لاظطهاد= رايته بالعز تدعي المفتح والضرير
يقضي اللازم وكم طالب منه استفاد= هو ذرى المحتاج وابن السبيل المستجير
دايم يمناه عليا ومداته اعداد = شربه من كف يمناه تكفي عن غدير
ريف ربعه بالمواجيب مافيهم حياد = لو حصل من بعض الادنين ماحس الضمير
لو تحسه قال عندي مثل برد الزباد=يحتمل عثرات ربعه ولا يظهر ضجير
يطمر الزله ولا يلحق المخطى نقاد= يحتملها كن مابينهم شئ يصير
سيفنا البتار مذخور في بيت الغماد= دام راسه حي منا الضواري تستذير
طيرنا اللي خلف احرار تعجب بالهداد= تكوي المبغض وتركي على مكواه كير
كل زارع يجني اللي زرع وقت الحصاد = ياكذا ولا كذا عقبها ناكر نكير
يشهد الله ويشهد الله وكلاً فيه شاد= مايغط البينه كود رجال حقير
اعقبي يابنت خلي الشباب أهل الفساد= ان ظهر ماجاك وإن طاح يسمع له شخير
اطمحي للي على العز يرقابك سناد= شايب يابنت الاجواد فوزي به عشير
جعل ابوة بجنه الخلد واصحاب الجهاد= جعل رب العرش يوم المحاسب له ظهير
قالها من شوفتك يا محمد له مراد= قبل ماتركز عليه النصايب بالغوير
والصلاة اختامها ريح ومسك وريح كاد=ياصلاة الله على من بعثه الله بشير