[معلومات العضو عبدالرحمن الشرافي]

بسم الله والصلاة والسلام على رسول الله



أضع بين ايديكم هذه القصيدة المشهوره

للشاعر الكبير / شلعان بن ظافر الوداعين الدوسري (( رحمه الله ))


يقول فيها

بدعت المثايل والمثايل لها بيبان = الى فتحت بيبانها حاك ما فيها
على القصد والمقصود بعدل القيفان = عسى راعي البل عند ذوده يغنيها
يغني بها في خايع ٍ عله الودان =بذيك النفود اللي عسى الغيث يسقيها
تهشم ربابه من طريف ٍ الى نجران = مداهيل عوج السيق ربي رضا فيها
تشوف الخزاما والشقاري مع المكنان = تخالف زهرها ساكنات ٍ ذواريها
تكبر قياع الرمث من زاهر الحوذان = كساها ولي العرش واحسن كساويها
مداهيل حلوات اللبن خلقة الرحمن = مجاهيم سود ٍ خالق الكون مسويها
مجاهيم جاذبها الفحل والوجيه زيان = وساع ٍ مرافقها طوال ٍ خطاويها
جليلات عظم الساق مرفوعة الحجبان = طوال الرقاب مشرهبات ٍ اذانيها
عراض الخدود اللي تماري بها البدوان = كبار الفقار موسعة صدر راعيها
مجاهيم رمليات لخشومها نيشان = ترافض بلادمها حداد ٍ نواصيها
هوى القلب خطوى نايفه والضلوع متان = تجي باالحلا والزين وترد به فيها
كبيرة مزر الورك فجحامن السيقان = تخنطل قوايمها كبار ٍ مواطيها
تمايح بذيل ٍ مثل دراهة الغـّران= نهار الطرب هذا لهذا يوديها
لها غارب ٍ متقدم ٍ شامخ ٍ مليان = يدافر حباك العيز والعيز حاليها
وساع ٍ منادغها من الزور للكيعان = بها كل شي ٍ زين والملح غاشيها
طيوح ٍ تحذف اشنافها واسعة بيعان = فروع ٍ فتون البيد عسم ٍ ايداديها
ولا رايعت كن المعنق على رمان = تعوجه من العانق خفوق ٍ لواحيها
سنود ٍ من الغارب فسيحه من الذرعان = عسى ربنا من شر خلقه ينجيها
والبل تراها السود والصهب ياالضفران = وشقح ٍ سواد اذيالها فاصل ٍ فيها
انا حب شوف الوضح وضاحة الالوان = مغاتير من جلد الوضيحي تحاليها
مغاتير جذابات ومكحلات اعيان = جميع الوصايف كلها كامله فيها
مغاتير فنس خشوم فيها الدريعي يان = عرانينها وشعوفها فاصله فيها
مغاتير معروفات وطبوعن زيان = على الصوت تبغي راعي الصوت يدعيها
الى شفتهن رتوع في خاطي الجيان = تشادي القنوف المرسيه بامر واليها
مغاتير لامن سمعت الصوت والدندان = لاكن الذيابه تهتوش عندتاليها
مغاتير لا غنى المغني على عليان = ضربها السطر لا صاح بالصوت راعيها
الى جلعت لاكنها شرد الغزلان = وراها المفرد يابسات ٍ علابيها
الى من ذعرها الصوت واستولت الميدان = يقوس ذرايب عجها من سماريها
ركد عجها من سجها والجرس رنان = تجي ذي مع هاذي وهاذي تباريها
{ترى البل فرح وسرور من خلقة الانسان } = { عسى الله يبور بواحد ٍ باير ٍ فيها }
كنوز البداوه منقذة راعي البستان = موارث جدود ٍباشهب الملح تحميها
مداخيلها عسره على بايع الرمان = ولا تصلح البل كون في مرح اهاليها
حلا ماحلا مرواحها تجذب الحيران = الى اقبل غروب الشمس والليل ضاويها
على بيت من هو يكرم الضيف والجيران = عشير النشاما كل ما حل طاريها
عسى من يسوق المال في غالية الاثمان = يبارك له الرحمن فيها ويذريها
انا قلتها وادخل على الله من النسيان = مع الناس صفر وزرق ماني بناسيها
وحمر ٍوشعل ٍتختلف بينها الالوان = الى تاه فيها الوصف تعرف باساميها
ترى البل تعز الرجل تكفون ياالشحعان = حرام ٍ عليكم تركها والطمع فيها
وصلاة ربي عد ما لاح برق وبان = بسود القنوف اللي غلاظ ٍ مثانيها
على الهادي المبعوث بسنه من الرحمن = شفيع امته لا نوديت بامر واليها

للشاعر / شلعان بن فهيد الودعاني الدوسري



وسلامتكم




تحياتي..


أخوكم / عبدالرحمن الشرافي