ياعين
هذه قصيدة سبهان بن مساعد الغزي البدراني مرثية في الفقيد البداريين وآل غزي الدكتور/ فارس بن محمد بن حمد الغزي البدراني (رحمه الله) هذه قصيدة نشرت اليوم في جريدة الجزيرة :
يا عين وين اللي قبل له تراعين =يا عين راح اللي من الناس نغليه
اللي نوده راح واللي تودين =حق عليك اليوم يا عين تبكيه
يا عين حق له دموعك تهلين =يا عين جودي له بدمعك وهليه
يا عين هلي بأزرق الدمع يا عين =لا تذخرين الجهد حقك وأخذتيه
مابيك يا عيني من الدمع تبقين =لا.. لا ولو زدتيه بالدم هاتيه
هاتي ترى وياه صرنا بعيدين =ولّى الفرح والحزن بأول مباديه
توما بدأ حزني وحزنك بحزنيين =حزن الفراق وحزن غالي فقدتيه
يا عين يا عين الشقاء ويش ترجين =ما ناصله واليأس كأسه شربتيه
وأنا صوابي ماكنٍ لا تظنين =إن البكاء يبري جراحي ويشفيه
ولا تحسبين الدمع عقبه يسلين =لا والذي كون سحاب ويزجيه
بس ان دمعك يا عيوني يهدين = ويطفي لهيب بالحشى زاد صالية
ابكي واببكي ثم أنوح وتزيدين =حزني بدمع فوق خدي سكبتيه
يا عين راح القرم وانتي تشوفين =ومصيبتي يوم أن نعيه قريته
وش لي بدنيا زينها ينقلب شين =وش لي بوقت كاثرات بلاويه
صارت حياتي والممات متساوين =ومن لا مني جعل الولي ما يقديه
فارس رحل والخلق عقبه مقفين =درب قسمه الرب والكل ماشيه
رضيت ما قدر إلهي وترضين =ونصبر على فقده ولو ما قويتيه
مير البلا لا صرت وياه روحين =بالطيب عشنا وافترقنا على التيه
الدرب واحد وافتراق فيه شخصين =أحدٍ عبر وأحدٍ قدره أوقعه فيه
لو إن عمري طال من بعده سنين =والله فلا أنسى من كمل في معانيه
يبكي عليه أقصى العرب هم والأدنين =فعله شهد له والدلايل تسميه
ويبكي عليه ضعوف حال ومساكين =وللي تعنى لأجله وجاه ناصية
حرٍ مضرا للعطا من ميامين =وحيد يشيل الحمل والعز كاسيه
ما جاه عيله وأغلب الخلق دارين =طيب العموق وجده اللي موصيه
ابوه وجده من ربوع مسمين =من ترثه آل غزي عربية مجانيه
الجد زايد والفروع البدارين =للعز قصرٍ سامكات مبانية
دواسرٍ بالمجد خطوا عنا وين =يشهد بها التاريخ والناس ترويه
وخواله اللي للمكارم مضرين =من الطنايا طيبهم تاه محصيه
تعلّوا بصيت وفعل مثل الشياهين =وفعول شمربينات مواريه
ما أقول قول يختلف فيه اثنين =الشاهد الله والثوابت تزكيه
فيا الله يا منزل تبارك وياسين =يا من على عرشه وذا الخلق ترجيه
بحسناك يا قابل صلاة المصلين =يا ممّن الخايف وساتر خوافيه
تغفر ذنوبه قبل تبداه بالسين =وتثبته عند السؤال وتنجيه
وتجعل مقره في مالا شافت العين =جنات خلدٍ راضي عنه ومرضيه
يأكل من أثماره عنبها مع التين =والياظمي يارد على الحوض يرويه
والختم صلى الله على كامل الدين =محمدٍ عزّه على الخلق وإليه
و(منتدى قبيلة الدواسر الرسمي ) التي آلمه النبأ يتقدم أحر التعازي وصادق المواساة لكافة البداريين و أسرة آل غزي في فقيدهم د. فارس، وتخص بالعزاء إخوان الفقيد د.عبدالعزيز بن محمد والشيخ عبدالرحمن بن محمد - رئيس محاكم جيزان، واللواء سعود بن محمد، والرائد فهد بن محمد، والعقيد حمدبن محمد ، والمقدم أحمدبن محمد ، وماجد بن محمد وإلى ابن الفقيد عبدالعزيز بن فارس.