السلام عليكم ورحمة الله وبركاته
أخواني الأعضاء
أسف على التأخير والغياب وأحب أن أهديكم هذه القصيدة الجديدة
والتي لم يجف حبرها أتمنى من كل قلبي أن تنال ولو قدر يسير من رضاكم وإعجابكم
ولا أنسى أن اقول كل عام وانتم بخير بمناسبة العام الجديد واقول لجميع الطلاب والطالبات بالوفيق في الاختبارات اتمنى لكم النجاح في امتحان الدنيا والآخرة
لكم القصيدة ولي الشرف
تصدقين إن حبك طاح من عيني = مستغربة صح ؟ طيب اسمعي عذري
يومي سألتك وش اللي معجبك فيني؟ = قلتي قصيدك وبس اللي شغل فكري
من بعدها أدركت إنك ما تحبيني = ومثلك مثل أي شخصٍ معجب بشعري
عشقتي الشعر فيني ما عشقتيني =ياويل قلبي وياناري وياقهري
يعني لو أهديك نسخة من دواويني = تغنيك عن شوفتي وعن حبي العذري
يالعنبو حظي اللي دوم مشقيني = مستقعدٍ لي وطايح حيل من صغري
نفسي وبس آعرف وش بينك وبيني = وش غيرك ؟ ما انتي ذيك اللي على خبري
هذيك تزعل عليها الكلْ وترضيني = تزهد بجنات غيري وتحتظن جمري
هذيك تشتاق لي وتحن وتجيني = ومافين أمل تسري إلا بعد ما أسري
هذيك لاغبتنا عنها تحاتيني = ولاجيت تشره علي وتقول لي : بدري
هذيك ماهيب تعشقني وتغليني = لكن تعيش بوصالي وتنتهي بهجري
هذيك لو قلت بأطلب شي تعطيني ؟ = قالت تدلل وآمر فدوتك عمري
هذيك لاشافها جنبي عدويني = ماتوا قهر ودهم لو يحفروا قبري
هذيك أكبر طموحي وشمعة سنيني = تنور سنيني بسناها ووجهها البدري
هذيك تسكن خفوقي وفي شراييني = وتذوب في روح روحي وفي دمي تجري
هذيك عن كل خلق الله تغنيني = من غيرك أهواه ياأم المبسم الزهري
هذيك ; ولا خلاص الهم يكفيني = ليه آتذكر وأضيق خلقي وصدري
خلاص حبك ترى ماعاد يعنيني = الوجه مالوجه أبيض وأنقضى صبري
طبعي كذا اي شخص يطيح من عيني = أنفيه من عالمي وأمحيه من فكري
الله يبيحك كثر منتي جرحتيني = والله يسامحك صرت أغار من شعري
وسلامتكم
اخوكم ومحبكم
عبد الرحمن سعد الدوسري
حزين الحرف