السلام عليكم ورحمة وبركاته :
أحسن الله عزاءنا وعزاءكم في فقيد الجميع دغش بن بطي الغييثات ,
أسأل الله أن يغفر له ويرحمه ويجمعنا به في الفردوس الأعلى من الجنة .
قلت هذه الأبيات الجمعة الماضية ولم أتمكن من وضعها إلا الآن
مع يقيني أن دغش أكبر من حروف اللغة وماتجود به من كلمات .
هذي ثلاث أيام والنوم ماطاب=أراقب نجوم السما في سماها
جفن العنا سهران والدمع سكاب=تهشّم إعباري بصدرٍ حواها
علمٍ لفاني ليت راعيه كذاب=وألا إشاعة مغرضٍ لي حكاها
لكنها مر الحقيقة والأتعاب=وإستسلمت روحي وجاها بلاها
رسالةٍ جتني بها فقد الأعصاب=أظلم عليّ الكون من محتواها
أبومحمد راح والكل منصاب=فيه الدواسر أحسن الله عزاها
حب القبيلة عنده يثير الإعجاب=ياما بفعله والقصايد حماها
مثايلٍ يطرب لها أصحاب الألباب=مثل الجواهر غاليٍ مشتراها
يبكي على فقده عريبين الأنساب=غييثاتٍ يلين العدو من قساها
وتبكي على فرقاه تلعات الأرقاب=ستر العفيفة لاتطاير غطاها
وتبكي معاميلٍ مع صحون وأكواب=ياما لهشال الخلا قد ملاها
والمنتدى لو يملك عيون وأهداب=فاضت محاجرها من إرسال ماها
بغياب ( محبوب الجميع) السعد غاب=والحزن خيّم في القلوب وغشاها
مرحوم ياكاسب ثنا إبعاد وأقراب=السيرة العطرة بطيبه بناها
دغش البطي للمجد والعز كساب=مواقفه ماغاب عنا وفاها
تنشر له البيضا على كل مرقاب=على مدى التاريخ يِرفع لواها
ناسٍ على الدنيا كما الشمس تنساب=تدور لكن ماتغادر فضاها
وناسٍ على الدنيا كما لمعة إشهاب=توضي ثواني ثم يذهب ضياها
وأبومحمد خالد الذكر في إكتاب=كتابٍ أحداث الليالي رواها
عسى ضريحه كله أنوار وأطياب=والثلج روحه بالسعادة كساها
وعساه في جنات وأنهار وأعناب=والله يجمعنا معه في ذراها
الموت حق ولالنا عنه مجناب=من أول الدنيا إلى منتهاها
أخذ الرسول المصطفى وأخذ الأصحاب=عليهم الغبرا تهايل ثراها
مادايم ألا من خلقنا من تراب=ويردّنا لتراب الأرض وحصاها
والعاقل اللي للقبر حاسب إحساب=والآخرة وأهوالها مانساها
.
أخوكم : فراج بن فهد الشكره