اقتباس:
|
المشاركة الأصلية كتبت بواسطة ابن وتيد
صحح مسارك
لـ سمران العتيبي
مالي ورى طرد المقفـي مصاليـح = يقفي وأنـا أقفـي والليالـي مديـه
وتبريرها من غير ..لوحة وتوضيـح =مايجتمـع فالوقـت صـح وخطيـه
واللي يباني بين (غلطـة وتجريـح) =وصفة علاجة قبـل يخطـي عليـه
طـرد الفيافـي والخلابالمشـاويـح=أخير من شـوف الوجيـه الرديـه
ألقى بها طـب الكبـود المجاريـح=والنسمـه العذبـه بـفـجٍ خلـيـه
ومـن لاتعلـق بالوجيـه المفاليـح=وثبت قواعـد رفقتـه مـع خويـه
وجنب دروب أهل الوجيه المكاليـح=ماصـارلـه سمـعـه ولاقابلـيـه
أعقد حبالك فـي حبـال الطحاطيـح=وجنبك على جنب الشجيـع ولديـه
علاقة الخايب مثـل ولعـة الشيـح=يومين وتشوف الخلـل فـي نويـه
أقولها وأختـار عـذب التصاريـح=أرجي بها الحسنـه وغفـران سيـه
من لاتأمـل فـي دمـوع التماسيـح=معطـوب تفكـيـره خليه..خلـيـه
مايرفـع الرجـال كثـر التمـاديـح=ولايطرحـه فعـل اليديـن الخفيـه
الـرزق بابـه والعطـاء والمفاتيـح=يفتـح ويغلـق بأمـررب البـريـه
تغلي صدور أهل الحسد غيض وتفيح=وتموت شعلة غيضهـم فـي شويـه
وياللي تبي ترتاح فالوقـت وتريـح=مهديك مضمـون النصيحـة هديـه
وثق عراك بمجري الفلـك والريـح=دامك شباب وشعلـة العمـر حيـة
لعب الليالي مثـل لعـب المراجيـح=تاخـذك بالغـرات صبـح وعشيـة
أغنم تـوال الليـل قبـل المصابيـح=الدين لأهـل الديـن.. فاتـح شهيـه
صل الصـلاة الواجبـة والتراويـح=خيـر النفـوس المؤمنـه والتقيـه
صحح مسارك كان يحتاج تصحيـح=عمر الفتـى قافيـه عجـز ومنيـه
|
المراقب الغالي أبن وتيد
أبو سعد أنت صاحب المقالات الجميلة والأطروحات الرائعة
الحقيقه إختيارك لهذه الرائعه يدل على حسن الأختيار والنظرة الثاقبة
لديك لاعدمنا تواجدك وتواجد المطاليق شرواك
لقد أحترت بغيت أنسخ بيت أو بيتين ولكن وجدت القصيدة كلها رائعه بروعتك
فسلمت يمينك التي نقلت وفكرك الذي إختار وقلمك الذي أبدع
وصح الله لسانك ولسان شاعرها ملاييييييييييييييييييييين
تقبل ودي وتقديري وشكري وعرفاني لمقامك العالي والرفيع
محبك ومحب الجميع