اصبر على العوجاء من ادنى ربوعي=وعلى خطا الاجناب مانـي بصبـار
واسرار عمري بين حدب الضلوعي=ماني بمن يبدي على الناس الاسرار
راحت معاليق الضمايـر مزوعـي=وزهقت من دنياي عقب الذي صـار
الله يهيـن مفرقيـن الجمـوعـي=ويرمي حبايلهم بعيـد عـن الـدار
لا بـد ماياتـون الانـذال طوعـي=وجرف الهيار انهبت النـود ينهـار
الحـر ما يخفـاه درب السنـوعـي=والعز مايخفى عزيزيـن الاشـوار
واهل الوفا والطيب مثـل الدروعـي=شيالهـا يـوم المظاهيـر جسـار
من خوه الرديـان قلبـي جزوعـي=يالله تقـوم حظنـا يـوم نخـتـار
لا بارك الله في الرفيـق القطوعـي=اللي يجافي صاحبـه مالـه اعـذار
والله ما نـرجـي وراه الفـزوعـي=حنـا رسينـا للثقيلـه وهــو ذار
وان كان قلبه من ربوعه قنوعـي=فما عاد للمقفين حشمـه ومقـدار
ومن كان في الدنيا كثير الطموعـي=فللمـال وراث وللقـبـر حـفـار
ودرب الخطا يعفيك عنه الرجوعـي=والموت لي صار الخطا منك تكـرار
ومايستوي ليـل سـواده يروعـي=وليل غدى ضوح القمر فيه سمـار
ياويل من ضله هشيـم الزروعـي=ما من ضلال الا مواريـث الاحـرار
ومانلتفـت لمغيريـن الطبـوعـي=والناس يختلفـون وافـي وغـدار
القصيدة لا أعرف شاعرها ،،، وسلامتكم جميعاً ،،،
وتقبلوا تحيات أخوكم ومحبكم في الله/ صالح الجعيدي