كان الشيخ زيد الخوير وجماعته آل ابوسباع على احد مواردهم
ومعهم جار من قبيلة قحطان
وكانت تسرح مع ابله ابنته وتدعى( الفنيده)
والأمير زيد عنده صانع من اجزل الرجال بالعين
وهو المسؤول عن الفرس ويعتنيبها وكانت الفتاه ترى الصانع وتظن انه زيد
وفي يوم من الأيام كانت ابل الفتاه قريبه من الجبل وبعيده من العرب
فمر بها زيد وقال يابنت ردي ابلك من الجبل ترى الجبال يعدون بها القوم
فردت عليه البنت وش عليك منها مهيب ترعى في حماك ولافي ذراك
قال زيد ومنهي في حماه ياطيبة الفال
قالت البنت في حمى زيد الخوير
وكانت تخاطب زيد نفسه وهي لاتعرفه
قال زيد مادام ابلك في حمى زيد ارعي حيثما شئتي وانصرف
وبعد وقت ليس بالطويل جات البنت تصيح
تكفى يازيد
تكفى ياعنى ابل جارته
زيد ياخيال البل
ونظرها يم الصانع..!
قام زيد وقال ويش علمك
قالت البنت الأبل اخذت
وركبت الخيل
ومسكو الأبل بأثرها حتى دخلت الجبل وصارت مع طريق ظيق
قالوا جماعت زيد خلنى نجنب الأبل وننطحها من ورى الجبل
المظيق لو وقف فيه بواردي واحد منع ربعه
قال زيد ياجماعه ماجات معه ابل قصيرتنا جات معه خيلكم
قالوا هذا مظيق ومحاجي للبوارديه
قال العلم جاكم
وفعلاً لحقوا البل وردوها من القوم
وانشد زيد الخوير قائلاً
قال الخويري والذي له سابق = صفراً تسابق صكة المصراعي
صفراً تريد مجربٍ ويريدها = ماهيب من تطمح وتبغي راعي
صفراً تسن عنانها بلحيها = تشدي لموسٍ في يد الذراعي
صفراً الا ركبت يشادي عجها = شختور وسمٍ بالشفق قد ظاعي
من يوم شفت دموع بنت قصيرنا = لانيب من حسي ولاني واعي
لعيناك يانجلا العيون نردها = لوكان مع ضيقٍ ومع متباعي
تناخوا سربتنا وجتهم عجله = مثل القطا الي وارد شراعي
وعرفتنا منهو يهوش بشطره =وبان الحديد الساطي القطاعي
مدحتنا جنيدى وانفل خطه = يركى نحور الخيل كالفراعي
من خشم سقمانٍ الى ام عييره = يومٍ حصل فيه العمار تباعي
عند الهظاب الحمر رديناها = وغنت بها الطرشان في لسناعي
قمنا نعدلهم بضرب سيوفنا = وارماحنا بظهورهم شراعي
خمسه وعشرينٍ بجفرة غاير = من كان هم من لابته يرتاعي
يانعم يالسبعان عند ركابهم = فأن الثنا طراته الشواعي
مسعود بن سعد الدوسري